“என் வாழ்நாளில் 5 ஓவரில் 100 ரன் எல்லாம்.. அபிஷேக், வைபவ்..”.. வியந்து பேசிய ஸ்ரேயாஸ் ஐயர்

வெலிங்டன்: நியூசிலாந்து அணிக்கு எதிரான 3-வது சர்வதேச டி20 போட்டியில் அபார வெற்றி பெற்ற இந்திய அணி, 5 போட்டிகள் கொண்ட தொடரை 3-0 என்ற கணக்கில் முன்கூட்டியே கைப்பற்றி புதிய வரலாறு படைத்துள்ளது. நியூசிலாந்து நிர்ணயித்த 199 ரன்கள் என்ற கடினமான இலக்கை வெறும் 40 பந்துகள் மீதமிருக்க இந்தியா மிக எளிதாக எட்டிப்பிடித்தது. இந்த இமாலய வெற்றிக்குப் பின்னர் பேசிய கேப்டன் ஸ்ரேயாஸ் ஐயர், தொடக்க ஆட்டக்காரர்களான அபிஷேக் சர்மா மற்றும் வைபவ் சூர்யவன்ஷி ஆகியோரின் அதிரடி ஆட்டத்தைப் பார்த்துத் தான் வாயடைத்துப் போனதாக வியந்து பேசியுள்ளார்.

போட்டிக்கு பின் நடந்த பரிசு வழங்கும் விழாவில் நெகிழ்ச்சியுடன் பேசிய ஸ்ரேயாஸ் ஐயர், "களத்தில் எங்கள் தொடக்க வீரர்கள் விளையாடிய விதம் கண்கொள்ளாக் காட்சியாக அமைந்தது. அபிஷேக், வைபவ் ஆட்டமிழந்த பிறகு நானும் சஞ்சு சாம்சனும் பேட்டிங் செய்ய உள்ளே சென்றோம். அப்போது பந்து நன்றாக ஸ்விங் ஆகிக்கொண்டிருந்தது. 'பந்து இவ்வளவு கடினமாக ஸ்விங் ஆகும் போது இவர்கள் இருவரும் எப்படி அத்தனை ரன்களை விளாசினார்கள்?' என்று நானும் சஞ்சுவும் ஒருவரையொருவர் பார்த்து பிரமித்துப் போனோம். சர்வதேச கிரிக்கெட் அரங்கில் வெறும் 5 ஓவர்களில் ஒரு அணி 100 ரன்களைக் குவித்ததை என் வாழ்நாளில் நான் பார்த்ததே இல்லை" என்றார்.

பயணக் களைப்பு மற்றும் பந்துவீச்சு வியூகம் குறித்துப் பேசிய அவர், "நீண்ட தூரப் பயணம் மற்றும் தூக்கமின்மைக்கு மத்தியிலும் வீரர்கள் வெளிப்படுத்திய இந்த அசாத்திய அர்ப்பணிப்பு வியக்க வைக்கிறது. முதல் 10 ஓவர்களுக்குப் பிறகு, ஆடுகளத்தில் பந்தை ஃபுல் லென்த்தில் வீசினால் பேட்டர்கள் எளிதாக சிக்சருக்குப் பறக்க விடுகிறார்கள் என்பதை உணர்ந்தோம். உடனடியாக பந்துவீச்சாளர்களிடம் திட்டத்தை மாற்றி ஒயிடு யார்க்கர்களை வீசுமாறு அறிவுறுத்தினேன். அதுவே நியூசிலாந்து அணியை 200 ரன்களுக்குள் கட்டுப்படுத்த எங்களுக்குப் பெரிதும் உதவியது" என்று விளக்கமளித்தார்.

உலக சாதனைகளை சுக்குநூறாக்கிய இந்திய புயல்.. அபிஷேக் சர்மா உடைத்த ரெக்கார்டுகள் இவைதான்!

வெளிநாட்டுத் தொடர்களில் சவால்களை முறியடிக்க இதுபோன்ற பயமற்ற அதிரடி ஆட்டமே அணிக்கு மிக அவசியமானது என்று குறிப்பிட்ட கேப்டன் ஸ்ரேயாஸ் ஐயர், நியூசிலாந்து டி20 தொடரில் இன்னும் 2 போட்டிகள் மீதமுள்ள நிலையில் வீரர்கள் இதே உத்வேகத்தைத் தொடருவார்கள் என நம்புவதாகத் தெரிவித்தார்.