IND vs WI: முகமது சிராஜ் ஆவேசம்.. வெஸ்ட் இண்டீஸ் வீரருடன் ஆக்ரோஷ வாக்குவாதம்.. என்ன நடந்தது?

சண்டிகர்: வெஸ்ட் இண்டீஸ் அணிக்கு எதிரான 3வது ஒருநாள் போட்டியில், இந்திய வேகப்பந்து வீச்சாளர் முகமது சிராஜ் மற்றும் வெஸ்ட் இண்டீஸ் பேட்டர் அமீர் ஜாங்கு இடையே களத்தில் கடும் வாக்குவாதம் வெடித்தது. சண்டிகர் மைதானத்தில் நடந்த இந்த ஆக்ரோஷ மோதல் ரசிகர்களிடையே பரபரப்பை ஏற்படுத்தியது.

நியூ சண்டிகரில் உள்ள மகாராஜா யாதவீந்திர சிங் மைதானத்தில் 352 ரன்கள் என்ற இலக்கை நோக்கி வெஸ்ட் இண்டீஸ் அணி பேட்டிங் செய்தது. ஆட்டத்தின் 9வது ஓவரை முகமது சிராஜ் ஆக்ரோஷமாக வீசினார். அந்த ஓவரின் 4வது பந்தை சிராஜ் மணிக்கு 137.5 கி.மீ வேகத்தில் வீச, அதை வெஸ்ட் இண்டீஸ் பேட்டர் அமீர் ஜாங்கு கவர் டிரைவ் ஆட முயன்றார்.

பந்து பேட்டின் உள்பகுதியில் பட்டு, சில அங்குல இடைவெளியில் ஸ்டம்பைத் தொடாமல் நூலிழையில் விக்கெட் கீப்பரை நோக்கி சென்றது. இதை பார்த்து ஆவேசமடைந்த முகமது சிராஜ், தனது ஃபாலோ-த்ரூவில் வேகமாக முன்னேறிச் சென்று அமீர் ஜாங்குவை முறைத்துப் பார்த்தபடி ஆக்ரோஷமாக சில வார்த்தைகளை சொன்னார். பதிலுக்கு அமீர் ஜாங்குவும் ஏதோ பேச, நடுவே களத்தில் மோதல் போன்ற சூழல் உருவானது.

முன்னதாக வெஸ்ட் இண்டீஸ் அணியின் அதிரடி தொடக்க ஆட்டக்காரர் ஜான் கேம்ப்பெல்லின் ஸ்டம்பை தகர்த்து சிராஜ் விக்கெட் வீழ்த்தியிருந்தார். முதல் இரண்டு போட்டிகளில் பணிச்சுமை காரணமாக ஓய்வில் இருந்த முகமது சிராஜ், காயம் அடைந்த பிரசித் கிருஷ்ணாவுக்கு பதிலாக இந்த 3வது போட்டியில் களமிறக்கப்பட்டார்.

இலங்கை டெஸ்ட் தொடரில் அவரது பந்துவீச்சு வேகம் குறைந்ததாக விமர்சனங்கள் எழுந்த நிலையில், இந்த போட்டியில் தொடர்ந்து மணிக்கு 140 கி.மீ வேகத்தில் சீறிப்பாய்ந்து பந்துவீசி தனது வேகத்தை நிரூபித்து இருக்கிறார்.

907 போட்டிகளில் முதல்முறை.. இந்திய அணியை புரட்டிப்போட்டு வெஸ்ட் இண்டீஸ் படைத்த வரலாற்று சாதனை

முன்னதாக முதலில் பேட்டிங் செய்த இந்திய அணி 50 ஓவர்களில் 7 விக்கெட் இழப்பிற்கு 351 ரன்கள் குவித்தது. தொடக்க வீரர் ரோஹித் சர்மா 92 ரன்கள் விளாசி தனது சதத்தை நூலிழையில் தவறவிட்டார். 5வது வரிசையில் களமிறங்கிய கே.எல்.ராகுல் அபாரமாக ஆடி ஆட்டமிழக்காமல் 129 ரன்கள் குவித்து தனது 9வது சர்வதேச ஒருநாள் சதத்தை பதிவு செய்தார். 352 ரன்கள் என்ற இமாலய இலக்கை துரத்திய வெஸ்ட் இண்டீஸ் அணி அந்த இலக்கை 48.2 ஓவர்களில் எட்டியது.

Also Read

ஜெய் ஷாவை பார்த்ததும் வைபவ் சூர்யவன்ஷி செய்த செயல்.. சமூக வலைதளங்களில் பரவும் புகைப்படம்