IPL 2024 : 2 போட்டிகளில் தொடர் தோல்வி.. சரிந்த ரன்ரேட்.. புள்ளிப்பட்டியலில் சிஎஸ்கேவுக்கு எந்த இடம்?

ஐதராபாத் : சென்னை அணிக்கு எதிரான போட்டியில் ஐதராபாத் அணி வென்றதன் மூலமாக புள்ளிப்பட்டியல் நடந்துள்ள மாற்றங்களை பார்க்கலாம்.

சிஎஸ்கே அணிக்கு எதிரான போட்டியில் ஐதராபாத் அணி 6 விக்கெட்டுகள் வித்தியாசத்தில் அபார வெற்றியை பெற்றது. இந்த போட்டியில் முதலில் பேட்டிங் ஆடிய சிஎஸ்கே அணி 20 ஓவர்களில் 5 விக்கெட்டுகள் இழப்பிற்கு 165 ரன்கள் மட்டுமே சேர்த்தது. இதன்பின் களமிறங்கிய ஐதராபாத் அணி 18.1 ஓவர்களில் 4 விக்கெட்டுகள் இழப்பிற்கு 166 ரன்கள் சேர்த்து வெற்றிபெற்றது.

இதன் மூலமாக ஐதராபாத் அணி இந்த சீசனில் 2வது வெற்றியை பதிவு செய்துள்ளது. 4 போட்டிகளில் விளையாடியுள்ள ஐதராபாத் அணி 2 வெற்றி, 2 தோல்வியுடன் 4 புள்ளிகள் பெற்று 5வது இடத்திற்கு முன்னேறியுள்ளது. இந்த போட்டிக்கு முன்பாக 7வது இடத்தில் இருந்த ஐதராபாத் அணி, சிஎஸ்கே அணியை வீழ்த்தியதன் மூலமாக 5வது இடத்திற்கு வந்துள்ளது.

அதுமட்டுமல்லாமல் +0.204 என்ற ரன் ரேட்டில் இருந்து +0.409 என்ற ரன்ரேட் வரை முன்னேற்றம் கண்டுள்ளது. அதேபோல் இந்த போட்டிக்கு முன் சிஎஸ்கே அணி 4 புள்ளிகள் பெற்று 3வது இடத்தில் இருந்தது. இந்த போட்டியில் தோல்வியடைந்ததன் மூலமாக 2 வெற்றி, 2 தோல்விகளுடன் 3வது இடத்தில் நீடிக்கிறது. ஆனால் +0.976 என்ற ரன்ரேட்டில் இருந்த சிஎஸ்கே அணி +0.517 என்ற ரன்ரேட்டிற்கு குறைந்துள்ளது.

சொந்த மண்ணில் ஆடிய 2 போட்டிகளிலும் வென்ற சிஎஸ்கே, வெளி மைதானங்களில் விளையாடிய 2 போட்டிகளிலும் தோல்வியை சந்தித்துள்ளது. இதனால் சிஎஸ்கே அணி ரசிகர்களும் சோகத்தில் உள்ளனர். அதேபோல் ஐதராபாத் அணியின் முன்னேற்றத்தால் பஞ்சாப் அணி புள்ளிப்பட்டியலில் 5வது இடத்தில் இருந்து 6வது இடத்திற்கு தள்ளப்பட்டுள்ளது.

அதேபோல் 6வது இடத்தில் இருந்த குஜராத் அணி 4 புள்ளிகளுடன் 7வது இடத்திற்கு தள்ளப்பட்டுள்ளது. புள்ளிப்பட்டியலில் 3வது இடத்தில் இருந்து 7வது இடத்தில் இருக்கும் 5 அணிகள் 4 புள்ளிகளுடன் அடுத்தடுத்த இடங்களில் உள்ளது. இதனால் அடுத்தடுத்த போட்டிகள் நடக்கும் போது புள்ளிப்பட்டியலில் எண்ணற்ற மாற்றங்கள் இருக்கும் என்று எதிர்பார்க்கப்படுகிறது.