GT vs MI: ரோஹித் நீக்கம்.. மும்பை இந்தியன்ஸ் அணியில் 2 புதிய வீரர்கள்.. குஜராத் டைட்டன்ஸ் வியூகம்

அகமதாபாத்: 2026 ஐபிஎல் கிரிக்கெட் தொடரில் அகமதாபாத் மைதானத்தில் நடைபெறும் 30-வது லீக் போட்டியில் குஜராத் டைட்டன்ஸ் மற்றும் மும்பை இந்தியன்ஸ் அணிகள் மோதுகின்றன. தனது முன்னாள் அணியான குஜராத் டைட்டன்ஸ் அணியை அதன் சொந்த மண்ணில் எதிர்கொள்ளும் ஹர்திக் பாண்டியாவுக்கு இந்தப் போட்டி ஒரு போராட்டமாக மாறியுள்ளது. டாஸ் வென்ற குஜராத் கேப்டன் சுப்மன் கில் வியூகம் சார்ந்த முடிவை எடுத்துள்ள நிலையில், மும்பை அணியில் ரோஹித் சர்மா இல்லாதது ரசிகர்களுக்குப் பெரும் ஏமாற்றத்தை அளித்துள்ளது.

டாஸ் மற்றும் கேப்டன்கள் பேச்சு

இந்தப் போட்டியில் டாஸ் வென்ற குஜராத் கேப்டன் சுப்மன் கில், முதலில் பந்துவீச்சைத் தேர்வு செய்துள்ளார். கடந்த போட்டியில் பனிப்பொழிவு இருந்ததால், இலக்கைத் துரத்துவது எளிதாக இருக்கும் எனக் கருதி இந்த முடிவை எடுத்துள்ளதாக கில் தெரிவித்தார். குஜராத் அணியில் எந்த மாற்றமும் செய்யப்படவில்லை. மறுபுறம், மும்பை கேப்டன் ஹர்திக் பாண்டியா கூறுகையில், "நாங்களும் முதலில் பந்துவீசவே விரும்பினோம். கடந்த போட்டி எங்களுக்கு ஒரு பாடமாக அமைந்தது. ஒரு அணியாக நாங்கள் மீண்டும் ஒருங்கிணைந்து மும்பை இந்தியன்ஸ் அணியின் அடையாளத்தை நிலைநிறுத்த வேண்டியுள்ளது. ரோஹித் சர்மா இன்றும் விளையாடவில்லை. அவர் திரும்புவதற்கு இன்னும் சில காலம் ஆகும்" எனத் தெரிவித்தார்.

மும்பை அணியில் அதிரடி மாற்றங்கள்

ரோஹித் சர்மா இல்லாத நிலையில், மும்பை அணியில் இன்று 2 இளம் வீரர்கள் அறிமுகமாகிறார்கள். டேனிஷ் மற்றும் கிருஷ் ஆகியோருக்கு அறிமுக வாய்ப்பு வழங்கப்பட்டுள்ளது. இதில் கிருஷ், கடந்த சில நாட்களாக மும்பை அணியின் வலைப்பயிற்சி பந்துவீச்சாளராக இருந்து, தனது அபாரமான திறமையால் இன்று முதன்மை அணியில் இடம்பிடித்துள்ளார். மும்பை அணி புள்ளிப்பட்டியலில் கடைசி இடத்தில் இருப்பதால், இந்த மாற்றங்கள் அவர்களுக்குக் கை கொடுக்குமா என்ற எதிர்பார்ப்பு எழுந்துள்ளது.

ஆடுகளம் எப்படி?

அகமதாபாத் ஆடுகளம் ஒடிசா கருப்பு மண்ணால் ஆனது. இதில் சில விரிசல்கள் காணப்படுவதால், ஆஸ்திரேலியாவின் பெர்த் மைதானத்தைப் போன்ற ஒரு தோற்றத்தைத் தருகிறது. பவுண்டரி எல்லைகள் ஒருபுறம் 70 மீட்டராகவும், மறுபுறம் 64 மீட்டராகவும் உள்ளன. இந்த மைதானத்தில் இதுவரை முதலில் பேட்டிங் செய்த அணிகளே அதிகமுறை (11-ல் 8 முறை) வென்றுள்ளன. இருப்பினும் பனிப்பொழிவு காரணியால் சுப்மன் கில் பந்துவீச்சைத் தேர்வு செய்துள்ளார். 180 முதல் 200 ரன்கள் வரை எடுத்தால் அது சவாலான இலக்காக இருக்கும்.

குஜராத் டைட்டன்ஸ் XI: சுப்மன் கில் (கேப்டன்), பி சாய் சுதர்சன், ஜோஸ் பட்லர் (விக்கெட் கீப்பர்), கிளென் பிலிப்ஸ், வாஷிங்டன் சுந்தர், ஷாரூக் கான், ரஷித் கான், முகமது சிராஜ், ககிசோ ரபாடா, பிரசித் கிருஷ்ணா, அசோக் சர்மா.

குஜராத் டைட்டன்ஸ் இம்பாக்ட் வீரர்கள்: ராகுல் திவேதியா, ஜேசன் ஹோல்டர், அனுஜ் ராவத், குல்வந்த் கெஜ்ரோலியா, மானவ் சுதர்.

மும்பை இந்தியன்ஸ் XI: தனிஷ் மலேவர், குயின்டன் டி காக் (விக்கெட் கீப்பர்), நமன் திர், சூர்யகுமார் யாதவ், ஹர்திக் பாண்டியா (கேப்டன்), திலக் வர்மா, ஷெர்பேன் ரூதர்ஃபோர்ட், மிட்செல் சாண்ட்னர், கிரிஷ் பகத், ஜஸ்பிரித் பும்ரா, அல்லா கசன்ஃபர்.

மும்பை இந்தியன்ஸ் இம்பாக்ட் வீரர்கள்: ராஜ் பாவா, அஸ்வனி குமார், கார்பின் போஷ், மயங்க் ராவத், ரகு சர்மா.