ஸ்மித்தின் அதிரடியால் ராஜஸ்தானுக்கு 'ஹாட்ரிக்' வெற்றி! மும்பை இந்தியன்ஸ் அணி 'ஹாட்ரிக் தோல்வி'!!

பின்ச் காயம்

தொடக்க வீரர்களாக ஆரோன் பின்ச் மற்றும் பார்திவ் படேல் களமிறங்கினார்கள். அதிரடியாக விளையாடிய பின்ச் 10 ரன் எடுத்திருந்த போது தொடை பகுதியில் ஏற்பட்ட காயத்தால் தொடர்ந்து விளையாட முடியாமல் வெளியேறினார்.

கேப்டன் ரோகித் 'டக் அவுட்'

பார்திவ் படேல் 16 ரன் எடுத்திருந்த நிலையில் குல்கர்னி பந்து வீச்சில் அவுட் ஆனார். அடுத்து களமிறங்கிய உன்மூகத் சந்த் 16 ரன்கள் மட்டுமே எடுத்து அவுட் ஆனார். இந்த முறை நடுகள வீரராக களமிறங்கிய கேப்டன் ரோகித் சர்மா டக் அவுடாகி அனைவரையும் ஏமாற்றினார்.

பொல்லார்டு- ஆண்டர்சன் அபாரம்

இதனால் 10 ஒவரில் 3 விக்கெட்டுகளை இழந்து 45 ரன்கள் என தடுமாறிக் கொண்டிருந்தது மும்பை அணி. அப்போது ஜோடி சேர்ந்த பொல்லார்டு- ஆண்டர்சன் இருவரும் முதலில் மெதுவாக ஆடி ரன் எடுத்தனர். பின்னர் பொல்லார்டு தனது வழக்கமான அதிரடி ஆட்டத்தை தொடங்கினார். மறுமுனையில் இருந்த ஆண்டர்சனும் தனது பங்குக்கு பவுண்டரிகளை விரட்டியப்படி இருந்தார்.

இந்த ஜோடி 9 ஒவரில் 104 ரன்களை குவித்தது. பொல்லார்டு 34 பந்துகளில் 70 ரன்கள் எடுத்து 19 ஒவரின் கடைசி பந்தில் அவுட் ஆனார். ஆண்டர்சனும் 38 பந்துகளில் 50ரன்கள் எடுத்து கடைசி ஒவரில் அவுட் ஆனார். இறுதியில் மும்பை அணி 5 விக்கெட்டுகள் இழப்புக்கு 164 ரன்கள் எடுத்தது.

"சூப்பர்" குல்கர்னி

ராஜஸ்தான் ராயல்ஸ் தரப்பில் டிம் சவுதி 4 ஒவரில் 46 ரன்களை விட்டுக்கொடுத்து 1 விக்கெட் எடுத்தார். அந்த அணியில் குல்கர்னி மட்டும் சிறப்பாக பந்து வீசி 3 ஒவரில் 15 ரன்களை மட்டுமே விட்டுகொடுத்து 1 விக்கெட்டை விழ்த்தினார்.

சாம்சன் அவுட்

165 ரன்கள் எடுத்தால் வெற்றி என்ற இலக்குடன் பேட்டிங்கை தொடங்கிய ராஜஸ்தான் ராயல்ஸ் அணியின் தொடக்க ஆட்டகாரர்களாக ரகானேவும் சஞ்சு சாம்ஸனும் களமிறங்கினர். வேகமாக ரன் குவிக்க தடுமாறிய சாம்சன் 16 பந்துகளில் 17 ரன்கள் எடுத்து வினய் குமார் பந்தி வீச்சில் அவுட் ஆனார். இதன் பிறகு ரகானேவுடன் ஜோடி சேர்ந்தார் கேப்டன் ஸ்மித்.

அடுத்தடுத்து விக்கெட்டுகள்

39 பந்துகளில் 46 ரன்கள் எடுத்திருந்த ரகானே, ஸ்ரேயாஸ் கோபால் பந்தை சிக்ஸர் அடிக்க முயற்சித்து கேட்சானார். கடந்த இரு போட்டிகளிலும் ராஜஸ்தான் ராயல்ஸ் அணியின் வெற்றிக்கு முக்கிய காரணமாக விளங்கிய தீபக் ஹூடா வந்த வேகத்தில் 2 சிக்சர்களை பறக்கவிட்ட நிலையில் மலிங்கா பந்தில் கிளீன் போல்ட் ஆனார்.

அசத்திய ஸ்மித் - அபார வெற்றி

இதனால் ராஜஸ்தானின் வெற்றி ஸ்மித்தின் கையில் இருந்தது. இதை உணர்ந்து கொண்டு மும்பை அணியின் பந்துகளை துவம்சம் செய்தார் ஸ்மித். இறுதியில் ராஜஸ்தான் ராயல்ஸ் அணி 19.1 ஓவர்களில் 3 விக்கெட்டுக்கு 165 ரன்கள் குவித்து 7 விக்கெட் வித்தியாசத்தில் வெற்றி பெற்றது. ஸ்மித் 53 பந்துகளில் 79 ரன்களைக் குவித்தார். அவர் ஆட்ட நாயகனாக தேர்ந்தெடுக்கப்பட்டார்.

"ஹாட்ரிக்" வெற்றி- தோல்வி

இதன் மூலம் ராஜஸ்தான் தொடர்ந்து 3 'ஹாட்ரிக்' வெற்றிகளை பெற்று புள்ளி பட்டியலில் முதல் இடத்தில் உள்ளது. பஞ்சாப் மற்றும் டெல்லி அணிகளையும் ராஜஸ்தான் ஏற்கனவே தோற்கடித்திருந்தது. ஆனால் மும்பை அணியோ விளையாடிய 3 போட்டிகளிலும் 'ஹாட்ரிக்' தோல்லிவியடைந்து புள்ளி பட்டியலில் கடைசி இடத்தில் உள்ளது.