"யார்க்கர் எப்படி வீச வேண்டும் என்பதை காட்டிவிட்டனர்".. இந்தியாவிடம் தோற்ற பின் ஷாய் ஹோப் பேச்சு

இந்தூர்: இந்திய அணிக்கு எதிரான 3-வது டி20 போட்டியில் வெஸ்ட் இண்டீஸ் அணி 14 ரன்கள் வித்தியாசத்தில் தோல்வி அடைந்தது. இந்த தோல்விக்குப் பிறகு, இந்திய வேகப்பந்து வீச்சாளர்கள் மிகச் சிறப்பாகப் பந்துவீசி தங்களுக்குப் பாடம் கற்பித்துவிட்டதாக வெஸ்ட் இண்டீஸ் கேப்டன் ஷாய் ஹோப் மனம் திறந்து பேசினார்.

இந்தூரில் நடைபெற்ற 3-வது டி20 போட்டியில் முதலில் பேட்டிங் செய்த இந்திய அணிக்கு அபிஷேக் சர்மா அதிரடி தொடக்கம் அளித்து 69 ரன்கள் குவித்தார். இந்திய அணி 20 ஓவர்களில் 223 ரன்கள் குவித்தது. தொடர்ந்து 224 ரன்கள் என்ற கடின இலக்கை நோக்கி ஆடிய வெஸ்ட் இண்டீஸ் அணியில் ஷிம்ரான் ஹெட்மயர் 43 ரன்களும், கமில் பூரன் 42 ரன்களும் எடுத்து மிரட்டினர். எனினும் அர்ஷ்தீப் சிங் 3 விக்கெட்டுகளை வீழ்த்தி அச்சுறுத்த, வெஸ்ட் இண்டீஸ் அணி 20 ஓவர்களில் 7 விக்கெட் இழப்பிற்கு 209 ரன்கள் மட்டுமே எடுத்து 14 ரன்கள் வித்தியாசத்தில் தோல்வியடைந்தது.

இந்தத் தோல்விக்குப் பிறகு வெஸ்ட் இண்டீஸ் கேப்டன் ஷாய் ஹோப் பேசுகையில், "கிரிக்கெட் ஆட்டத்தில் சிறிய தவறுகள் கூட மிகப்பெரிய பாதிப்பை ஏற்படுத்திவிடும். வெற்றி பெறும் அணிகள் முக்கிய தருணங்களை தங்களுக்குச் சாதகமாக மாற்றிக் கொள்கின்றன. பந்துவீச்சில் நாங்கள் இன்னும் துல்லியமாகச் செயல்பட்டிருக்க வேண்டும். தொடக்க ஓவர்களில் தேவையில்லாமல் அதிக பவுண்டரிகளை விட்டுக்கொடுத்துவிட்டோம்.

அபிஷேக் சர்மா மற்றும் இஷான் கிஷனின் ஆபத்தான கூட்டணியை ரோஸ்டன் சேஸ் மூலம் உடைத்து, நாங்கள் ஆட்டத்திற்குள் மீண்டும் வந்தது பாராட்டுக்குரியது. எனினும் சேஸிங்கில் வெற்றியை எட்ட எங்களுக்கு வலுவான தொடக்க பார்ட்னர்ஷிப் தேவைப்பட்டது. அதற்காக ஒன்று அல்லது இரண்டு வீரர்களை மட்டுமே நான் குறை கூற மாட்டேன்.

இந்திய அணியின் வெற்றிக்கு காரணமே இதுதான்.. த்ரில் வெற்றிக்குப் பின் கேப்டன் ஸ்ரேயாஸ் ஐயர் பேச்சு

கடைசி கட்டத்தில் இந்திய பந்துவீச்சாளர்களின் செயல்பாட்டைப் பாராட்டியே ஆக வேண்டும். அவர்கள் மிக அற்புதமாகப் பந்துவீசினர். டெத் ஓவர்களில் மிகத் துல்லியமாக யார்க்கர்களை எப்படி வீச வேண்டும் என்பதை இந்திய பந்துவீச்சாளர்கள் எங்களுக்குச் செய்து காட்டிவிட்டனர். அந்தப் பெருமை இந்திய பவுலர்களையே சாரும்" என்று ஷாய் ஹோப் தெரிவித்தார்.