ரோஹித் - விராட் கோலி ரசிகர்களுக்கு செம்ம ட்ரீட்.. 2026-ல் எத்தனை ஒருநாள் போட்டிகள்? முழு லிஸ்ட்

மும்பை: 2025-ம் ஆண்டு இந்திய ஒருநாள் கிரிக்கெட் அணிக்கு ஒரு பொற்காலமாக அமைந்தது என்றால் அது மிகையல்ல. சாம்பியன்ஸ் டிராபி வெற்றி, இங்கிலாந்துக்கு எதிரான வைட்வாஷ் வெற்றி, தென்னாப்பிரிக்காவுக்கு எதிரான தொடர் வெற்றி என இந்திய அணி கலக்கி எடுத்தது. குறிப்பாக, ரோஹித் சர்மா மற்றும் விராட் கோலி ஆகிய இரு ஜாம்பவான்களும் விமர்சகர்களின் வாயை அடைக்கும் வகையில் அபாரமான ஆட்டத்தை வெளிப்படுத்தினர்.

டெஸ்ட் மற்றும் டி20 போட்டிகளில் இருந்து ஓய்வு பெற்றுவிட்ட இந்த இரு ஜாம்பவான்களையும், இனி ஒருநாள் போட்டிகளில் (ODI) மட்டுமே பார்க்க முடியும். இதனால், 2026-ம் ஆண்டில் இவர்கள் எத்தனை போட்டிகளில் விளையாடுவார்கள்? இந்திய அணியின் அட்டவணை என்ன? என்பதைத் தெரிந்துகொள்ள ரசிகர்கள் ஆவலோடு காத்திருக்கின்றனர்.

ஒரே குறி.. 2027 உலகக்கோப்பை!

ரோஹித் மற்றும் கோலி ஆகிய இருவருமே தற்போது ஒருநாள் போட்டி வீரர்களாக மாறிவிட்டனர். இவர்களது முழு கவனமும் 2027-ல் நடைபெறவுள்ள ஒருநாள் உலகக்கோப்பை மீதுதான் உள்ளது. எனவே, உடல் தகுதியை நிரூபிக்கவும், ஃபார்மை தக்கவைக்கவும் கிடைக்கும் அனைத்து ஒருநாள் போட்டிகளிலும் இவர்கள் விளையாடுவார்கள் என எதிர்பார்க்கப்படுகிறது.

முன்பெல்லாம் ஆப்கானிஸ்தான், ஜிம்பாப்வே போன்ற சிறிய அணிகளுக்கு எதிராக சீனியர்களுக்கு ஓய்வு வழங்கப்படும். ஆனால், இப்போது இவர்கள் டெஸ்ட், டி20 ஆடுவதில்லை என்பதால், ஆப்கானிஸ்தான் தொடரில் கூட ரோஹித் - கோலி கூட்டணியைப் பார்க்க அதிக வாய்ப்புள்ளது.

2026-ல் இந்தியா விளையாடவுள்ள ஒருநாள் தொடர்கள்:

2026-ம் ஆண்டில் இந்திய அணி மொத்தம் 6 ஒருநாள் தொடர்களில் விளையாடத் திட்டமிடப்பட்டுள்ளது. தோராயமாக 18 போட்டிகள் உறுதி செய்யப்பட்டுள்ளன.

நியூசிலாந்து (உள்நாடு): ஜனவரி மாதம் நியூசிலாந்து அணி இந்தியா வருகிறது. 3 போட்டிகள் கொண்ட இந்தத் தொடரில் ரோஹித், கோலி பங்கேற்பது உறுதி.

ஆப்கானிஸ்தான் (உள்நாடு): இந்திய மண்ணில் ஆப்கானிஸ்தான் அணிக்கு எதிராக 3 போட்டிகள் கொண்ட தொடர் நடைபெறவுள்ளது.

இங்கிலாந்து (வெளிநாடு): இந்திய அணி இங்கிலாந்துக்குச் சுற்றுப்பயணம் மேற்கொண்டு 3 ஒருநாள் போட்டிகளில் விளையாடுகிறது. இது மிக முக்கியமான தொடராகும்.

வெஸ்ட் இண்டீஸ் (உள்நாடு): வெஸ்ட் இண்டீஸ் அணி இந்தியா வந்து 3 போட்டிகளில் விளையாடவுள்ளது.

நியூசிலாந்து (வெளிநாடு): ஆண்டின் இறுதியில் இந்திய அணி நியூசிலாந்துக்குச் சென்று 3 போட்டிகளில் விளையாடவுள்ளது.

இலங்கை (உள்நாடு): இலங்கை அணிக்கு எதிராகவும் 3 போட்டிகள் கொண்ட தொடர் திட்டமிடப்பட்டுள்ளது.

மொத்தம் எத்தனை போட்டிகள்?

மேற்கண்ட அட்டவணைப்படி பார்த்தால், ரோஹித் சர்மாவும் விராட் கோலியும் 2026-ல் குறைந்தது 18 ஒருநாள் போட்டிகளில் விளையாடுவார்கள். இதுபோக, அரசியல் காரணங்களால் ஒத்திவைக்கப்பட்ட வங்கதேசத்திற்கு எதிரான தொடரும் இந்த ஆண்டில் நடத்தப்பட்டால், போட்டிகளின் எண்ணிக்கை இன்னும் அதிகரிக்கலாம்.

2026-ம் ஆண்டு ரோஹித் மற்றும் கோலி ரசிகர்களுக்கு ஒரு கொண்டாட்டமான ஆண்டாக இருக்கப்போகிறது. 2027 உலகக்கோப்பைக்கான முன்னோட்டமாக இந்த 18 போட்டிகளும் அமையும் என்பதில் சந்தேகமில்லை.