IND vs NZ: புவனேஸ்வர், மயங்க் யாதவ், நிதிஷ் குமாரை பிளேயிங் 11-இல் சேர்த்த ஸ்ரேயாஸ்.. வைபவ் இல்லை!

கிறைஸ்ட்சர்ச்: இந்தியா மற்றும் நியூசிலாந்து அணிகளுக்கு இடையிலான 5 போட்டிகள் கொண்ட சர்வதேச டி20 கிரிக்கெட் தொடரின் முதல் ஆட்டம் கிறைஸ்ட்சர்ச்சில் உள்ள ஹாக்லி ஓவல் மைதானத்தில் தொடங்கியது. இந்தப் போட்டியில் டாஸ் வென்ற இந்திய அணியின் கேப்டன் ஸ்ரேயாஸ் ஐயர் சற்றும் தயங்காமல் முதலில் பந்துவீசுவதாக அறிவித்தார். புதிய ஆடுகளத்தில் நிலவும் வேகத்தையும் பவுன்ஸையும் சாதகமாகப் பயன்படுத்தி ஆரம்பத்திலேயே விக்கெட்டுகளைச் சாய்க்கும் திட்டத்துடன் இந்தியா களமிறங்கியது.

இந்திய அணியின் ஆடும் லெவனில் சில அதிரடி மாற்றங்கள் செய்யப்பட்டுள்ளன. ஆல்ரவுண்டர் நிதிஷ் குமார் ரெட்டி மற்றும் அதிவேகத்தில் வீசக்கூடிய மயங்க் யாதவ் ஆகியோர் ஆடும் லெவனுக்குள் கொண்டுவரப்பட்டுள்ளனர். சுமார் 4 ஆண்டுகளுக்குப் பிறகு சர்வதேச டி20 போட்டிக்குத் திரும்பியுள்ள ஸ்விங் மன்னன் புவனேஸ்வர் குமார், அர்ஷ்தீப் சிங் மற்றும் மயங்க் யாதவுடன் இணைந்து வேகப்பந்து வீச்சுக்கு தலைமை தாங்குகிறார். எதிர்பார்க்கப்பட்ட இளம் வீரர் வைபவ் சூர்யவன்ஷி மற்றும் சுழற்பந்து வீச்சாளர் குல்தீப் யாதவ் ஆகியோருக்கு ஆடும் லெவனில் வாய்ப்பு கிடைக்கவில்லை. அதே போல அதிகம் எதிர்பார்க்கப்பட்ட வைபவ் சூர்யவன்ஷிக்கும் அணியில் இடம் அளிக்கப்படவில்லை.

டாஸ் வென்ற பிறகு பேசிய கேப்டன் ஸ்ரேயாஸ் ஐயர், "பயணக் களைப்பு இருந்தாலும் வீரர்கள் உற்சாகமாக உள்ளனர். புதிய ஆடுகளம் தொடக்கத்தில் பந்துவீச்சுக்கு உதவும் என்பதால் முதலில் பந்துவீசுகிறோம். பேட்டிங்கில் தொடக்க வீரர்கள் நல்ல ஃபார்மில் உள்ளனர். மயங்க் யாதவ் மற்றும் நிதிஷ் ரெட்டி அணிக்குள் வந்துள்ளனர்" என்றார். நியூசிலாந்து கேப்டன் மிட்செல் சான்ட்னர் பேசுகையில், தாங்களும் டாஸ் வென்றிருந்தால் பந்துவீச்சையே தேர்வு செய்திருப்போம் என்றும், இந்தியாவுக்கு எதிராக ஆடுவது எப்போதும் உற்சாகமானது என்றும் கூறினார்.

கிறைஸ்ட்சர்ச் ஹாக்லி ஓவல் மைதானத்தில் இந்திய அணி விளையாடும் முதல் சர்வதேச டி20 போட்டி இதுவாகும். ஒட்டுமொத்த டி20 வரலாற்றில் இரு அணிகளும் மோதிய ஆட்டங்களில் இந்தியா 19-11 என்ற கணக்கிலும், நியூசிலாந்து மண்ணில் 7-4 என்ற கணக்கிலும் அதிக வெற்றிகளை பெற்று உள்ளது.

"டெஸ்ட் மேட்சுக்கு காசு வாங்காதீங்க".. காத்து வாங்கும் மைதானங்களை பார்த்து பீட்டர்சன் ஆதங்கம்

இந்திய ஆடும் லெவன்: சஞ்சு சாம்சன், அபிஷேக் சர்மா, இஷான் கிஷன், ஸ்ரேயாஸ் ஐயர், திலக் வர்மா, நிதிஷ் குமார் ரெட்டி, நமன் திர், அக்சர் படேல், புவனேஸ்வர் குமார், அர்ஷ்தீப் சிங், மயங்க் யாதவ்.