IND vs NZ: கடைசி ஓவர் வரை டென்சன்.. ஆட்டத்தை மாற்றிய நமன்.. திலக், நிதிஷ் அதிரடியால் இந்தியா வெற்றி

கிறைஸ்ட்சர்ச்: நியூசிலாந்து அணிக்கு எதிரான 2-வது டி20 போட்டியில், இந்திய அணி கடைசி ஓவர் வரை சென்று 4 விக்கெட் வித்தியாசத்தில் த்ரில் வெற்றி பெற்றுள்ளது. தோல்வியின் விளிம்பில் இருந்து மீண்டு வந்த இந்திய அணி, 5 போட்டிகள் கொண்ட இந்தத் தொடரில் 2-0 என முன்னிலை பெற்றது. அத்துடன், தனது வரலாற்று சிறப்புமிக்க 300-வது சர்வதேச டி20 போட்டியில் களம் கண்டு, 200-வது வெற்றியைப் பதிவு செய்த உலகின் முதல் அணி என்ற பிரம்மாண்ட சாதனையை இந்தியா தன்வசப்படுத்தியுள்ளது.

முதலில் பேட்டிங் செய்த நியூசிலாந்து அணி, கிளென் பிலிப்ஸ் (70 ரன்கள்) மற்றும் பெவோன் ஜேக்கப்ஸ் (58 ரன்கள்) ஜோடியின் அபார ஆட்டத்தால் 20 ஓவர்களில் 5 விக்கெட் இழப்பிற்கு 180 ரன்கள் சேர்த்தது. இந்திய தரப்பில் அர்ஷ்தீப் சிங் 2 விக்கெட்டுகளை வீழ்த்தினார். தொடர்ந்து 181 ரன்கள் என்ற இலக்கை நோக்கி ஆடிய இந்திய அணி, நியூசிலாந்து கேப்டன் மிட்செல் சான்ட்னரின் சுழலில் சிக்கி 71 ரன்களுக்கு 5 விக்கெட்டுகளைப் பறிகொடுத்து தோல்வியை நோக்கிச் சென்றது.

சஞ்சு சாம்சன் 14, அபிஷேக் சர்மா 27, இளம் வீரர் வைபவ் சூர்யவன்ஷி 4, கேப்டன் ஸ்ரேயாஸ் ஐயர் 7 ரன்களில் வெளியேறி ஏமாற்றினர். இடையே ஆறாம் வரிசையில் வந்த நமன் திர் 17 பந்துகளில் 31 ரன்கள் குவித்தார். 17 ஓவர்கள் முடிவில் இந்தியா 135/6 எனத் தள்ளாடியது. கடைசி 18 பந்துகளில் வெற்றிக்கு 46 ரன்கள் தேவைப்பட்ட இக்கட்டான சூழலில், திலக் வர்மா மற்றும் நிதிஷ் குமார் ரெட்டி ஜோடி நியூசிலாந்து பந்துவீச்சை நாலாபுறமும் சிதறடித்து ஆட்டத்தின் போக்கையே தலைகீழாக மாற்றியது. குறிப்பாக 19-வது ஓவரில் நாதன் ஸ்மித் பந்துவீச்சில் திலக் வர்மா வானவேடிக்கை காட்டி இமாலய சிக்சர் அடிக்க, அந்த ஓவரில் மட்டும் இந்திய அணி 18 ரன்களை குவித்தது.

IND vs NZ: கிரிக்கெட்டில் பாகிஸ்தானுக்கு அடுத்து இந்தியா மட்டுமே செய்த பிரம்மாண்ட உலக சாதனை!

கடைசி ஓவரில் வெற்றிக்கு 11 ரன்கள் தேவைப்பட்டது. ஜேக்கப் டஃபி வீசிய 20-வது ஓவரில் துணிச்சலாக ஆடிய திலக் வர்மா 26 பந்துகளில் 51 ரன்கள் குவித்து தனது அரைசதத்தை எட்டினார். 19.5-வது பந்தில் நிதிஷ் குமார் ரெட்டி நேர்த்தியாக 2 ரன்கள் தட்டிவிட்டு இந்தியாவை 181/6 ரன்களுடன் வெற்றி பெற வைத்தார். நிதிஷ் 13 பந்துகளில் 26 ரன்கள் குவித்து இருந்தார். நியூசிலாந்தின் கையில் இருந்த வெற்றியை கடைசி நொடியில் தட்டிப்பறித்து இந்திய அணி தனது 200வது டி20வெற்றியை பெற்றது.