IND vs WI: பிளேயிங் 11இல் வைபவ் சூர்யவன்ஷி.. சஞ்சு சாம்சன் நிலைமை இதுதான்.. 4-வது டி20-யில் மாற்றம்

ஹைதராபாத்: வெஸ்ட் இண்டீஸ் அணிக்கு எதிரான 4-வது டி20 போட்டியில், தொடர்ந்து நிலையற்ற ஆட்டத்தை வெளிப்படுத்தி வரும் சஞ்சு சாம்சனுக்குப் பதிலாக இளம் அதிரடி வீரர் வைபவ் சூர்யவன்ஷி பிளேயிங் லெவனில் சேர்க்கப்பட வாய்ப்புள்ளதாகத் தகவல்கள் தெரிவிக்கின்றன.

இந்தியா மற்றும் வெஸ்ட் இண்டீஸ் அணிகளுக்கு இடையேயான 5 போட்டிகள் கொண்ட டி20 தொடரில், இந்திய அணி 2-1 என்ற கணக்கில் முன்னிலை பெற்றுள்ளது. இந்நிலையில் தொடரைக் கைப்பற்றும் முனைப்புடன் இந்திய அணி 4-வது டி20 போட்டியில் ஹைதராபாத்தில் விளையாட உள்ளது.

இந்திய அணியின் தொடக்க ஆட்டக்காரர் சஞ்சு சாம்சன் தொடர்ச்சியாக ரன் குவிக்க முடியாமல் தடுமாறி வருகிறார். தனது கடைசி 10 டி20 இன்னிங்ஸ்களில் முறையே 27, 10, 57, 50, 9, 7, 2, 11, 82 மற்றும் 3 ரன்கள் மட்டுமே எடுத்துள்ளார். அவரது சராசரி வெறும் 25 ஆக மட்டுமே உள்ளது. நடப்பு தொடரில் அவர் எடுத்த 96 ரன்களில் 82 ரன்கள் ஒரே போட்டியில் வந்தவை. மற்ற இரண்டு ஆட்டங்களிலும் ஒற்றை இலக்க ரன்களில் ஆட்டமிழந்து ஏமாற்றினார்.

மறுமுனையில் தொடக்க வீரர் அபிஷேக் சர்மா 41 சராசரியுடன் மிரட்டி வருகிறார். இதனால் சாம்சனுக்குப் பதிலாக, பெஞ்சில் காத்திருக்கும் 15 வயது இளம் புயல் வைபவ் சூர்யவன்ஷிக்கு தொடக்க வீரராக வாய்ப்பு வழங்க வேண்டும் என்ற குரல்கள் வலுத்து வருகின்றன.

பந்துவீச்சில் கடந்த போட்டியில் களமிறங்கிய பிரின்ஸ் யாதவ் மற்றும் நிதீஷ் குமார் ரெட்டி ஆகியோர் பேட்டிங்கிலும் கைகொடுத்ததால் அணியில் நீடிப்பார்கள் எனத் தெரிகிறது. அதேவேளை, ஹைதராபாத் ஆடுகளத்தைக் கருத்தில் கொண்டு, மயங்க் யாதவுக்குப் பதிலாக முதன்மை சுழற்பந்து வீச்சாளர் குல்தீப் யாதவை மீண்டும் பிளேயிங் லெவனில் சேர்க்க அதிக வாய்ப்பு உள்ளது.

IND vs WI: நடுவரை பார்த்து கத்திய விவகாரம்.. 2 வெஸ்ட் இண்டீஸ் வீரருக்கு ஐசிசி தண்டனை

இந்திய உத்தேச பிளேயிங் லெவன்: அபிஷேக் சர்மா, சஞ்சு சாம்சன் அல்லது வைபவ் சூர்யவன்ஷி, இஷான் கிஷன், ஸ்ரேயாஸ் ஐயர் (கேப்டன்), திலக் வர்மா, நிதீஷ் குமார் ரெட்டி, நமன் திர், அக்‌ஷர் படேல், அர்ஷ்தீப் சிங், பிரின்ஸ் யாதவ், மயங்க் யாதவ் அல்லது குல்தீப் யாதவ்.