வயசான அணியா?.. எங்க திரும்ப சொல்லுங்க.. ஒரே போட்டியில் சிஎஸ்கேவின் வியக்க வைக்கும் 5 சாதனை!

அதிக 200+ ரன்கள்

சென்னை அணி நேற்று 211 ரன்கள் எடுத்தது. இது சென்னை அடிக்கும் 16 வது 200+ ரன் ஆகும். ஐபிஎல் போட்டியில் அதிக முறை 200க்கும் அதிகமான ரன்கள் எடுத்தது சென்னை மட்டுமே. இதில் பெங்களூர் அணி 200க்கு அதிகமான ரன்களை 14 முறை எடுத்து இரண்டாம் இடத்தில் உள்ளது. அதேபோல் சென்னை அணிக்கு 200க்கும் அதிகமாக இலக்கு வைத்தால் அதில் 90 சதவிகித போட்டிகளில் வெற்றிபெற்று இருக்கிறது.

அதிக வெற்றி

சென்னை அணி ஐபிஎல் போட்டியில் அதிக வெற்றிகளை பெற்ற இரண்டாவது அணியாக மாறியுள்ளது. சென்னை மொத்தமாக 100 போட்டிகளை வென்றுள்ளது. மும்பை 105 போட்டிகளை வென்று முதல் இடத்தில் உள்ளது. இரண்டு சீசன்களில் விளையாடாமல் சென்னை அணி இப்படி ஒரு சாதனை செய்துள்ளது.

தோனி சாதனை

நேற்றைய போட்டியில் மொத்தம் 22 பந்துகள் பிடித்த தோனி 5 சிக்ஸ் அடித்தார். அதேபோல் 2 பவுண்டரி அடித்தார். மொத்தமாக 51 ரன்கள் எடுத்து டெல்லிக்கு 211 ரன்கள் இலக்கு நிர்ணயம் செய்தார். இதன் மூலம் கேப்டனாக தோனி 3557 ரன்கள் எடுத்துள்ளார். ஐபிஎல் போட்டியில் ஒருவர் கேப்டனாக எடுத்த அதிக ரன் இதுதான். இரண்டாவதாக கம்பீர் 3518 ரன்கள் எடுத்து இருக்கிறார்.

அதிகம்

புனே மைதானத்தில் அடிக்கப்பட்ட அதிகபட்ச ஸ்கோர் இதுதான். சென்னை அணி நேற்று 211 ரன்கள் எடுத்தது. இதற்கு முன் புனே மைதானத்தில் இவ்வளவு ரன்கள் எந்த அணியும் எடுத்தது இல்லை. இதே புனே மைதானத்தில் டெல்லி அணி அப்போது இருந்த புனே அணிக்கு எதிராக 205 ரன்கள் எடுத்து இருந்ததே பெரிய ஸ்கோராக இருந்தது.

இன்னொரு சாதனை

இதில் தோனி இன்னொரு சாதனை செய்துள்ளார். நேற்று 22 பந்துகளில் அரைசதம் அடித்தார். இது இவரது இரண்டாவது வேகமான அரைசதம் ஆகும். இதற்கு முன்பு இவர் சாம்பியன்ஸ் லீக் போட்டியில் 16 பந்துகளில் 2013ல் அரைசதம் அடித்தார் என்பது குறிப்பிடத்தக்கது.