இந்தியா - தென்னாப்பிரிக்கா சூப்பர் 8 போட்டி.. மழை வர வாய்ப்பு உள்ளதா? அகமதாபாத் வானிலை அறிக்கை

அகமதாபாத்: 2026 டி20 உலகக்கோப்பை தொடரின் சூப்பர் 8 சுற்றில் நடைபெறும் முக்கியமான ஆட்டத்தில் இந்திய அணி, தென்னாப்பிரிக்காவை எதிர்கொள்கிறது. அகமதாபாத்தில் உள்ள நரேந்திர மோடி மைதானத்தில் இந்தப் போட்டி நடைபெற உள்ளது. நடப்பு உலகக்கோப்பையில் இந்திய அணிக்கு இது முதல் முக்கிய சவாலாக இருக்கும் என எதிர்பார்க்கப்படுகிறது.

தோல்வியே சந்திக்காத இரு அணிகள்

லீக் சுற்றில் இரு அணிகளுமே தாங்கள் விளையாடிய 4 போட்டிகளிலும் வெற்றி பெற்று தோல்வியடையாத அணிகளாக வலம் வருகின்றன. ஏ பிரிவில் இடம்பெற்றிருந்த இந்திய அணி அமெரிக்கா, நமீபியா, பாகிஸ்தான் மற்றும் நெதர்லாந்து ஆகிய அணிகளை வீழ்த்தி முதலிடம் பிடித்தது. இந்திய அணியின் பேட்டிங் வரிசையில் சற்று தடுமாற்றம் தெரிந்தாலும், பந்துவீச்சாளர்களின் சீரான ஆட்டம் வெற்றியைத் தேடித் தந்தது.

மறுபுறம் டி பிரிவில் இடம்பெற்றிருந்த தென்னாப்பிரிக்க அணி கனடா, ஆப்கானிஸ்தான், நியூசிலாந்து மற்றும் ஐக்கிய அரபு அமீரகம் ஆகிய அணிகளை வீழ்த்தி முதலிடம் பிடித்தது. அந்த அணியின் பேட்டிங் மற்றும் பந்துவீச்சு என இரண்டுமே வலுவாக உள்ளன.

அகமதாபாத் வானிலை அறிக்கை

ரசிகர்கள் ஆவலுடன் எதிர்பார்க்கும் இந்தப் போட்டியில் மழையின் குறுக்கீடு இருக்குமா என்ற கேள்வி எழுந்துள்ளது. ஆனால், அகமதாபாத் வானிலை அறிக்கை ரசிகர்களுக்கு மகிழ்ச்சி அளிக்கும் வகையிலேயே உள்ளது. பிற்பகல் 1 மணி முதல் 4 மணி வரை: வெப்பநிலை 34 டிகிரி செல்சியஸாக இருக்கும். வானம் தெளிவாகவும், சற்று வெப்பமாகவும் இருக்கும். மழைக்கு எவ்வித வாய்ப்பும் இல்லை.
மாலை 5 மணி முதல் 7 மணி வரை, வெப்பநிலை 28 டிகிரி செல்சியஸாகக் குறையும். வானம் தெளிவாகவே காணப்படும். மழையின் குறுக்கீடு இருக்காது. இரவு 8 மணி முதல் 11 மணி வரை, வெப்பநிலை 25 டிகிரி செல்சியஸாக இருக்கும். இரவு மின்விளக்கு ஒளியில் போட்டி நடைபெறும் போது வானம் மிகவும் தெளிவாக இருக்கும். மழை பெய்ய வாய்ப்பில்லை.

சர்வதேச கிரிக்கெட் கவுன்சில் விதிகளின்படி, சூப்பர் 8 சுற்றுப் போட்டிகளுக்கு மாற்று நாள் (ரிசர்வ் நாள்) கிடையாது. ஒருவேளை மழையால் ஆட்டம் பாதிக்கப்பட்டால், இரு அணிகளும் குறைந்தபட்சம் 5 ஓவர்கள் விளையாட வேண்டும். அதற்கும் வாய்ப்பில்லை என்றால் போட்டி கைவிடப்பட்டு, முடிவில்லாத போட்டியாக அறிவிக்கப்படும். ஆனால், வானிலை அறிக்கையின்படி அகமதாபாத்தில் மழை பெய்ய வாய்ப்பில்லை என்பதால் ரசிகர்கள் எவ்வித தடையுமின்றி முழுமையான 40 ஓவர் போட்டியைக் கண்டு மகிழலாம்.

இரு அணிகளின் வீரர்கள் விவரம்:

இந்திய அணி: சூர்யகுமார் யாதவ், அபிஷேக் சர்மா, இஷான் கிஷன், திலக் வர்மா, ஷிவம் துபே, ஹர்திக் பாண்டியா, ரிங்கு சிங், வாஷிங்டன் சுந்தர், அர்ஷ்தீப் சிங், ஜஸ்பிரித் பும்ரா, வருண் சக்கரவர்த்தி, சஞ்சு சாம்சன், குல்தீப் யாதவ், அக்சர் படேல், முகமது சிராஜ்.

தென்னாப்பிரிக்க அணி: எய்டன் மார்க்ரம், குயின்டன் டி காக், ரியான் ரிக்கெல்டன், டெவால்ட் பிரேவிஸ், டிரிஸ்டன் ஸ்டப்ஸ், ஜேசன் ஸ்மித், ஜார்ஜ் லிண்டே, கார்பின் போஷ், காகிசோ ரபாடா, அன்ரிக் நோர்க்கியா, குவேனா மபாகா, டேவிட் மில்லர், லுங்கி நிகிடி, கேஷவ் மகாராஜ், மார்கோ ஜான்சன்.