IND vs WI: இது நம்ம லிஸ்ட்லையே இல்லையே.. நமன் திர் போட்ட போடு.. ஆல்-அவுட் ஆன வெஸ்ட் இண்டீஸ்!

லக்னோ: வெஸ்ட் இண்டீஸ் அணிக்கு எதிரான முதல் டி20 போட்டியில் இந்திய பந்துவீச்சாளர்கள் அபாரமாகச் செயல்பட்டு அந்த அணியை 171 ரன்களுக்கு சுருட்டினர். யாரும் எதிர்பார்க்காத வகையில் தனது அறிமுகப் போட்டியிலேயே இளம் வீரர் நமன் திர் 3 விக்கெட்டுகளை வீழ்த்தி அசத்தினார்.

லக்னோ ஏகானா மைதானத்தில் நடைபெற்ற இந்தப் போட்டியில் டாஸ் வென்ற இந்திய கேப்டன் ஸ்ரேயாஸ் ஐயர் முதலில் பந்துவீச்சைத் தேர்வு செய்தார். முதலில் பேட்டிங் களமிறங்கிய வெஸ்ட் இண்டீஸ் அணிக்கு தொடக்கத்திலேயே அதிர்ச்சி காத்திருந்தது. கமில் பூரன் 12 ரன்களிலும், ஹெட்மயர் 5 ரன்களிலும், ரோவ்மன் பவல் ரன் ஏதுமின்றியும் அடுத்தடுத்து ஆட்டமிழந்தனர்.

எனினும் ஒருபுறம் நங்கூரம் போல் நின்ற கேப்டன் ஷாய் ஹோப் 37 பந்துகளில் 6 பவுண்டரிகள், 2 சிக்சர்களுடன் 52 ரன்கள் எடுத்தார். அவருடன் அதிரடியாக ஆடிய ஷெர்பேன் ரூதர்போர்ட் 34 பந்துகளில் 6 பவுண்டரிகள், 3 சிக்சர்களுடன் 56 ரன்கள் விளாசினார். ஆனால் இந்த ஜோடி ஆட்டமிழந்த பிறகு வெஸ்ட் இண்டீஸ் அணியின் விக்கெட்டுகள் சீட்டுக் கட்டு போல் சரிந்தன.

தனது அறிமுக டி20 போட்டியில் பந்துவீசிய இளம் ஆல்ரவுண்டர் நமன் திர் எதிரணிக்கு கடும் சிம்மசொப்பனமாக விளங்கினார். இவர் 4 ஓவர்கள் வீசி 31 ரன்கள் மட்டுமே கொடுத்து ஷாய் ஹோப், ரொமாரியோ ஷெப்பர்ட், ஷமர் ஸ்பிரிங்கர் என 3 முக்கிய விக்கெட்டுகளைச் சாய்த்தார்.

மறுபுறம் சுழலில் மிரட்டிய அனுபவ பந்துவீச்சாளர்களான அக்‌சர் படேல் 26 ரன்களுக்கு 2 விக்கெட்டுகளையும், குல்தீப் யாதவ் 33 ரன்களுக்கு 2 விக்கெட்டுகளையும் கைப்பற்றினர். வேகப்பந்து வீச்சாளர்கள் அர்ஷ்தீப் சிங் மற்றும் மயங்க் யாதவ் தலா 1 விக்கெட் எடுத்தனர்.

பேட்டை தூக்கியதால் வந்த வினை.. ரன் அவுட் ஆகிவிட்டு அம்பயரிடம் கொந்தளித்த ஹெட்மயர்.. என்ன நடந்தது?

முடிவில் வெஸ்ட் இண்டீஸ் அணி 19.1 ஓவர்களில் 171 ரன்களுக்கு அனைத்து விக்கெட்டுகளையும் இழந்தது. இதையடுத்து 172 ரன்கள் எடுத்தால் வெற்றி என்ற இலக்கை நோக்கி இந்திய அணி ஆடியது.