பும்ரா, போல்ட் தந்த அடி.. ஆல் அவுட்.. மும்பையிடம் படுதோல்வி அடைந்த ராஜஸ்தான்!

மும்பை - ராஜஸ்தான் போட்டி

2020 ஐபிஎல் தொடரில் மும்பை இந்தியன்ஸ் - ராஜஸ்தான் ராயல்ஸ் அணிகள் இடையே ஆன போட்டி அபுதாபியில் நடைபெற்றது. இந்தப் போட்டியில் மும்பை அணி டாஸ் வென்று பேட்டிங் தேர்வு செய்தது. அந்த அணி முழு பலத்துடன் களமிறங்கியது.

ராஜஸ்தான் ராயல்ஸ் மாற்றம்

ராஜஸ்தான் ராயல்ஸ் அணி கடந்த இரண்டு போட்டிகளில் தோல்வி அடைந்ததால் வெற்றி பெற்றே ஆக வேண்டிய கட்டாயத்தில் களமிறங்கியது. அந்த அணியில் கடந்த போட்டிகளில் சரியாக செயல்படாத உள்ளூர் வீரர்களை நீக்கி விட்டு, கார்த்திக் தியாகி, யாஷஸ்வி ஜெய்ஸ்வால், அங்கித் ராஜ்புத் சேர்க்கப்பட்டனர்.

மும்பை பேட்டிங்

மும்பை அணியின் துவக்க வீரர்களாக டி காக், ரோஹித் சர்மா களமிறங்கினர். முந்தைய போட்டியில் சிறப்பாக ஆடிய டி காக் இந்தப் போட்டியில் 23 ரன்கள் மட்டுமே எடுத்தார். ரோஹித் சர்மா 35 ரன்கள் எடுத்து ஆட்டமிழந்தார்.

டக் அவுட்

இஷான் கிஷன் டக் அவுட் ஆகி ஏமாற்றம் அளித்தார். ரோஹித் சர்மா ஆட்டமிழந்த அடுத்த பந்தில் அவர் ஆட்டமிழந்து இருந்தார். இந்த நிலையில், சூர்யகுமார் யாதவ் நிலைத்து நின்று ஆடினார். அதிரடியாக ஆடினாலும் விக்கெட்டை தற்காத்துக் கொண்டார்.

சூர்யகுமார் யாதவ்

பொல்லார்டு இடத்தில் பேட்டிங் செய்ய வந்த க்ருனால் பாண்டியா நிதான ஆட்டம் ஆடி 12 ரன்கள் மட்டுமே எடுத்தார். சூர்யகுமார் யாதவ் கடைசி வரை களத்தில் நின்று 79 ரன்கள் குவித்தார். ஹர்திக் பாண்டியா 19 பந்துகளில் 30 ரன்கள் எடுத்தார்

ராஜஸ்தான் பந்துவீச்சு

மும்பை அணி 20 ஓவர்களில் 193 ரன்கள் எடுத்து 4 விக்கெட்கள் இழந்து இருந்தது. ராஜஸ்தான் அணியின் பந்துவீச்சில் ஸ்ரேயாஸ் கோபால், ராகுல் திவேதியா மட்டுமே ஓரளவு கட்டுக்கோப்பாக வீசி இருந்தனர். அறிமுக வீரர் கார்த்திக் தியாகி ஓரளவு ஈர்த்தார்.

பெரும் அதிர்ச்சி

அடுத்து 194 ரன்கள் என்ற இலக்கை நோக்கி ஆடிய ராஜஸ்தான் அணிக்கு ட்ரென்ட் போல்ட் - பும்ரா வேகப் பந்துவீச்சு ஜோடி பெரும் அதிர்ச்சி அளித்தது. முதல் 3 ஓவர்களில் போல்ட் 2, பும்ரா 1 விக்கெட் சாய்த்தனர். ஜெய்ஸ்வால் 0, ஸ்மித் 6, சஞ்சு சாம்சன் 0 என வரிசையாக ஆட்டமிழந்தனர்.

பட்லர் போராட்டம்

அடுத்து லோம்ரார் 11, டாம் கர்ரன் 15, ராகுல் திவேதியா 5 ரன்களில் ஆட்டமிழந்தனர், பட்லர் மட்டுமே தனியாக போராடி 44 பந்துகளில் 70 ரன்கள் எடுத்து வெளியேறினார். ராஜஸ்தான் அணி வெற்றிக்கு அருகேயே செல்லவில்லை.

அபார வெற்றி

ஆர்ச்சர் அதிரடியாக 11 பந்துகளில் 24 ரன்கள் எடுத்தாலும் அந்த அணி தோல்வியை நோக்கி சென்றது. 18.1 ஓவரில் அனைத்து விக்கெட்களையும் இழந்து 136 ரன்கள் மட்டுமே எடுத்தது. 57 ரன்கள் வித்தியாசத்தில் மும்பை இந்தியன்ஸ் அணி அபார வெற்றி பெற்றது.

பந்துவீச்சு

மும்பை அணியின் பந்துவீச்சில் பும்ரா அசத்தலாக செயல்பட்டு 4 ஓவர்களில் 20 ரன்கள் மட்டுமே கொடுத்து 4 விக்கெட் வீழ்த்தி இருந்தார். போல்ட் 2, பாட்டின்சன் 2, ராகுல் சாஹர் 1, பொல்லார்டு 1 விக்கெட் வீழ்த்தினர்.