"சாம்பியன்" பட்டம்... கொல்கத்தா, ராஜஸ்தான், டெக்கான், ஹைதராபாத் "சென்டம்"

6வது சாம்பியன் சன்ரைசர்ஸ்

ஐபிஎல் தொடரின் 6வது சாம்பியன் சன்ரைசர்ஸ் ஹைதராபாத். ஹைதரபாத்தைச் சேர்ந்த ஒரு அணி சாம்பியன் பட்டத்தைத் தட்டிச் செல்வது இது 2வது முறையாகும்.

2வது ஹைதராபாத் அணி

இதற்கு முன்பு 2009ம் ஆண்டு ஹைதராபாத் டெக்கான் சார்ஜர்ஸ் அணி சாம்பியனாகியிருந்தது. அப்போது கேப்டனாக இருந்தவர் ஆஸ்திரேலியாவின் கில்கிறைஸ்ட் ஆவார். சன்ரைசர்ஸ் அணியின் கேப்டனாக தற்போது இருக்கும் டேவிட் வார்னரும் ஆஸ்திரேலியர்தான் என்பது குறிப்பிடத்தக்கது.

பெங்களூரின் துரதிர்ஷ்டம்

ராயல் சேலஞ்சர்ஸ் பெங்களூரு அணி இதுவரை 3 முறை இறுதிப் போட்டிக்குத் தகுதி பெற்றும் கூட மூன்று முறையும் தோல்வியையே தழுவியுள்ளது.

நான்கு பெஸ்ட் அணிகள்

சாம்பியன் பட்டம் வெல்வதில் 100 சதவீத வெற்றியைப் பெற்றவை நான்கு அணிகள் மட்டுமே. அவை கொல்கத்தா நைட் ரைடர்ஸ், ராஜஸ்தான் ராயல்ஸ், டெக்கான் சார்ஜர்ஸ் ஹைதராபாத், சன் ரைசர்ஸ் ஹைதராபாத்.

கொல்கத்தா 2 முறை

கொல்கத்தா அணி 2012, 2014 ஆகிய இரு ஆண்டுகளில் இறுதிப் போட்டிக்குத் தகுதி பெற்றது. இரண்டு முறையும் அது கோப்பையை தட்டிச் சென்றது. அதன் வெற்றி சதவீதம் 100 சதவீதமாகும்.

ராஜஸ்தான் - டெக்கான்- சன்ரைசர்ஸ்

அதேபோல ராஜஸ்தான் அணி 2008ல் இறுதிப் போட்டிக்கு வந்து அதில் வெற்றியும் பெற்றது. ராஜஸ்தான்தான் முதல் ஐபிஎல் சாம்பின் ஆகும். டெக்கான் சார்ஜர்ஸ் அணி 2009ல் தகுதி பெற்று கோப்பையைத் தட்டிச் சென்றது. தற்போது சன்ரைசர்ஸ் அணி 2016ல் முதல் முறையாக இறுதிப் போட்டிக்கு வந்து கோப்பையை வென்றுள்ளது.

மும்பை இந்தின்ஸ் 66.66%

மும்பை இந்தியன்ஸ் அணி 2013, 2015, 2010 ஆகிய ஆண்டுகளில் இறுதிப் போட்டிக்கு முன்னேறியது. இதில் 2010ல் அது தோல்வியுற்றது. மற்ற இரு ஆண்டுகளிலும் சாம்பியன் ஆனது. அதன் வெற்றி சதவீதம் 66.66 சதவீதமாகும்.

சென்னை சூப்பர் கிங்ஸ்

சென்னை சூப்பர் கிங்ஸ் அணி மட்டுமே அதிக முறை இறுதிப் போட்டிக்குத் தகுதி பெற்ற ஒரே அணியாகும். அதாவது 6 முறை அது இறுதிப் போட்டிக்குப் போயுள்ளது. 2008, 2010, 2011, 2012, 2013, 2015 ஆகிய ஆண்டுகளில் அது இறுதிப் போட்டிக்கு வந்தது. ஆனால் 2010, 11 ஆகிய இரு முறை மட்டுமே அது சாம்பியன் ஆனது. அதன் வெற்றி சதவீதம் 33.33 சதவீதம்தான்.

கிங்ஸ் லெவன் பஞ்சாப் - பெங்களூருக்கு முட்டை!

கிங்ஸ் லெவன் பஞ்சாப் அணி 2014ல் இறுதிப் போட்டிக்கு வந்தது. ஆனால் தோல்வியைத் தழுவியது. இதேபோல ராயல் சேலஞ்சர்ஸ் பெங்களூரு அணி 2009, 2011, 2016 ஆகிய ஆண்டுகளில் இறுதிப் போட்டிக்கு வந்தது. ஆனால் தோல்வியுற்றது. இரு அணிகளின் வெற்றி சதவீதம் ஜீரோவாகும்.