பிரசவத்திற்கு பிறகு மீண்டும் கிரிக்கெட்.. ஐசிசி வெளியிட்ட வழிகாட்டி நெறிமுறைக்கு சச்சின் பாராட்டு

மும்பை: கிரிக்கெட் வீராங்கனைகள் பிரசவத்திற்குப் பிறகு மீண்டும் விளையாடத் திரும்புவதற்காக, சர்வதேச கிரிக்கெட் கவுன்சில் (ஐசிசி) அறிமுகப்படுத்தியுள்ள புதிய வழிகாட்டுதல்களை பேட்டிங் ஜாம்பவான் சச்சின் டெண்டுல்கர் பாராட்டியுள்ளார். உலக அளவில் மகளிர் கிரிக்கெட் வளர்ச்சிக்கு இந்த முயற்சி ஒரு மிக முக்கிய படியாகும் என்று அவர் விவரித்துள்ளார்.

குழந்தை பிறப்பிற்கு பிறகு பெண் கிரிக்கெட் வீராங்கனைகள் தங்களது உடல் தகுதியை மீட்டெடுக்கவும், பயிற்சி பெறவும் உதவும் வகையில் 'பிரசவத்திற்குப் பிந்தைய வழிகாட்டுதல்களை' (Return to Play Post-Pregnancy Guidelines) ஐசிசி திங்கட்கிழமை வெளியிட்டது. வீராங்கனைகள் பாதுகாப்பான மற்றும் நிலையான முறையில் மீண்டும் போட்டி கிரிக்கெட்டுக்குத் திரும்புவதற்கு வசதியாக 16 வார கால கட்டமைப்பைக் கொண்ட வழிமுறைகளை இந்த வழிகாட்டுதல்கள் பரிந்துரைக்கின்றன.

இந்த வழிகாட்டுதல் ஆவணத்தின் முக்கிய அம்சமாக, தயார்நிலை (Ready), மதிப்பாய்வு (Review), மீட்டெடுத்தல் (Restore), உடற்தகுதி மேம்பாடு (Recondition), திரும்புதல் (Return) மற்றும் செம்மைப்படுத்துதல் (Refine) ஆகிய ஆறு நிலைகளைக் கொண்ட கோட்பாடுகளின் அடிப்படையிலான மாதிரி உருவாக்கப்பட்டுள்ளது.

15 வயதில் உலகையே திரும்பிப் பார்க்க வைத்த வைபவ் சூர்யவன்ஷி:ஜாம்பவான் கிளைவ் லாயிட் அறிவுரை!

ஐசிசியின் இந்த அறிவிப்புக்கு ஆதரவு தெரிவித்து சச்சின் டெண்டுல்கர் தனது எக்ஸ் (X) பக்கத்தில் ஒரு பதிவை பகிர்ந்துள்ளார்."ஐசிசி (ICC) மிகச்சிறந்த பேட்டிங்கை வெளிப்படுத்தியுள்ளது. விளையாட்டில் ஒரு வீராங்கனையின் பயணத்தின் அனைத்து கட்டங்களிலும், அவர்களுக்கு சரியான கட்டமைப்புடன் கூடிய ஆதரவு வழங்கப்படுவதை உறுதி செய்வதே உண்மையான அதிகாரமளித்தல் ஆகும்.

'ஏதாவது ஒன்றை மட்டும் தேர்ந்தெடுப்பது' என்ற நிலையில் இருந்து 'இரண்டையும் செய்வது' என்ற நிலைக்கு நாம் மாறியிருப்பது, நாம் விளையாட்டை சரியான பாதையில் கொண்டு செல்கிறோம் என்பதற்கான சான்றாகும்" என்று டெண்டுல்கர் எழுதியுள்ளார். "உலகெங்கிலும் உள்ள பெண் கிரிக்கெட் வீராங்கனைகளின் எதிர்காலத்திற்கு இது ஒரு மிகப்பெரிய உந்துசக்தியாக அமையும்" என்றும் அவர் மேலும் குறிப்பிட்டுள்ளார்.

பிரசவத்திற்குப் பிறகு வீராங்கனைகள் மீண்டும் சர்வதேச தரத்திலான கிரிக்கெட்டுக்குத் திரும்புவதைக் கண்காணிக்க ஒரு பிரத்யேக 'கேஸ் மேனேஜரை' (Case Manager) நியமிக்கவும் இந்த வழிகாட்டுதல்கள் பரிந்துரைக்கின்றன. இந்த பொறுப்பிற்கு ஒரு தகுதிவாய்ந்த மருத்துவர் அல்லது உடற்பயிற்சி நிபுணர் (Physiotherapist) நியமிக்கப்பட வேண்டும் என்று அந்த ஆவணம் கூறுகிறது.

தொடக்ககட்ட ஆய்வு நிலையில், வீராங்கனைகள் தாய்மைக்கு ஏற்ப தங்களை மாற்றிக்கொள்ள உதவுவதற்காக உளவியல் ரீதியான ஆதரவிற்கு அதிக முக்கியத்துவம் அளிக்கப்பட்டுள்ளது. இதனைத் தொடர்ந்து, உடல்திறனை மேம்படுத்தும் பயிற்சிகள் படிப்படியாக அறிமுகப்படுத்தப்படும். எட்டு வார கால மதிப்பீடுகள் மற்றும் தீவிர கண்காணிப்புக்குப் பிறகு, உடற்பயிற்சி நிபுணர்கள் மற்றும் மருத்துவர்களின் மேற்பார்வையில் வீராங்கனைகள் மீண்டும் ஓட்டப் பயிற்சியைத் தொடங்கலாம்.

போட்டி கிரிக்கெட்டுக்குத் திரும்புவதற்கான அனுமதி வழங்கப்படுவதற்கு முன்பு, தசைக்கூட்டு சார்ந்த பிரச்சனைகள் (musculoskeletal concerns) மற்றும் இடுப்புத் தள தசை தொடர்பான பிரச்சனைகள் (pelvic floor-related issues) போன்ற அனைத்து விதமான அறிகுறிகளையும் விரிவாகக் கண்காணிப்பது அவசியமாகும்.

ICC தரவரிசையில் அதிரடி மாற்றம்! 2-வது இடத்திற்கு முன்னேறிய கில்.. முதலிடத்தை பகிர்ந்த நியூசி. வீரர்

உள்ளூர் சட்டத் தேவைகளுக்கு ஏற்ப, நடைமுறை, உடல் மற்றும் உளவியல் ரீதியான ஆதரவு நடவடிக்கைகளின் மூலம் வீராங்கனைகளின் நல்வாழ்வுக்கு முன்னுரிமை அளிக்கும் வகையில் இந்த கட்டமைப்பு உருவாக்கப்பட்டுள்ளதாக ஐசிசி தெரிவித்துள்ளது.