21 வருடமாக இந்தியாவுக்கு எதிராக தொடரும் சோகம்.. நொந்து போன வெஸ்ட் இண்டீஸ்.. ஒரு மேட்ச் கூட ஜெயிக்கலை

டெல்லி: இந்தியா மற்றும் வெஸ்ட் இண்டீஸ் அணிகளுக்கு இடையேயான இரண்டாவது டெஸ்ட் போட்டியில், இந்திய அணி 7 விக்கெட் வித்தியாசத்தில் அபார வெற்றி பெற்று பல்வேறு சாதனைகளை படைத்துள்ளது. வெஸ்ட் இண்டீஸ் அணிக்கு எதிரான டெஸ்ட் தொடர் வெற்றி சாதனையை இந்தியா மேலும் நீட்டித்துள்ளது. இந்த தொடரை இழந்த வெஸ்ட் இண்டீஸ் அணி பல கசப்பான சாதனைகளை பதிவு செய்துள்ளது. குறிப்பாக கடந்த 21 ஆண்டுகளாக, இந்தியாவுக்கு எதிராக 27 டெஸ்ட் போட்டிகளில் ஆடி ஒரு வெற்றியை கூட பெற முடியாமல் உள்ளது.

வெஸ்ட் இண்டீஸ் அணியின் கேப்டன் ரோஸ்டன் சேஸ், தனது கேப்டன்சி பயணத்தில் ஒரு மோசமான சாதனையைப் பதிவு செய்துள்ளார். கிரெய்க் பிராத்வைட்டைத் தொடர்ந்து, தனது முதல் ஐந்து டெஸ்ட் போட்டிகளிலும் தோல்வியைச் சந்தித்த இரண்டாவது வெஸ்ட் இண்டீஸ் கேப்டன் என்ற சோகமான பெருமையை அவர் பெற்றுள்ளார். ஏற்கனவே, மோசமாக விளையாடி வரும் வெஸ்ட் இண்டீஸ் அணிக்கு இது மேலும் ஒரு அடியை கொடுத்துள்ளது.

இந்திய மண்ணில் தொடரும் தோல்விப் பயணம்

இந்திய மண்ணில் வெஸ்ட் இண்டீஸ் அணியின் தோல்விப் பயணம் தொடர்கிறது. 2013-ஆம் ஆண்டிலிருந்து இந்தியாவுக்கு எதிராக இந்திய மண்ணில் வெஸ்ட் இண்டீஸ் அணி தொடர்ச்சியாக 6 டெஸ்ட் போட்டிகளில் தோல்வியைச் சந்தித்துள்ளது.

இந்தியாவுக்கு எதிராக இந்திய மண்ணில் தொடர்ச்சியான டெஸ்ட் தோல்விகள்:

• ஆஸ்திரேலியா: 7 (2008-13)
• இலங்கை: 6 (1986-94)
• நியூசிலாந்து: 6 (2010-16)
• வெஸ்ட் இண்டீஸ்: 6 (2013-25)

அசைக்க முடியாத இந்தியா

வெஸ்ட் இண்டீஸ் அணிக்கு எதிராக இந்திய அணி, டெஸ்ட் கிரிக்கெட்டில் ஒரு அசைக்க முடியாத சக்தியாக உருவெடுத்துள்ளது. 2002-ஆம் ஆண்டிலிருந்து சுமார் 21 ஆண்டுகளாக வெஸ்ட் இண்டீஸ் அணிக்கு எதிராக இந்தியா 27 டெஸ்ட் போட்டிகளில் தோல்வியே சந்திக்கவில்லை. இது, ஒரு குறிப்பிட்ட எதிரணிக்கு எதிராக இந்தியா பெற்றுள்ள இரண்டாவது மிக நீண்ட தோல்வியற்ற பயணமாகும்.

ஒரு குறிப்பிட்ட எதிரணிக்கு எதிராக டெஸ்ட் போட்டிகளில் நீண்ட கால தோல்வியற்ற பயணம்

• இங்கிலாந்து vs நியூசிலாந்து: 47 (1930-75)
• இங்கிலாந்து vs பாகிஸ்தான்: 30 (1961-82)
• வெஸ்ட் இண்டீஸ் vs இங்கிலாந்து: 29 (1976-88)
• இந்தியா vs வெஸ்ட் இண்டீஸ்: 27 (2002-23)
• ஆஸ்திரேலியா vs தென்னாப்பிரிக்கா: 24 (1911-52)

தொடர் வெற்றிகள்

டெஸ்ட் தொடர் வெற்றிகளிலும் இந்திய அணி புதிய சாதனை படைத்துள்ளது. வெஸ்ட் இண்டீஸ் அணிக்கு எதிராக இந்தியா தொடர்ச்சியாக 10 டெஸ்ட் தொடர்களை வென்றுள்ளது. இது, டெஸ்ட் கிரிக்கெட் வரலாற்றில், ஒரு குறிப்பிட்ட எதிரணிக்கு எதிராக ஒரு அணி பெற்றுள்ள அதிகபட்சத் தொடர் வெற்றிகளில் ஒன்றாகும். தென்னாப்பிரிக்கா அணி வெஸ்ட் இண்டீஸ் அணிக்கு எதிராகப் பெற்றுள்ள 10 தொடர் வெற்றிகளுடன் இந்தச் சாதனையை இந்தியா சமன் செய்துள்ளது.

ஒரு குறிப்பிட்ட எதிரணிக்கு எதிராக டெஸ்ட் தொடர்களில் அதிக தொடர் வெற்றிகள்:

• இந்தியா vs வெஸ்ட் இண்டீஸ்: 10 (2002-25)
• தென்னாப்பிரிக்கா vs வெஸ்ட் இண்டீஸ்: 10 (1998-24)
• ஆஸ்திரேலியா vs வெஸ்ட் இண்டீஸ்: 9 (2000-22)
• ஆஸ்திரேலியா vs இங்கிலாந்து: 8 (1989-2003)

போட்டியின் சுருக்கம்

டெல்லி டெஸ்ட்டில், இந்திய அணி முதல் இன்னிங்ஸில் 518/5 ரன்கள் குவித்து டிக்ளேர் செய்தது. வெஸ்ட் இண்டீஸ் அணி முதல் இன்னிங்ஸில் 248 ரன்கள் மட்டுமே எடுத்தது. ஃபாலோ-ஆன் பெற்ற வெஸ்ட் இண்டீஸ் அணி, இரண்டாவது இன்னிங்ஸில் ஜான் கேம்ப்பெல் (115) மற்றும் ஷாய் ஹோப் (103) ஆகியோரின் அபார சதங்களால் 390 ரன்கள் குவித்து, இந்திய அணிக்கு 121 ரன்கள் என்ற இலக்கை நிர்ணயித்தது.

இந்திய அணி, கே.எல். ராகுலின் பொறுப்பான ஆட்டத்தால் (58)* 3 விக்கெட் இழப்பிற்கு 124 ரன்கள் குவித்து வெற்றி பெற்றது. வெஸ்ட் இண்டீஸ் அணி இந்தப் போட்டியில் சிறப்பான போராட்ட குணத்தை வெளிப்படுத்தியிருந்தாலும், தொடர் தோல்விகளின் சுழற்சியிலிருந்து அவர்களால் மீள முடியவில்லை.