IND vs AUS: ரோஹித் சர்மா சொன்னதும் விக்கெட்.. கேப்டன் கில் பேச்சை மதிக்காத ஹர்ஷித்.. என்ன நடந்தது?

சிட்னி: தனது தேர்வு குறித்து எழுந்த விமர்சனங்களுக்கு, சிட்னி ஒருநாள் போட்டியில் 39 ரன்களுக்கு 4 விக்கெட்டுகளை வீழ்த்தி, இந்திய வேகப்பந்து வீச்சாளர் ஹர்ஷித் ராணா ஆழமான முறையில் முற்றுப்புள்ளி வைத்தார். இந்தப் போட்டியில் தனது சிறப்பான ஆட்டத்தால் இந்திய அணியின் வெற்றிக்கு முக்கியப் பங்காற்றிய அவர், போட்டிக்குப் பிறகு கேப்டன் சுப்மன் கில் பேச்சை கேட்காமல் ரோஹித் சர்மா சொன்ன யோசனையை செயல்படுத்தியதை பற்றி பகிர்ந்து கொண்டுள்ளார்.

ஆஸ்திரேலிய ஒருநாள் தொடருக்கான இந்திய அணியில் ஹர்ஷித் ராணா பெயர் இடம்பெற்றது முதலே, அவர் விமர்சகர்களின் தொடர் இலக்காக இருந்து வந்தார். ஆனால், சிட்னியில் பந்திலும், பேட்டிலும் சிறப்பாகச் செயல்பட்டு, அனைத்து எதிர்மறைப் பேச்சுகளுக்கும் அவர் பதிலடி கொடுத்தார்.

இந்தப் போட்டிக்குப் பிறகு, இந்தப் போட்டியில் நீங்கள் வீழ்த்திய விக்கெட்டுகளில் மிகவும் முக்கியமானது எது என்று அவரிடம் கேட்கப்பட்டது. அதற்குப் பதிலளித்த ராணா, அந்த சுவாரஸ்யமான நிகழ்வை விவரித்தார்.

ரோஹித்தின் அனுபவம்; கில்லுக்குப் பாடம்?

ஹர்ஷித் ராணா கூறுகையில், "மிட்செல் ஓவனின் விக்கெட்தான். ஏனென்றால், நான் உங்களுக்கு ஒரு கதை சொல்கிறேன். அப்போது கேப்டன் சுப்மன் கில் என்னிடம் வந்து, 'ஸ்லிப் ஃபீல்டர் வேண்டுமா?' என்று கேட்டார். நான், 'இல்லை, எனக்கு ஸ்லிப் தேவையில்லை' என்று சொன்னேன். அப்போது, கவர் திசையில் நின்று கொண்டிருந்த ரோஹித் அண்ணா, 'ஏய், ஸ்லிப் ஃபீல்டர் வை, நான் அங்கே போகிறேன்' என்று சொன்னார். 'சரி அண்ணா, நீங்களே போங்க' என்று நினைத்துக்கொண்டேன். அடுத்த பந்திலேயே எனக்கு விக்கெட் கிடைத்தது. உடனே நான், 'ரொம்ப நன்றி அண்ணா' என்று அவரிடம் சொன்னேன்" என்றார்.

இதைக் கேட்ட வர்ணனையாளர் சிரித்துக்கொண்டே, "அந்த விக்கெட்டுக்குப் பிறகு, சுப்மன் கில் உங்களைப் பார்த்துக் கையசைத்து, 'நான் அப்போதே சொன்னேன் ஸ்லிப் வை, ஸ்லிப் வை என்று' என்பது போல சைகை செய்ததை நான் பார்த்தேன்" என்றார்.

களத்தில் செய்யப்பட்ட இந்த மாற்றம், அடுத்த பந்திலேயே அற்புதமான பலனைக் கொடுத்தது. புதிய கேப்டன் சுப்மன் கில்லின் உத்திகளை ஹர்ஷித் ராணா முழுமையாக ஏற்றுக்கொள்ள இன்னும் நேரம் எடுக்கும் நிலையில், முன்னாள் கேப்டன் ரோஹித் சர்மா களத்தில் என்ன சொல்கிறாரோ, அதன் மீது அவர் முழு நம்பிக்கை வைத்திருக்கிறார் என்பது தெளிவாகத் தெரிகிறது.

தாக்குதல் ஆட்டம் என் திட்டமல்ல!

தனது பந்துவீச்சுத் திட்டம் குறித்துப் பேசிய ஹர்ஷித் ராணா, "இன்று எனது பந்துவீச்சு ரிதம் மிகவும் சிறப்பாக இருந்தது. ஆரம்பத்தில், நான் தாக்குதல் ஆட்டம் ஆட முயற்சிக்கவில்லை; சரியான லைன் மற்றும் லெந்த்தில், சரியான பகுதிகளில் பந்துவீசவே முயற்சித்தேன். புதிய பந்தில் எனக்கு ஆரம்பத்தில் விக்கெட்டுகள் கிடைக்கவில்லை, ஆனால் அது என் திட்டத்தின் ஒரு பகுதிதான். லைன் மற்றும் லெந்த்தில் கவனம் செலுத்தினேன், அது பலனளித்தது" என்றார்.

இந்தப் போட்டியில், ஆஸ்திரேலிய அணியின் அலெக்ஸ் கேரி, கூப்பர் கொன்னோலி, மிட்செல் ஓவன் மற்றும் ஜோஷ் ஹேசில்வுட் ஆகியோரின் விக்கெட்டுகளை ஹர்ஷித் ராணா கைப்பற்றினார். இதன் மூலம் தன் மீதான விமர்சனங்களுக்கு பதிலடி கொடுத்துள்ளார் ஹர்ஷித் ராணா.