IND vs ENG: 500 விக்கெட்டுகளை வீழ்த்தி வரலாற்று சாதனை.. ஜாம்பவான்கள் பட்டியலில் இணைந்த பும்ரா

மும்பை: இங்கிலாந்து அணிக்கு எதிரான டி20 உலகக்கோப்பை அரையிறுதிப் போட்டியில், இந்திய அணியின் முன்னணி வேகப்பந்து வீச்சாளர் ஜஸ்பிரித் பும்ரா சர்வதேச கிரிக்கெட்டில் தனது 500வது விக்கெட்டை வீழ்த்தி புதிய மைல்கல்லை எட்டியுள்ளார். இங்கிலாந்து அணிக்கு எதிரான இந்த முக்கியமான நாக் அவுட் போட்டியில் அவர் இந்தச் சாதனையைப் பதிவு செய்துள்ளார்.

முதல் பந்திலேயே அவுட்

இந்த அரையிறுதிப் போட்டியில் இந்திய அணி நிர்ணயித்த 254 ரன்கள் என்ற இலக்கை நோக்கி இங்கிலாந்து அணி பேட்டிங் செய்து வரும் நிலையில், ஆட்டத்தின் ஐந்தாவது ஓவரை வீச ஜஸ்பிரித் பும்ரா அழைக்கப்பட்டார். அந்த ஓவரின் முதல் பந்திலேயே இங்கிலாந்து அணியின் கேப்டன் ஹாரி புரூக்கை அவர் வீழ்த்தினார். பும்ராவின் பந்துவீச்சில் சிக்ஸர் அடிக்க முயன்ற ஹாரி புரூக் 7 ரன்களில் அக்சர் பட்டேலிடம் கேட்ச் கொடுத்து ஆட்டமிழந்தார். இந்த முக்கிய விக்கெட்டின் மூலம் பும்ரா சர்வதேச கிரிக்கெட்டில் 500 விக்கெட்டுகள் என்ற இலக்கை வெற்றிகரமாக அடைந்தார்.

8வது இந்தியர்

சர்வதேச கிரிக்கெட்டில் இந்திய அணிக்காக 500 விக்கெட்டுகளை வீழ்த்திய எட்டாவது வீரர் என்ற பெருமையை பும்ரா தற்போது பெற்றுள்ளார். இந்தப் பட்டியலில் சுழற்பந்து வீச்சாளர் அனில் கும்ப்ளே 953 விக்கெட்டுகளுடன் முதலிடத்தில் உள்ளார். அவருக்கு அடுத்தபடியாக ரவிச்சந்திரன் அஸ்வின் 765 விக்கெட்டுகளையும், ஹர்பஜன் சிங் 707 விக்கெட்டுகளையும், முன்னாள் கேப்டன் கபில் தேவ் 687 விக்கெட்டுகளையும் வீழ்த்தியுள்ளனர்.

மேலும், ரவீந்திர ஜடேஜா 634 விக்கெட்டுகளுடனும், ஜாகீர் கான் 597 விக்கெட்டுகளுடனும், ஜவகல் ஸ்ரீநாத் 551 விக்கெட்டுகளுடனும் இந்தப் பட்டியலில் இடம்பெற்றுள்ளனர். இந்திய கிரிக்கெட்டின் இந்தச் சிறந்த பந்துவீச்சாளர்களின் வரிசையில் தற்போது 32 வயதான பும்ராவும் இணைந்துள்ளார்.

மூன்று வடிவ கிரிக்கெட்டிலும் பங்களிப்பு

கடந்த 2016 ஆம் ஆண்டு ஜனவரி மாதம் சிட்னியில் நடைபெற்ற ஆஸ்திரேலியாவுக்கு எதிரான ஒருநாள் போட்டியில் பும்ரா தனது சர்வதேச அறிமுகத்தைப் பெற்றார். தனது 10 ஆண்டுகால கிரிக்கெட் பயணத்தில் இதுவரை 235 சர்வதேச போட்டிகளில் விளையாடியுள்ள அவர் 500 விக்கெட்டுகளைக் கைப்பற்றியுள்ளார். இதில் 52 டெஸ்ட் போட்டிகளில் விளையாடி 234 விக்கெட்டுகளையும், 89 ஒருநாள் போட்டிகளில் விளையாடி 149 விக்கெட்டுகளையும், 94 சர்வதேச டி20 போட்டிகளில் விளையாடி 117 விக்கெட்டுகளையும் அவர் வீழ்த்தியுள்ளார்.

சூர்யகுமார் யாதவ் தலைமையிலான இந்திய அணியில், இந்த 2026 டி20 உலகக் கோப்பை தொடர் முழுவதும் பும்ரா மிகச் சிறப்பாகப் பந்துவீசி வருகிறார். இதுவரை விளையாடியுள்ள ஏழு போட்டிகளில் அவர் 10 விக்கெட்டுகளைக் கைப்பற்றியுள்ளார். சூப்பர் 8 சுற்றில் தென்னாப்பிரிக்கா மற்றும் வெஸ்ட் இண்டீஸ் அணியிகளுக்கு எதிரான போட்டிகளில் அதிக விக்கெட்டுகளை வீழ்த்திய இந்திய பந்துவீச்சாளராகவும் அவர் திகழ்ந்தார்.

முன்னதாக கொழும்பில் நடைபெற்ற பாகிஸ்தான் அணிக்கு எதிரான லீக் போட்டியிலும் தனது முதல் ஓவரிலேயே சயிம் அயூப் மற்றும் சல்மான் அலி ஆகா ஆகியோரின் விக்கெட்டுகளை வீழ்த்தி இந்திய அணியின் வெற்றிக்கு அவர் முக்கியப் பங்காற்றியது குறிப்பிடத்தக்கது.