IPL 2026: 'லார்ட்' ஷர்துல் தாகூர்னா சும்மாவா.. மும்பை இந்தியன்ஸ் அறிமுகத்திலேயே 3 விக்கெட்!

மும்பை: 2026 ஐபிஎல் தொடரில் மும்பை இந்தியன்ஸ் அணிக்காகத் தனது முதல் போட்டியிலேயே விளையாடிய 'லார்ட்' ஷர்துல் தாகூர், கொல்கத்தா நைட் ரைடர்ஸ் அணிக்கு எதிராக 3 முக்கிய விக்கெட்டுகளை வீழ்த்தி அசத்தினார். இக்கட்டான நேரத்தில் விக்கெட்டுகளை வீழ்த்தி ஆட்டத்தின் போக்கை மாற்றியதால், சமூக வலைதளங்களில் ரசிகர்கள் அவரை 'லார்ட் ஃபார் ஏ ரீசன்' (Lord for a Reason) எனப் புகழ்ந்து தள்ளி வருகின்றனர்.

மும்பை வான்கடே மைதானத்தில் நடைபெற்ற இந்தப் போட்டியில் டாஸ் வென்ற மும்பை இந்தியன்ஸ் கேப்டன் ஹர்திக் பாண்டியா முதலில் பந்துவீச்சைத் தேர்வு செய்தார். ஆனால், கொல்கத்தா அணியின் தொடக்க வீரர்கள் அஜின்கியா ரஹானே மற்றும் ஃபின் ஆலன் ஆகியோர் ஆரம்பம் முதலே அதிரடி காட்டினர். பவர் பிளேயிலேயே அந்த அணி 1 விக்கெட் இழப்புக்கு 78 ரன்கள் குவித்து இமாலய ஸ்கோரை நோக்கி முன்னேறியது. மும்பை பந்துவீச்சாளர்கள் ரன்களைக் கட்டுப்படுத்த முடியாமல் திணறிய போது ஷர்துல் தாகூர் களம் இறக்கப்பட்டார்.

ஷர்துல் தாகூரின் மேஜிக்

முதல் போட்டியிலேயே துல்லியமாகப் பந்துவீசிய ஷர்துல் தாகூர், முதலில் அதிரடி வீரர் ஃபின் ஆலனை ஆட்டமிழக்கச் செய்தார். திலக் வர்மாவிடம் கேட்ச் கொடுத்து ஆலன் வெளியேறினார். அதன்பிறகு நிலைத்து நின்று விளையாட முயன்ற கேமரூன் கிரீனை, ஒரு ஷார்ட் பால் மூலம் ஷர்துல் வீழ்த்தினார். ஆனால், மிக முக்கியமான விக்கெட் ரஹானேவுடையது. 67 ரன்கள் எடுத்து மும்பை அணியைப் பயமுறுத்திக் கொண்டிருந்த கேப்டன் ரஹானேவை, ஹர்திக் பாண்டியாவிடம் கேட்ச் கொடுக்கச் செய்து வெளியேற்றினார் ஷர்துல்.

சமூக வலைதளங்களில் கொண்டாட்டம்

4 ஓவர்களில் 39 ரன்கள் விட்டுக்கொடுத்து 3 முக்கிய விக்கெட்டுகளை வீழ்த்திய ஷர்துல் தாகூரை ரசிகர்கள் இணையத்தில் கொண்டாடி வருகின்றனர். "லார்ட் ஷர்துல் தாகூர் எப்போதுமே இக்கட்டான நேரத்தில் விக்கெட் எடுக்கும் தங்கக் கைகளை கொண்டவர்" என்று ஒரு ரசிகர் பதிவிட்டுள்ளார். "வான்கடே மைதானத்தின் உள்ளூர் நாயகன் மீண்டும் நிரூபித்துவிட்டார்" என்றும், "லார்ட் இஸ் பேக்" என்றும் எக்ஸ் (X) தளத்தில் கருத்துகள் வைரலாகி வருகின்றன.

CSK: சிஎஸ்கே ரசிகர்களுக்குப் பேரிடி.. தோனி 2 வாரம் கழித்து விளையாட வாய்ப்பில்லை.. மேலும் சிக்கல்!

கொல்கத்தா அணி 20 ஓவர்கள் முடிவில் 220 ரன்கள் குவித்தாலும், ஷர்துல் தாகூர் எடுத்த இந்த 3 விக்கெட்டுகள் இல்லை என்றால் அந்த அணி 250 ரன்களைக் கடந்திருக்கும். அறிமுகப் போட்டியிலேயே தனது திறமையை நிரூபித்துள்ள ஷர்துல் தாகூர், மும்பை இந்தியன்ஸ் அணியின் நம்பிக்கைக்குரிய பந்துவீச்சாளராக மாறியுள்ளார். ரஹானே மற்றும் ரகுவன்ஷியின் அதிரடி ஒருபுறம் இருந்தாலும், ஷர்துல் தாகூரின் இந்த பந்துவீச்சு ஆட்டத்தின் திருப்புமுனையாகப் பார்க்கப்படுகிறது.