மேட்ச்சே ஆடாமல் டாப் 5-ல் ரோஹித், கோலி.. ஐசிசி ODI தரவரிசையில் தெறிக்க விட்ட இந்திய வீரர்கள்

துபாய்: சர்வதேச கிரிக்கெட் கவுன்சில் (ஐசிசி) ஒருநாள் போட்டிகளுக்கான பேட்ஸ்மேன்கள் தரவரிசைப் பட்டியலை வெளியிட்டுள்ளது. இதில், இந்திய பேட்ஸ்மேன்கள் தொடர்ந்து ஆதிக்கம் செலுத்தி வரும் நிலையில், ஒரு சுவாரஸ்யமான விஷயம் ரசிகர்களிடையே ஆச்சரியத்தை ஏற்படுத்தியுள்ளது.

அது, இந்திய அணியின் மூத்த வீரர்களான கேப்டன் ரோஹித் சர்மா மற்றும் விராட் கோலி, நீண்ட காலமாக ஒருநாள் போட்டிகளில் விளையாடாத போதிலும், டாப் 5 இடங்களுக்குள் நீடிப்பதுதான். இந்தியாவின் வருங்கால ஒருநாள் அணி கேப்டன் சுப்மன் கில் தரவரிசையில் முதல் இடத்தில் இடம் பெற்றுள்ளார்.

பாகிஸ்தானின் பாபர் அசாம் மூன்றாவது இடத்திற்குத் தள்ளப்பட்டுள்ளார். ரோஹித் சர்மா 2வது இடத்திலும், கிங் கோலி 4வது இடத்திலும் உள்ளனர். ஒருநாள் போட்டியே ஆடாமல் ரோஹித்தும், கோலியும் எப்படி டாப் 5-ல் நீடிக்கிறார்கள்? குறிப்பாக மூன்றாவது இடத்தில் இருந்த ரோஹித் சர்மா எப்படி இரண்டாவது இடத்துக்கு முன்னேறினார்? என்ற கேள்வி எழுந்துள்ளது. அது எப்படி சாத்தியம்? என்று பார்க்கலாம்.

புதிய ஐசிசி ஒருநாள் தரவரிசை (டாப் 5):

• சுப்மன் கில் (இந்தியா) - 784 புள்ளிகள்
• ரோஹித் சர்மா (இந்தியா) - 756 புள்ளிகள்
• பாபர் அசாம் (பாகிஸ்தான்) - 751 புள்ளிகள்
• விராட் கோலி (இந்தியா) - 736 புள்ளிகள்
• டேரில் மிட்செல் (நியூசிலாந்து) - 720 புள்ளிகள்

பாபர் அசாமின் சரிவு, ரோஹித்தின் முன்னேற்றம்

சமீபத்தில் வெஸ்ட் இண்டீஸ் அணிக்கு எதிரான ஒருநாள் தொடரில் பாகிஸ்தான் வீரர் பாபர் அசாம் மிகவும் சொற்ப ரன்களே எடுத்தார். 3 போட்டிகளில் வெறும் 56 ரன்கள் மட்டுமே எடுத்ததால், அவர் தனது தரவரிசையில் பின்னடைவைச் சந்தித்து 3வது இடத்திற்குத் தள்ளப்பட்டார். இதனால், மூன்றாவது இடத்தில் இருந்த இந்திய கேப்டன் ரோஹித் சர்மா, எந்தப் போட்டியிலும் விளையாடாமலேயே 2வது இடத்திற்கு முன்னேறியுள்ளார்.

போட்டி ஆடாமல் டாப் 5-ல் இருப்பது எப்படி? - ஐசிசி விதிகள் இதுதான்!

ரோஹித் சர்மா மற்றும் விராட் கோலி கடைசியாக மார்ச் 2025-ல் நடந்த சாம்பியன்ஸ் டிராபி தொடரில்தான் ஒருநாள் போட்டியில் விளையாடினர். அதன் பிறகு சுமார் 5 மாதங்களாக அவர்கள் ஒருநாள் போட்டிகளில் களமிறங்கவில்லை. ஆனாலும் டாப் 5-ல் நீடிக்கக் காரணம், ஐசிசியின் தரவரிசைக் கணக்கீட்டு முறைதான்.

புள்ளிகள் உடனே குறையாது: ஐசிசி தரவரிசை என்பது, ஒரு வீரரின் சமீபத்திய ஃபார்மை மட்டும் அடிப்படையாகக் கொண்டது அல்ல. அது ஒரு வீரரின் கடந்த கால மற்றும் நிகழ்கால செயல்பாடுகளை உள்ளடக்கிய ஒரு சிக்கலான கணக்கீட்டு முறையாகும். ஒரு வீரர் போட்டிகளில் விளையாடவில்லை என்றால், அவரது புள்ளிகள் உடனடியாகக் குறைக்கப்படாது.

பழைய சாதனைகளின் பலன்: ஒரு வீரரின் கடந்த 12 மாத கால செயல்பாடு முழுமையான மதிப்பையும், 1 முதல் 3 ஆண்டுகளுக்கு முந்தைய செயல்பாடு பாதி மதிப்பையும் பெறும். அதற்கு முந்தைய சாதனைகள் கணக்கில் எடுத்துக்கொள்ளப்படாது. ரோஹித் மற்றும் கோலி கடந்த சில ஆண்டுகளாக ஒருநாள் போட்டிகளில் மிகச் சிறப்பாகச் செயல்பட்டு, அதிக புள்ளிகளைப் பெற்றுள்ளனர். அந்தப் புள்ளிகளின் தாக்கம் இன்னும் நீடிக்கிறது. கோலி 2013-லேயே முதல் முறையாக நம்பர் 1 இடத்தைப் பிடித்தவர், ரோஹித் 3 இரட்டை சதங்கள் அடித்தவர் என்பது குறிப்பிடத்தக்கது.

சக வீரர்களின் செயல்பாடுகள்: உங்களுக்கு மேலே அல்லது கீழே உள்ள வீரர்கள் எப்படி விளையாடுகிறார்கள் என்பதைப் பொறுத்தும் உங்கள் தரவரிசை மாறும். பாபர் அசாம் மோசமாக விளையாடி புள்ளிகளை இழந்ததால், ரோஹித் சர்மா விளையாடாமலேயே முன்னேறினார்.