"இதுதான் நிஜம்.. ஏத்துக்கிட்டுதான் ஆகணும்".. கேப்டன் பதவி பறிபோனதும் சதம் விளாசிய ஹர்மன்பிரீத் கவுர்

மும்பை: இந்திய மகளிர் கிரிக்கெட் அணியின் கேப்டன் பதவியிலிருந்து விலகிய சில நாள்களிலேயே, ஜிம்பாப்வே அணிக்கு எதிரான 2-வது ஒருநாள் போட்டியில் அதிரடி சதம் விளாசி ஹர்மன்பிரீத் கவுர் தன்னை நிரூபித்துள்ளார். அவரது அபார ஆட்டத்தால் இந்திய மகளிர் அணி 121 ரன்கள் வித்தியாசத்தில் இமாலய வெற்றி பெற்று ஒருநாள் தொடரைக் கைப்பற்றியது. போட்டிக்குப் பின்னர் மனம் திறந்து பேசிய அவர், கேப்டன்சி விவகாரங்களை ஒதுக்கி வைத்துவிட்டு, ஒரு பேட்டராக களத்தில் இறங்கி ஆடுவதே தற்போது தனக்கு மிகுந்த நிம்மதியையும் மகிழ்ச்சியையும் தருவதாகத் தெரிவித்துள்ளார்.

சர்வதேச ஒருநாள் போட்டிகளில் தனது 8-வது சதத்தைப் பதிவு செய்த ஹர்மன்பிரீத் கவுர், "நான் எப்போதும் எதார்த்தத்தை ஏற்றுக்கொண்டு வாழ விரும்புபவள். இதுதான் தற்போதைய நிஜம்; அதை முழுமையாக ஏற்றுக்கொண்டு பயணத்தைத் தொடர்கிறேன். கிரிக்கெட் எனக்கு எப்போதும் சந்தோஷத்தைக் கொடுக்கும் ஒன்று. பேட்டிங் மட்டுமே என் வாழ்நாள் விருப்பம். எனவே சூழலைப் புரிந்துகொண்டு பொறுப்புடன் பேட்டிங் செய்வதை மட்டுமே இப்போது நான் ரசித்து விளையாட விரும்புகிறேன்" என்றார்.

இந்த சதத்தின் மூலம் 7 சதங்கள் அடித்திருந்த முன்னாள் கேப்டன் மிதாலி ராஜின் சாதனையை முறியடித்து, ஒருநாள் கிரிக்கெட்டில் அதிக சதம் விளாசிய 2-வது இந்திய வீராங்கனையாக ஹர்மன்பிரீத் கவுர் புதிய சாதனை படைத்தார். ஸ்மிருதி மந்தனா 14 சதங்களுடன் முதலிடத்தில் உள்ளார். இந்தப் போட்டிக்கு முந்தைய நாள் இரவு லேசான காய்ச்சலால் அவதிப்பட்ட போதிலும், வலி நிவாரணி மாத்திரைகளை உட்கொண்டு ஹர்மன்பிரீத் சதம் அடித்த தகவல் ரசிகர்களை நெகிழ வைத்துள்ளது.

இந்த ஆட்டத்தில் இந்தியா தொடக்கத்தில் 19 ரன்களுக்கு 2 விக்கெட்டுகளை இழந்து பெரும் சரிவைச் சந்தித்தது. அப்போது களமிறங்கிய ஹர்மன்பிரீத் கவுர் மற்றும் தீப்தி சர்மா ஆகியோரின் சதங்கள் இந்தியாவை 328 ரன்கள் என்ற பிரம்மாண்ட ஸ்கோருக்கு உயர்த்தின. தொடக்க வீராங்கனை பிரதிகா ராவல் 61 ரன்கள் சேர்த்தார்.

"வைபவ் சூர்யவன்ஷிக்கு ஜீரோ போட மனசு வரல அதனால்..".. ஒழுங்கா ஆடாத பையனை வறுத்தெடுத்த அஸ்வின்

தொடர்ந்து பந்துவீசிய இந்திய அணியில் இளம் இடதுகை சுழற்பந்து வீச்சாளர் வைஷ்ணவி சர்மா 4 விக்கெட்டுகளைச் சாய்த்து அசத்தினார். கேப்டன்சி அழுத்தம் குறைந்ததால், ஹர்மன்பிரீத் கவுர் மீண்டும் தனது பழைய பேட்டிங் ஃபார்முக்குத் திரும்பியுள்ளது இந்திய அணிக்கு மிகப்பெரிய உத்வேகத்தைத் தந்துள்ளது.