IND vs WI: 32 வயதில் முதல் சதம் அடித்த வெஸ்ட் இண்டீஸ் வீரர் ஜஸ்டின் கிரீவ்ஸ்.. இந்தியாவுக்கு தலைவலி

திருவனந்தபுரம்: இந்தியாவுக்கு எதிரான முதல் ஒருநாள் போட்டியில், வெஸ்ட் இண்டீஸ் தொடக்க ஆட்டக்காரர் ஜஸ்டின் கிரீவ்ஸ் சதம் விளாசி இந்திய பந்துவீச்சை நிலைகுலைய வைத்தார். மேலும், அதிக வயதில் சதம் அடித்த வீரர்கள் பட்டியலில் அவர் இடம் பெற்றார்.

இந்தப் போட்டியில் டாஸ் வென்று முதலில் பந்துவீச்சைத் தேர்வு செய்த இந்திய அணிக்கு, வெஸ்ட் இண்டீஸ் தொடக்க வீரர்கள் தொடக்கம் முதலே கடும் நெருக்கடி கொடுத்தனர். அதிரடியாக ஆடிய ஜஸ்டின் கிரீவ்ஸ் 108 பந்துகளில் 12 பவுண்டரிகளுடன் 101 ரன்கள் குவித்து தனது முதல் ஒருநாள் சதத்தைப் பதிவு செய்தார். காலில் ஏற்பட்ட லேசான தசைப்பிடிப்பு வலியையும் பொருட்படுத்தாமல் களத்தில் நின்ற அவர், நிதிஷ் குமார் ரெட்டியின் ஒரே ஓவரில் அடுத்தடுத்து 4 பவுண்டரிகளை விளாசி அசத்தினார்.

மறுமுனையில் மற்றொரு தொடக்க வீரரான ஜான் காம்ப்பெல் 60 பந்துகளில் 62 ரன்கள் எடுக்க, இந்த ஜோடி முதல் விக்கெட்டுக்கு 135 ரன்கள் குவித்து சிறப்பான அடித்தளம் அமைத்தது. இந்திய மண்ணில் இந்தியாவுக்கு எதிராக 2002-ம் ஆண்டுக்குப் பிறகு வெஸ்ட் இண்டீஸ் அணி 100 ரன்களுக்கு மேல் அமைத்த முதல் துவக்க பார்ட்னர்ஷிப் இதுவாகும்.

தனது 32 வயது 213 நாட்களில் முதல் சதத்தை அடித்துள்ள ஜஸ்டின் கிரீவ்ஸ், வெஸ்ட் இண்டீஸ் கிரிக்கெட் வரலாற்றில் அதிக வயதில் முதல் ஒருநாள் சதமடித்த வீரர்கள் பட்டியலில் 3-வது இடத்தைப் பிடித்துள்ளார். இதற்கு முன்பு கிளேட்டன் லம்பேர்ட் (36 வயது 57 நாட்கள்), ஷமாரா ப்ரூக்ஸ் (33 வயது 246 நாட்கள்) ஆகியோர் இப்பட்டியலில் முதல் இரு இடங்களில் உள்ளனர்.

அசாருதீனின் 28 ஆண்டு கால சாதனை காலி.. முதல் போட்டியிலேயே புதிய வரலாறு படைத்த விராட் கோலி

இறுதியில் சிறப்பாக பந்து வீசிய குல்தீப் யாதவ், சதமடித்த ஜஸ்டின் கிரீவ்ஸை 101 ரன்களில் எல்.பி.டபிள்யூ முறையில் வீழ்த்தினார். மேலும் காம்ப்பெல் மற்றும் கேப்டன் ஷாய் ஹோப் விக்கெட்டுகளையும் சாய்த்து 3 விக்கெட்டுகளை அள்ளி இந்திய அணிக்கு ஆறுதல் தந்தார். எனினும் கிரீவ்ஸின் இந்த அதிரடி ஆட்டம் இந்திய அணிக்கு தொடக்கத்திலேயே பெரும் சவாலாக அமைந்தது.