IND vs NZ: "இந்திய அணியால் NZ தொடரை முழுசா வெல்ல முடியாது.. 2-2 தான்".. புஜாரா அதிரடி கணிப்பு

மும்பை: சர்வதேச ஒருநாள் கிரிக்கெட் தரவரிசையில் நம்பர் 1 இடத்தில் இருக்கும் இந்திய அணியும், நம்பர் 2 இடத்தில் இருக்கும் நியூசிலாந்து அணியும் மோதும் 5 போட்டிகள் கொண்ட ஒருநாள் தொடர் வரும் நவம்பர் 4 அன்று தொடங்குகிறது. இந்நிலையில், இந்த முக்கிய தொடர் 2-2 என்ற கணக்கில் சமனில் மட்டுமே முடியும் என்று முன்னாள் வீரர் சேதேஷ்வர் புஜாரா தனது கணிப்பை வெளியிட்டுள்ளார்.

இந்தத் தொடருக்காக பிசிசிஐ வீரர்களின் பணிச்சுமை மற்றும் டெஸ்ட் தொடருக்கான தயார்படுத்துதலைக் கருத்தில் கொண்டு மாறுபட்ட அணிகளை அறிவித்துள்ளது. கேப்டன் சுப்மன் கில், கேஎல் ராகுல் ஆகியோர் முதல் 3 போட்டிகளுக்கு மட்டுமே விளையாடுவர். நிதிஷ் குமார் ரெட்டி முதல் போட்டிக்கு மட்டுமே இருப்பார். கடைசி 2 போட்டிகளில் ஸ்ரேயாஸ் ஐயர் கேப்டனாக செயல்படுவார்.

இது தொடர்பாக தொலைக்காட்சி நேர்காணலில் பேசிய புஜாரா, "இந்தத் தொடர் 2-2 என்ற கணக்கில்தான் முடியும் என நினைக்கிறேன். முதல் 3 போட்டிகளில் ஒரு இந்திய அணி விளையாடுகிறது. கடைசி 2 போட்டிகளில் முற்றிலும் மாறுபட்ட மற்றொரு இந்திய அணி விளையாட உள்ளது. 5 போட்டிகளிலுமே ஒரே அணியாக இந்தியா விளையாடாததால், இது நியூசிலாந்து அணிக்கு சற்று சாதகமாக அமையும்" என்றார்.

தொடர்ந்து பேசிய அவர், "முதல் 3 போட்டிகளில் முன்னணி வீரர்கள் களமிறங்குவதால் இந்திய அணி வெற்றி பெற அதிக வாய்ப்புள்ளது. ஆனால் கடைசி 2 போட்டிகள் இந்தியாவுக்கு சவாலாக இருக்கும். மேலும் நியூசிலாந்தில் அடிக்கடி மழை பெய்வது வழக்கம் என்பதால், நிச்சயம் ஒரு போட்டி மழையால் கைவிடப்பட வாய்ப்புள்ளது. இதனால் தொடர் 2-2 என சமனில் முடியவே அதிக வாய்ப்பு உள்ளது" என்று கூறினார்.

“ஸ்ரேயாஸ் திணறித் திணறி ஆடிவிட்டு கடைசியா 2 பவுண்டரிகளை..”.. முன்னாள் வீரர் அம்பதி ராயுடு பதிலடி

நியூசிலாந்து மண்ணில் இந்தியா இதுவரை விளையாடியுள்ள 10 இருதரப்பு ஒருநாள் தொடர்களில் வெறும் 2 முறை மட்டுமே கோப்பையை வென்றுள்ளது. 6 முறை தொடரை இழந்துள்ள இந்திய அணி, 2 தொடர்களை சமன் செய்துள்ளது. இத்தகைய வரலாற்றுப் பின்னணியில், இந்திய அணியின் ஆடும் லெவன் மாற்றங்களைச் சுட்டிக்காட்டி புஜாரா கூறியுள்ள கருத்து முக்கியத்துவம் பெற்றுள்ளது.