IND vs NZ: இந்தியாவுக்கு எதிராக வாய் சவடால் விட்டு அசிங்கப்பட்ட நியூசிலாந்து கேப்டன் சான்ட்னர்

அகமதாபாத்: 2026 டி20 உலகக் கோப்பை கிரிக்கெட் தொடரின் இறுதிப் போட்டியில், நியூசிலாந்து அணியை 96 ரன்கள் வித்தியாசத்தில் வீழ்த்தி இந்திய அணி அபார வெற்றி பெற்றுள்ளது. இதன் மூலம் இந்திய அணி மூன்றாவது முறையாக டி20 உலகக் கோப்பையை வென்று வரலாற்றுச் சாதனை படைத்துள்ளது. இறுதிப் போட்டிக்கு முன்னதாக நியூசிலாந்து கேப்டன் மிட்செல் சாண்ட்னர் பேசிய பேச்சு தற்போது அவருக்கு எதிராகவே திரும்பியுள்ளது.

சாண்ட்னரின் சவால்

இந்த இறுதிப் போட்டிக்கு முன்னதாக செய்தியாளர்களைச் சந்தித்த நியூசிலாந்து கேப்டன் மிட்செல் சாண்ட்னர், அகமதாபாத் மைதானத்தில் திரளும் ஒரு லட்சம் இந்திய ரசிகர்களையும் தங்கள் ஆட்டத்தின் மூலம் அமைதிப்படுத்துவோம் என்று சவால் விட்டிருந்தார். கடந்த 2023 ஒருநாள் உலகக் கோப்பை இறுதிப் போட்டியில், இதே மைதானத்தில் ஆஸ்திரேலிய கேப்டன் பாட் கம்மின்ஸ் ரசிகர்களை அமைதிப்படுத்துவோம் என்று கூறி, அதனைச் செய்தும் காட்டினார். அதே பாணியில் சாண்ட்னரும் பேசினார். ஆனால் களத்தில் நடந்தது வேறு கதையாக முடிந்தது.

இந்தியாவின் இமாலய ஸ்கோர்

இந்த இறுதிப்போட்டியில் முதலில் பேட்டிங் செய்த இந்திய அணி, நியூசிலாந்து பந்துவீச்சை நாலாபுறமும் சிதறடித்தது. தொடக்கம் முதலே அதிரடி காட்டிய இந்திய பேட்ஸ்மேன்கள், நிர்ணயிக்கப்பட்ட 20 ஓவர்கள் முடிவில் 5 விக்கெட்டுகள் இழப்பிற்கு 255 ரன்கள் என்ற இமாலய ஸ்கோரை பதிவு செய்தனர். இந்தத் தொடர் முழுவதும் சிறப்பாகச் செயல்பட்ட இந்திய பேட்டிங் வரிசை, இறுதிப் போட்டியிலும் தங்களது ஆதிக்கத்தை நிலைநாட்டியது. நியூசிலாந்து பந்துவீச்சாளர்கள் இந்திய அணியின் ரன் வேகத்தைக் கட்டுப்படுத்த முடியாமல் திணறினர்.

அமைதியான மைதானம்.. ஆனால் காரணம் வேறு

256 ரன்கள் என்ற கடினமான இலக்கை நோக்கி களமிறங்கிய நியூசிலாந்து அணி, ஆரம்பத்தில் வேகமாக ரன் சேர்த்தாலும் சீரான இடைவெளியில் விக்கெட்டுகளை இழந்தது. ஒரு கட்டத்தில் நியூசிலாந்து அணி தோல்வியடைவது உறுதி என்று அனைவருக்கும் தெரிந்துவிட்டது. போட்டியின் இரண்டாவது பாதியில் எந்தவித சுவாரஸ்யமும் இல்லாமல் போனது.

மிட்செல் சாண்ட்னர் கூறியது போலவே மைதானம் அமைதியாகத் தான் இருந்தது. ஆனால் அந்த அமைதிக்குக் காரணம் நியூசிலாந்து அணியின் சிறப்பான ஆட்டம் அல்ல. மாறாக, நியூசிலாந்து அணி படுதோல்வியை நோக்கிச் சென்றதால் ரசிகர்கள் ஆர்ப்பரிப்பதற்கு எந்தக் காரணமும் இல்லாமல் அமைதியாக அமர்ந்திருந்தனர்.

இறுதியில் நியூசிலாந்து அணி 19 ஓவர்களிலேயே அனைத்து விக்கெட்டுகளையும் இழந்து 159 ரன்கள் மட்டுமே எடுத்தது. 96 ரன்கள் வித்தியாசத்தில் வெற்றி பெற்ற இந்திய அணி கோப்பையைக் கைப்பற்றியது. கம்மின்ஸ் போலப் பேச நினைத்து, களத்தில் சொதப்பிய சாண்ட்னரை சமூக வலைத்தளங்களில் இந்திய ரசிகர்கள் தற்போது விமர்சித்து வருகின்றனர்.