IND vs WI 5வது டி20 போட்டிக்கு மழையால் எந்த அளவு பாதிப்பு? வானிலை அறிக்கை சொல்வது இதுதான்!

பெங்களூர்: இந்தியா - வெஸ்ட் இண்டீஸ் அணிகளுக்கு இடையிலான 5 போட்டிகள் கொண்ட டி20 கிரிக்கெட் தொடர் தற்போது 2-2 என்ற கணக்கில் சமநிலையில் உள்ளது. கோப்பையை வெல்லப் போவது யார் என்பதைத் தீர்மானிக்கும் 5-வது மற்றும் கடைசி டி20 போட்டி பெங்களூரு சின்னசாமி மைதானத்தில் சனிக்கிழமை இரவு 7 மணிக்கு நடைபெறுகிறது. தொடரைக் கைப்பற்ற இந்திய அணி முனைப்பு காட்டி வரும் நிலையில், இந்த முக்கியமான போட்டிக்கு மழை பெரும் வில்லனாக அச்சுறுத்தி வருகிறது.

இந்திய வானிலை மையம் வெளியிட்டுள்ள தகவலின்படி, பெங்களூருவில் போட்டி நாளான சனிக்கிழமை வானம் மேகமூட்டத்துடன் காணப்படும். இடி மின்னலுடன் கூடிய மழைக்கு எச்சரிக்கை விடுக்கப்பட்டுள்ளது. அங்கு மாலை 5 மணி அளவில் மழை பெய்ய 71 சதவீத வாய்ப்புள்ளது. போட்டி தொடங்கும் நேரமான இரவு 7 மணியளவில் மழை பெய்வதற்கான வாய்ப்பு 53 முதல் 69 சதவீதமாக நீடிக்கும் எனக் கணிக்கப்பட்டுள்ளது.

வெப்பநிலை 20 முதல் 29 டிகிரி செல்சியஸ் வரை இருக்கும். இரவு நேரத்தில் காற்றில் ஈரப்பதம் 85 சதவீதமாக உயரும் என்பதால் கடும் பனிப்பொழிவு இருக்கும். இதனால் 2-வதாகப் பந்துவீசும் அணிக்கு பந்தைப் பிடிப்பது மிகக் கடினமாக மாறும். அங்கு அதிநவீன வடிகால் வசதி இருப்பது மட்டுமே சற்று ஆறுதல் அளிப்பதாக உள்ளது.

கடந்த 2024 அக்டோபருக்குப் பிறகு சின்னசாமி மைதானத்தில் சர்வதேசப் போட்டி எதுவும் நடைபெறவில்லை. சிறிய எல்லைகளைக் கொண்ட இந்த ஆடுகளத்தில் இந்திய அணியின் பந்துவீச்சில் முக்கிய மாற்றங்கள் செய்யப்பட உள்ளன. வேகப்பந்து வீச்சாளர் அர்ஷ்தீப் சிங்கிற்கு தோள்பட்டையில் காயம் ஏற்பட்டுள்ளதால், அவருக்குப் பதிலாக அனுபவ வீரர் புவனேஸ்வர் குமார் களமிறங்க அதிக வாய்ப்புள்ளது. ஆர்சிபி அணிக்காக பெங்களூரு மைதானத்தில் நீண்ட காலம் விளையாடிய அனுபவம் புவனேஸ்வருக்கு மிகப்பெரிய சாதகமாக அமையும்.

"புவனேஸ்வர் குமார் மீண்டும் வந்ததுக்கு காரணமே இந்த மோசமான நிலைமைதான்".. WV ராமன் அதிரடி கருத்து

அதேபோல் கடந்த 2 போட்டிகளில் விளையாடாத முன்னணி சுழற்பந்து வீச்சாளர் குல்தீப் யாதவும் மீண்டும் அணிக்குத் திரும்புவார் எனத் தெரிகிறது. வெஸ்ட் இண்டீஸ் அணியில் அபார ஃபார்மில் இருக்கும் கேப்டன் ஷாய் ஹோப் 261 ரன்களுடனும், அதிரடி வீரர் ரூதர்போர்டு 221 ரன்களுடனும் மிரட்டி வருகின்றனர். மத்திய ஓவர்களில் இவர்களைக் கட்டுப்படுத்த குல்தீப்பின் சுழலும், புவனேஸ்வரின் அனுபவமும் இந்திய அணிக்கு மிக அவசியம்.