இந்திய அணிக்கு பின்னடைவு.. ஆப்கானிஸ்தான் தொடரில் முக்கிய வீரர் விலகல்.. பும்ரா நிலவரம் என்ன?

டெல்லி: ஆப்கானிஸ்தான் அணிக்கு எதிரான 3 போட்டிகள் கொண்ட டி20 தொடருக்கு முன்னதாக, இந்திய அணிக்கு பின்னடைவு ஏற்பட்டுள்ளது. இளம் வேகப்பந்து வீச்சாளர் ஹர்ஷித் ரானா இன்னும் முழுமையாகக் குணமடையாததால், அவர் இந்தத் தொடரில் விளையாட வாய்ப்பில்லை என்று தகவல்கள் வெளியாகியுள்ளன.

கடந்த ஜூலை மாதம் இங்கிலாந்துக்கு எதிரான தொடரின் போது ஹர்ஷித் ரானாவுக்கு தொடை தசைநார் பகுதியில் காயம் ஏற்பட்டது. அவர் இன்னும் முழு உடற்தகுதியைப் பெறாததால், ஆப்கானிஸ்தான் தொடர் மட்டுமின்றி வரும் செப்டம்பர் 20 அன்று ஆசிய விளையாட்டுப் போட்டிக்கு புறப்படவுள்ள இந்திய அணியிலும் இடம்பெறுவது சந்தேகம் என்று பிசிசிஐ வட்டாரங்கள் தெரிவிக்கின்றன.

அதே நேரத்தில், இந்திய அணிக்கு ஒரு மிகப்பெரிய ஆறுதல் செய்தியும் கிடைத்துள்ளது. இங்கிலாந்து ஒருநாள் தொடரின் போது முழங்காலில் காயமடைந்த முன்னணி வேகப்பந்து வீச்சாளர் ஜஸ்பிரித் பும்ரா முழு உடற்தகுதி பெற்று மீண்டும் அணிக்குத் திரும்புவது உறுதியாகியுள்ளது. இவருடன் சேர்ந்து தொடைப் பகுதியில் காயமடைந்த ஆல்-ரவுண்டர் நிதிஷ் குமார் ரெட்டியும் உடற்தகுதி பெற்று அணிக்குத் திரும்ப உள்ளார்.

ஆப்கானிஸ்தான் தொடருக்கு அறிவிக்கப்பட்ட 15 வீரர்கள் கொண்ட இந்திய அணியில், 4 வீரர்கள் உடற்தகுதி அனுமதியைப் பெற வேண்டிய கட்டாயத்தில் இருந்தனர். அதில் வாஷிங்டன் சுந்தர் ஏற்கனவே தகுதி பெற்றுவிட்ட நிலையில், தற்போது பும்ரா மற்றும் நிதிஷ் ரெட்டி ஆகியோர் தேர்வாகியுள்ளனர். ஆனால் ஹர்ஷித் ரானாவுக்கு மட்டும் இன்னும் கூடுதல் கால அவகாசம் தேவைப்படுகிறது.

இந்தியா - வங்கதேசம் செமி பைனல்.. 2026 மகளிர் ஆசிய கோப்பை அரையிறுதி எத்தனை மணிக்கு தொடங்கும்?

இந்தியா - ஆப்கானிஸ்தான் டி20 தொடர் செப்டம்பர் 13-ம் தேதி தொடங்கவுள்ளது. ஆப்கானிஸ்தான் தொடர் முடிந்த பிறகு, இந்திய அணி டோக்கியோ சென்று செப்டம்பர் 22 அன்று ஜப்பானுடன் ஒரு போட்டியில் விளையாடுகிறது. பின்னர் செப்டம்பர் 28 அன்று தனது ஆசிய விளையாட்டுப் போட்டிப் பயணத்தைத் தொடங்குகிறது. காயத்தில் இருந்து மீண்டு வரும் வீரர்களை பாதுகாப்பாக கையாள்வதே முக்கியம் என்றும், மனித உடல் ஒரு இயந்திரம் அல்ல என்பதால் குணமடையக் கால அவகாசம் தேவைப்படும் என்றும் திறன் மேம்பாட்டு மையத் தலைவர் விவிஎஸ் லட்சுமண் தெரிவித்துள்ளார்.