IND vs NZ: பைனலில் பும்ராவுக்கு மோசமான நாளாக அமையனும்.. நியூசிலாந்து வீரர் பிலிப்ஸ் பிரார்த்தனை

அகமதாபாத்: 2026 டி20 உலகக் கோப்பை அரையிறுதிப் போட்டியில் இங்கிலாந்துக்கு எதிராக ஜஸ்பிரித் பும்ராவின் அதிரடிப் பந்துவீச்சு, இந்திய அணியின் வெற்றிக்கு முக்கியக் காரணமாக அமைந்தது. அவரது இந்த அபாரமான ஆட்டத்தைக் கண்ட நியூசிலாந்து வீரர்கள், ஞாயிற்றுக்கிழமை அகமதாபாத்தில் உள்ள நரேந்திர மோடி ஸ்டேடியத்தில் நடைபெறவுள்ள இறுதிப் போட்டியில் பும்ராவுக்கு 'மோசமான நாள்' அமைய வேண்டும் எனப் பிரார்த்திப்பதாகத் தெரிவித்துள்ளனர்.

மும்பையில் நடந்த இங்கிலாந்துக்கு எதிரான அரையிறுதிப் போட்டியில், இந்திய அணியைப் பும்ரா தனது பந்துவீச்சால் வெற்றி பெற வைத்தார். இங்கிலாந்து வெற்றிபெற 30 பந்துகளில் 69 ரன்கள் தேவைப்பட்ட நிலையில், பும்ரா 16 மற்றும் 18வது ஓவர்களை வீசினார். மிகத் துல்லியமான யார்க்கர் பந்துகளை வீசி, 12 பந்துகளில் வெறும் 14 ரன்கள் மட்டுமே கொடுத்து, இறுதி இரண்டு ஓவர்களில் 39 ரன்களை ஹர்திக் பாண்டியா மற்றும் ஷிவம் தூபே தற்காக்க வழிவகுத்தார்.

இது 2024 டி20 உலகக் கோப்பை இறுதிப் போட்டியில் நடந்த ரீப்ளே போல் இருந்தது. அதில் தென் ஆப்பிரிக்காவுக்கு 30 பந்துக்கு 30 ரன்கள் தேவைப்பட்டபோது, பும்ரா இந்தியாவை மீண்டும் ஆட்டத்திற்குள் கொண்டுவந்தார். தற்போதைய அரையிறுதியில் இரு அணிகளின் சராசரி ரன் ரேட் 12.47 ஆக இருந்தபோது, பும்ராவின் எகானமி ரேட் 8.2 ஆக இருந்தது. இதனிடையே, சர்வதேச கிரிக்கெட்டில் ஜஸ்பிரித் பும்ரா 500 விக்கெட்டுகளை எடுத்த சாதனையையும் எட்டியுள்ளார்.

T20 WC: அபிஷேக் சர்மாவை அணியிலிருந்து நீக்க கூடாது..பைனலுக்கு முன் தவறு செய்யாதீங்க-ரவி சாஸ்த்ரி

இறுதிப் போட்டியை யொட்டி செய்தியாளர்களிடம் பேசிய நியூசிலாந்து ஆல்ரவுண்டர் கிளென் பிலிப்ஸ், "பும்ரா ஒரு சிறந்த பந்துவீச்சாளர். அவரிடம் பலவிதமான பந்துவீச்சு யுக்திகள் உள்ளன. கடைசி ஓவர்களில் பிளாக் ஹோல் யாக்கர் வகை பந்துகளை மிகச் சிறப்பாகப் பந்துவீசுகிறார். அவரும் ஒரு மனிதர்தான் என்பதை நாம் அறிவோம். எங்களுக்கும், மற்ற எல்லா வீரர்களைப் போலவே அவருக்கும் ஒரு மோசமான நாள் அமையலாம். எனவே, அவருக்கு எதிராக நாங்கள் சிறப்பான ஆட்டத்தை வெளிப்படுத்துவோம் என நம்புகிறேன்" என்றார்.

"இங்கிலாந்து அணி கடைசி இரண்டு ஓவர்களில் பும்ராவை எதிர்கொண்டு, தங்களுக்கு முடிந்த அளவு வாய்ப்புகளை உருவாக்கிக் கொள்ள முயன்றது. அது அவர்களின் யுக்தி. நாங்கள் அதே உத்தியைப் பயன்படுத்த வேண்டும் என்று அர்த்தமில்லை. நான் சொன்னது போல, ஒரு பந்துவீச்சாளர் தவறாகப் பந்துவீசவும் வாய்ப்புள்ளது, அப்படி நடந்தால் நாங்கள் அதனை ரன்களாக மாற்ற வேண்டும். அவர் சிறப்பாகப் பந்துவீசினால், நாங்கள் வேறு வழிகளைக் கண்டறிந்து, அதற்கேற்ப எங்கள் ஆட்டத்தை மாற்றிக்கொள்ள வேண்டும்" என்று தெரிவித்தார்.

IND vs NZ: பைனலில் 300 ரன்கள் கூட அடிக்கலாம்.. அகமதாபாத் ஆடுகளத்தை மாற்றிய ஐசிசி.. விவரம்

நியூசிலாந்துக்கு எதிராக பும்ரா ஒரு சிறந்த சாதனையைக் கொண்டுள்ளார். 14 போட்டிகளில் 16 விக்கெட்டுகளை வீழ்த்தி, 23.38 சராசரியையும், 7.06 எகானமி ரேட்டையும் கொண்டுள்ளார். கிளென் பிலிப்ஸை டி20 போட்டிகளில் ஐந்து முறை எதிர்கொண்டாலும், அவர் பிலிப்ஸை அவுட்டாக்கியதில்லை. இருப்பினும், பிலிப்ஸும் பும்ராவுக்கு எதிராகச் பெரிய அளவு ரன் குவித்தது இல்லை; அவரது ஸ்ட்ரைக் ரேட் 108.7 ஆக மட்டுமே உள்ளது.