IND vs NZ: சச்சின் சாதனையை காலி செய்த "கிங்" கோலி.. ஒரே பவுண்டரியில் வரலாறு படைத்த தருணம்

ராஜ்கோட்: கிரிக்கெட் உலகின் ஜாம்பவான் சச்சின் டெண்டுல்கர் படைத்திருந்த நீண்ட கால சாதனையை, விராட் கோலி தகர்த்தெறிந்துள்ளார். ராஜ்கோட்டில் நடைபெற்ற நியூசிலாந்துக்கு எதிரான 2-வது ஒருநாள் போட்டியில், களமிறங்கிய முதல் பந்திலேயே பவுண்டரி விளாசி புதிய சரித்திரத்தை எழுதியுள்ளார் கோலி. இதன் மூலம், ஒருநாள் போட்டிகளில் நியூசிலாந்து அணிக்கு எதிராக அதிக ரன்கள் குவித்த இந்திய வீரர் என்ற பெருமையை விராட் கோலி பெற்றார்.

ராஜ்கோட் போட்டி தொடங்குவதற்கு முன்பு, நியூசிலாந்துக்கு எதிராக சச்சின் டெண்டுல்கர் எடுத்திருந்த ரன்களை முந்த விராட் கோலிக்கு வெறும் 1 ரன் மட்டுமே தேவைப்பட்டது. இந்த போட்டியில் ரோஹித் சர்மா ஆட்டமிழந்த உடன் களமிறங்கிய கோலி, நியூசிலாந்து வேகப்பந்து வீச்சாளர் கிறிஸ்டியன் கிளார்க் வீசிய முதல் பந்தையே லாவகமாக பவுண்டரிக்கு விரட்டினார். அந்த நொடியே சச்சினின் சாதனை முறியடிக்கப்பட்டது.

சச்சின் vs கோலி:

சச்சின் டெண்டுல்கர்: தனது 24 ஆண்டுகால கிரிக்கெட் வாழ்க்கையில் நியூசிலாந்துக்கு எதிராக 42 ஒருநாள் போட்டிகளில் விளையாடி 1750 ரன்களை குவித்திருந்தார்.

விராட் கோலி: ஆனால் விராட் கோலி, தனது 35-வது போட்டியிலேயே இந்த சாதனையை முறியடித்து, தற்போது 1754 ரன்களுடன் முதலிடத்தில் உள்ளார். சச்சினை விட மிகக் குறைவான இன்னிங்ஸ்களில் கோலி இந்த மைல்கல்லை எட்டியுள்ளார்.

நியூசிலாந்துக்கு எதிராக அதிக ரன்கள் குவித்த முதல் 5 இந்திய வீரர்கள்:

விராட் கோலி - 1754* ரன்கள் (35 போட்டிகள்)
சச்சின் டெண்டுல்கர் - 1750 ரன்கள் (42 போட்டிகள்)
வீரேந்திர சேவாக் - 1157 ரன்கள் (23 போட்டிகள்)
ரோஹித் சர்மா - 1123 ரன்கள் (33 போட்டிகள்)
முகமது அசாருதீன் - 1118 ரன்கள் (40 போட்டிகள்)

உலக அளவில் ரிக்கி பாண்டிங் முதலிடம்:

இந்திய அளவில் கோலி முதலிடம் பிடித்தாலும், உலக அளவில் நியூசிலாந்துக்கு எதிராக ஒருநாள் போட்டிகளில் அதிக ரன் குவித்தவர் என்ற சாதனை ஆஸ்திரேலியாவின் முன்னாள் கேப்டன் ரிக்கி பாண்டிங் வசமே உள்ளது. அவர் 51 போட்டிகளில் 1971 ரன்கள் குவித்துள்ளார். அவரை முந்த கோலிக்கு இன்னும் 217 ரன்கள் தேவைப்படுகிறது.

வரலாற்றுச் சாதனை படைத்த கையோடு பெரிய ஸ்கோர் அடிப்பார் என்று எதிர்பார்க்கப்பட்ட நிலையில், இந்தப் போட்டியில் விராட் கோலி ரசிகர்களுக்குச் சற்று ஏமாற்றமே அளித்தார். அவர் 29 பந்துகளைச் சந்தித்து 23 ரன்கள் மட்டுமே எடுத்து ஆட்டமிழந்தார். இருப்பினும், அவர் படைத்த இந்த சாதனை இந்திய கிரிக்கெட் வரலாற்றில் முக்கிய இடத்தைப் பிடித்துள்ளது.