IND vs NZ: 3வது டி20 போட்டியிலிருந்து இந்திய அதிரடி வீரர் விலகல்.. பிசிசிஐ அறிவிப்பு

வெலிங்டன்: நியூசிலாந்துக்கு எதிரான மூன்றாவது டி20 போட்டியில் இருந்து இந்திய அணியின் விக்கெட் கீப்பர்-பேட்டர் இஷான் கிஷன் விலகியுள்ளார். தொடரின் முதல் போட்டியின் போது ஏற்பட்ட தசைப்பிடிப்பில் இருந்து அவர் இன்னும் முழுமையாக மீளாததால் இந்த முடிவு எடுக்கப்பட்டுள்ளதாக பிசிசிஐ தெரிவித்துள்ளது.

காயத்தில் இருந்து இஷான் கிஷன் வேகமாக குணமடைந்து வந்தாலும், போட்டியில் பங்கேற்பதற்கான முழு உடற்தகுதியை அவர் இன்னும் பெறவில்லை. இதனால் வெலிங்டனில் நடைபெறும் மூன்றாவது டி20 போட்டியில் முன்னெச்சரிக்கை நடவடிக்கையாக அவர் விளையாடமாட்டார் என இந்திய அணியின் பந்துவீச்சு பயிற்சியாளர் மோர்னே மோர்கல் தெரிவித்துள்ளார். பிசிசிஐ மருத்துவக் குழு அவரது உடல்நிலையைத் தொடர்ந்து கண்காணித்து வருகிறது.

இஷான் கிஷன் இல்லாததால், 15 வயதான இளம் பேட்டர் வைபவ் சூர்யவன்ஷிக்கு மீண்டும் பிளேயிங் லெவனில் வாய்ப்பு கிடைக்கவுள்ளது. இரண்டாவது டி20 போட்டியில் களமிறங்கிய சூர்யவன்ஷி 8 பந்துகளில் 4 ரன்கள் மட்டுமே எடுத்து ஆட்டமிழந்தார். சர்வதேச கிரிக்கெட்டில் இந்திய அணிக்காக விளையாடிய மிக இளம் வீரரான சூர்யவன்ஷி, தனது டி20 சர்வதேச வாழ்க்கையில் இதுவரை 250 ரன்களை 178.57 ஸ்ட்ரைக் ரேட்டில் எடுத்துள்ளார்.

IND vs NZ: இந்த 23 வயது வீரர் பக்கத்தில் கூட யாரும் வர முடியாது.. அப்படி ஒரு திறமை.. கையிப் பாராட்டு

இஷான் கிஷனுக்கு மாற்றாக அணியில் சேர்க்கப்பட்ட குமார் குஷாக்ரா, மூன்றாவது போட்டியிலும் இந்திய அணியுடன் தொடர்வார் என்று அறிவிக்கப்பட்டுள்ளது. இந்த டி20 தொடரில் இந்திய அணி தற்போது 2-0 என்ற கணக்கில் முன்னிலை வகிக்கிறது. கிறிஸ்ட்சர்ச்சில் நடைபெற்ற முதல் போட்டியில் 226 ரன்கள் என்ற கடினமான இலக்கை இந்தியா வெற்றிகரமாக சேஸ் செய்தது.

Also Read

IND vs NZ: நியூசிலாந்தை வைத்து ஐதராபாத் பசங்க பிரியாணியை சமைத்துவிட்டார்கள்.. ஸ்ரீகாந்த் பாராட்டு

தொடர்ந்து நடைபெற்ற இரண்டாவது போட்டியில் 182 ரன்கள் இலக்கை நோக்கிய போது, இந்தியா 112 ரன்களுக்கு 6 விக்கெட்டுகளை இழந்து தடுமாறியது. அப்போது திலக் வர்மா மற்றும் நிதீஷ் ரெட்டி ஜோடி 69 ரன்கள் சேர்த்து அணியை வெற்றி பெறச் செய்தது.