இந்திய டெஸ்ட் அணியில் இருந்து ஒரு பேட்ஸ்மேன், 3 பவுலர்கள் நீக்கம்.. உள்ளே வந்த 5 வீரர்கள்!

மும்பை: நியூசிலாந்து அணிக்கு எதிரான 2 போட்டிகள் கொண்ட டெஸ்ட் கிரிக்கெட் தொடருக்கான இந்திய அணியில் தேர்வுக்குழு அதிரடி மாற்றங்களைச் செய்துள்ளது. கடந்த ஆகஸ்ட் மாதம் இலங்கை மண்ணில் டெஸ்ட் தொடரை 1-0 எனக் கைப்பற்றிய இந்திய அணியில் இருந்து, மிடில் ஆர்டர் பேட்டர் சர்பராஸ் கான் மற்றும் 3 பந்துவீச்சாளர்கள் என 4 பேர் அதிரடியாகக் நீக்கப்பட்டுள்ளனர். ஆடுகளத்தின் தன்மை மற்றும் உடற்தகுதியைக் கருத்தில் கொண்டு 5 வீரர்கள் புதிதாக அணிக்குள் கொண்டு வரப்பட்டுள்ளனர்.

சர்பராஸ் கான் நீக்கப்பட்டதற்கு அணியின் இடப்பற்றாக்குறையே முக்கிய காரணமாக அமைந்துள்ளது. இலங்கை தொடரின் போது தமிழக வீரர் சாய் சுதர்சன் காலில் ஏற்பட்ட காயம் காரணமாக விலகியதால், அவருக்குப் பதிலாகவே சர்பராஸ் அழைக்கப்பட்டார். அங்கு அவருக்கு ஒரு போட்டியில் கூட விளையாட வாய்ப்பு கிடைக்கவில்லை. தற்போது சாய் சுதர்சன் முழு உடற்தகுதி பெற்று அணிக்குத் திரும்பிவிட்டதால் சர்பாராஸுக்கு இடம் கிடைக்காமல் போனது. மேலும் இலங்கை டெஸ்ட் தொடரில் அறிமுகமாகி விக்கெட் எதுவும் எடுக்க முடியாமல் திணறிய சுழற்பந்து வீச்சாளர் சரண்ஷ் ஜெயினும் அணியில் இருந்து நீக்கப்பட்டுள்ளார்.

எதிர்கால நம்பிக்கை நட்சத்திரமாகக் கருதப்படும் மற்றொரு இளம் சுழற்பந்து வீச்சாளர் மானவ் சுதாரும் கழற்றி விடப்பட்டுள்ளார். நியூசிலாந்து ஆடுகளங்கள் சுழற்பந்து வீச்சுக்கு கைகொடுக்காது என்பதால், நிர்வாகத்தின் நம்பிக்கையைப் பெற்ற வாஷிங்டன் சுந்தர் மீண்டும் அழைக்கப்பட்டுள்ளார். அதேபோல் வேகப்பந்து வீச்சாளர் குர்னூர் ப்ராரின் பந்துவீச்சு பாணி நியூசிலாந்து மண்ணிற்குப் பொருந்தாது எனக் கருதப்பட்டது.

இவர்களுக்கு பதிலாக வேகப்பந்து ஆல்ரவுண்டர் நிதிஷ் குமார் ரெட்டி மற்றும் ஆகாஷ் தீப் ஆகியோர் காயம் குணமடைந்து அணிக்குள் நுழைந்துள்ளனர். இவர்களுடன் அன்ஷுல் கம்போஜ் சேர்க்கப்பட்டுள்ளார்.

இந்த தொடரில் இந்தியா - நியூசிலாந்து அணிகள் மோதும் முதல் டெஸ்ட் போட்டி நவம்பர் 19 முதல் 23 வரை வெலிங்டனில் உள்ள பேசின் ரிசர்வ் மைதானத்தில் நடக்கிறது. 2-வது டெஸ்ட் போட்டி நவம்பர் 27 முதல் டிசம்பர் 1 வரை கிறைஸ்ட்சர்ச்சில் உள்ள ஹாக்லி ஓவல் மைதானத்தில் நடைபெறுகிறது. உலக டெஸ்ட் சாம்பியன்ஷிப் புள்ளிப்பட்டியலுக்கு மிகவும் முக்கியமான இந்த 2 போட்டிகளுமே இந்திய நேரப்படி அதிகாலை 3.30 மணிக்குத் தொடங்கும் என அறிவிக்கப்பட்டுள்ளது.

கங்குலி, யுவராஜைத் தொடர்ந்து இலங்கை ஜாம்பவானை தூக்கிய டெல்லி கேப்பிடல்ஸ்.. பவுலிங் கோச்சாக வாஸ்

நீக்கப்பட்ட 4 வீரர்கள்: சர்பராஸ் கான், குர்னூர் ப்ரார், சரண்ஷ் ஜெயின், மானவ் சுதார்

நியூசிலாந்து தொடருக்கான இந்திய டெஸ்ட் அணி: சுப்மன் கில், யஷஸ்வி ஜெய்ஸ்வால், கே.எல். ராகுல் (துணை கேப்டன்), தேவ்தத் படிக்கல், ரிஷப் பண்ட் (விக்கெட் கீப்பர்), துருவ் ஜூரெல் (விக்கெட் கீப்பர்), ரவீந்திர ஜடேஜா, அன்ஷுல் கம்போஜ், ஜஸ்பிரித் பும்ரா, பிரசித் கிருஷ்ணா, ஆகாஷ் தீப், சாய் சுதர்சன், நிதிஷ் குமார் ரெட்டி, வாஷிங்டன் சுந்தர், குல்தீப் யாதவ், முகமது சிராஜ்.