செஞ்சுரி அடித்தும் ரோஹித், கோலியை மறைமுகமாக தாக்குவது நியாயமா? கம்பீர் பேச்சால் ரசிகர்கள் ஆவேசம்

சிட்னி: ஆஸ்திரேலியாவுக்கு எதிரான ஒருநாள் தொடரை இந்திய அணி இழந்த நிலையில், கடைசிப் போட்டியில் ரோஹித் சர்மா மற்றும் விராட் கோலியின் சிறப்பான ஆட்டத்தைக் கொண்டாடுவதில் அர்த்தமில்லை என்று இந்திய அணியின் தலைமைப் பயிற்சியாளர் கௌதம் கம்பீர் கூறியிருப்பது கிரிக்கெட் வட்டாரத்தில் பெரும் சலசலப்பை ஏற்படுத்தியுள்ளது. கம்பீரின் இந்தக் கருத்து, கோலி மற்றும் ரோஹித்தின் ரசிகர்களிடையே கடும் கோபத்தை உருவாக்கியுள்ளது.

சமீபத்தில் ஆஸ்திரேலியாவில் சுற்றுப்பயணம் மேற்கொண்ட இந்திய அணி, மூன்று போட்டிகள் கொண்ட ஒருநாள் தொடர் மற்றும் ஐந்து போட்டிகள் கொண்ட டி20 தொடரில் பங்கேற்றது. சுப்மன் கில் தலைமையில் களமிறங்கிய இந்திய அணி, ஒருநாள் தொடரை 1-2 என்ற கணக்கில் ஆஸ்திரேலியாவிடம் இழந்தது. அதே சமயம், டி20 தொடரை 2-1 என்ற கணக்கில் கைப்பற்றி ஆறுதல் அடைந்தது.

ஒருநாள் தொடரில் நடந்தது என்ன?

ஐபிஎல் தொடருக்குப் பிறகு ஓய்வில் இருந்த சீனியர் வீரர்களான ரோஹித் சர்மா மற்றும் விராட் கோலி, இந்த ஒருநாள் தொடரின் மூலம் மீண்டும் சர்வதேச கிரிக்கெட்டுக்குத் திரும்பினர். முதல் ஒருநாள் போட்டியில், விராட் கோலி டக் அவுட் ஆக, ரோஹித் சர்மாவும் 8 ரன்களில் ஆட்டமிழந்தார். இந்தப் போட்டியில் இந்தியா தோல்வியடைந்தது. இரண்டாவது போட்டியிலும் கோலி டக் அவுட் ஆனார், இருப்பினும் ரோஹித் 73 ரன்கள் குவித்தார். ஆனால், இந்தப் போட்டியிலும் இந்தியா நூலிழையில் வெற்றியைத் தவறவிட்டது.

இதனால், முதல் இரண்டு போட்டிகளிலும் தோல்வியடைந்து தொடரை இழந்த நிலையில், சிட்னியில் நடைபெற்ற மூன்றாவது மற்றும் கடைசி ஒருநாள் போட்டியில் இந்திய அணி ஆறுதல் வெற்றியை எதிர்நோக்கிக் களமிறங்கியது. இந்தப் போட்டியில், ரோஹித் சர்மா தனது 50வது சர்வதேச சதத்தை விளாசி 121 ரன்கள் குவித்து ஆட்டமிழக்காமல் இருந்தார்.

அவருடன் ஜோடி சேர்ந்த விராட் கோலி, முதல் இரண்டு போட்டிகளில் ஏமாற்றம் அளித்திருந்தாலும், இந்தப் போட்டியில் அபாரமாக விளையாடி ஆட்டமிழக்காமல் 74 ரன்கள் குவித்தார். இந்த ஜோடியின் பிரிக்க முடியாத 168 ரன்கள் பார்ட்னர்ஷிப்பால், இந்திய அணி 9 விக்கெட் வித்தியாசத்தில் அபார வெற்றி பெற்றது.

கம்பீரின் சர்ச்சை கருத்து

தொடரை இழந்தாலும், கடைசிப் போட்டியில் ரோஹித் மற்றும் கோலியின் ஆட்டத்தை ரசிகர்கள் சமூக வலைதளங்களில் பெரிதும் கொண்டாடினர். இந்தச் சூழலில்தான், பிசிசிஐ வெளியிட்ட ஒரு காணொளியில் பயிற்சியாளர் கௌதம் கம்பீர் பேசியிருப்பது சர்ச்சையைக் கிளப்பியுள்ளது.

அதில் அவர், "தனிப்பட்ட வீரர்களின் சிறப்பான ஆட்டத்தைக் கண்டு நான் மகிழ்ச்சி அடையலாம். ஆனால், ஒருநாள் தொடரை நாம் இழந்துவிட்டோம் என்பதுதான் நிதர்சனம். ஒரு பயிற்சியாளராக, ஒரு தொடர் தோல்வியை என்னால் ஒருபோதும் கொண்டாட முடியாது," என்று திட்டவட்டமாகத் தெரிவித்தார்.

மேலும் அவர், "ஒரு வீரராக, தனிப்பட்ட ஆட்டங்களைப் பாராட்டலாம். ஆனால் ஒரு பயிற்சியாளராக, ஒரு தேசமாக நாம் ஒருபோதும் தொடர் தோல்வியைக் கொண்டாடக் கூடாது என்பது எனது தார்மீகப் பொறுப்பு. ஏனெனில், நாம் நாட்டுக்காக விளையாடுகிறோம்," என்றும் அவர் குறிப்பிட்டார். கம்பீர் நேரடியாக யாருடைய பெயரையும் குறிப்பிடவில்லை என்றாலும், அவரது பேச்சு ரோஹித் மற்றும் கோலியின் ஆட்டத்தைக் கொண்டாடிய ரசிகர்களைச் சாடுவது போல இருப்பதாகக் கருதப்படுகிறது.

ரசிகர்கள் கொந்தளிப்பு

கம்பீரின் இந்தக் கருத்து, ரோஹித் சர்மா மற்றும் விராட் கோலியின் ரசிகர்களைக் கொந்தளிக்க வைத்துள்ளது. "தொடரை இழந்தது ஒட்டுமொத்த அணியின் தவறு. ஆனால், கடைசிப் போட்டியில் சிறப்பாக ஆடிய வீரர்களைப் பாராட்ட மனம் இல்லாமல், அவர்களை மறைமுகமாகத் தாக்குவது எந்த விதத்தில் நியாயம்?" என்று ரசிகர்கள் சமூக வலைதளங்களில் கேள்வி எழுப்பி வருகின்றனர்.

சிலர், "கம்பீரின் கருத்து சரியானதுதான். அணிக்காக விளையாடும்போது, தொடரின் வெற்றிதான் முக்கியம். தனிப்பட்ட சாதனைகள் இரண்டாம் பட்சம்தான்" என்றும் அவருக்கு ஆதரவாகக் கருத்து தெரிவித்து வருகின்றனர். இருப்பினும், பெரும்பாலான ரசிகர்கள் கம்பீரின் பேச்சுக்கு எதிராகவே தங்களது கருத்துக்களைப் பதிவு செய்து வருகின்றனர். இது, இந்திய கிரிக்கெட் அணியின் உள்சூழல் குறித்த விவாதங்களை மீண்டும் ஒருமுறை தூண்டியுள்ளது.