IPL 2026: பிளே ஆப் வாய்ப்பு.. இது மட்டும் நடந்தால் மும்பை இந்தியன்ஸ் அணி டாப் 4இல் வரலாம்

சென்னை: 2026 ஐபிஎல் தொடரில் தங்களது பரம எதிரியான சென்னை சூப்பர் கிங்ஸ் அணியிடம் படுதோல்வியை சந்தித்துள்ளது மும்பை இந்தியன்ஸ் அணி. இதுவரை விளையாடியுள்ள 9 போட்டிகளில் 7 தோல்விகளை சந்தித்துள்ள நிலையில், மும்பை அணியின் பிளே ஆப் கனவு முழுமையாக முடிவுக்கு வந்துவிட்டதா என்ற கேள்வி ரசிகர்கள் மத்தியில் எழுந்துள்ளது. ஆனால், புள்ளிவிவரங்களின் அடிப்படையில் ஒரு சிறிய மேஜிக் நடந்தால் ஹர்திக் பாண்டியா தலைமையிலான மும்பை அணி இன்னும் பிளே ஆப் சுற்றுக்கு முன்னேற வாய்ப்புள்ளது. இது எப்படி சாத்தியம், இனி அவர்கள் கடக்க வேண்டிய தடைகள் என்ன என்பதை இங்கே விரிவாகப் பார்ப்போம்.

ஐபிஎல் வரலாற்றில் 5 முறை சாம்பியன் பட்டம் வென்ற வலிமையான அணியான மும்பை இந்தியன்ஸ், நடப்பு தொடரில் 9 போட்டிகளில் விளையாடி வெறும் 4 புள்ளிகளை மட்டுமே பெற்று புள்ளிப்பட்டியலில் மிகவும் பின்தங்கியுள்ளது. லீக் சுற்றில் அந்த அணிக்கு இன்னும் 5 போட்டிகள் மட்டுமே மீதமுள்ளன. இனி வரும் இந்த 5 போட்டிகளிலும் தொடர்ந்து வெற்றி பெற்றால் மும்பை அணியால் அதிகபட்சமாக 14 புள்ளிகளை மட்டுமே எட்ட முடியும்.

வழக்கமாக 10 அணிகள் கொண்ட ஐபிஎல் தொடரில் முதல் 4 இடங்களை பிடித்து பிளே ஆப் சுற்றுக்கு பாதுகாப்பாக முன்னேற குறைந்தது 16 புள்ளிகள் தேவை என்பது எழுதப்படாத விதியாகும். எனவே 14 புள்ளிகளுடன் தகுதி பெறுவது என்பது மிகவும் சிக்கலான ஒரு விஷயமாகும். இதற்கு மும்பை அணி தனது மீதமுள்ள 5 போட்டிகளிலும் வெறும் வெற்றியை மட்டும் பதிவு செய்தால் போதாது, மிகப்பெரிய ரன் வித்தியாசத்தில் இமாலய வெற்றிகளைப் பெற வேண்டும்.

இதன் மூலம் மட்டுமே நடப்பு சீசனில் மிகவும் மோசமாக உள்ள அந்த அணியின் நெட் ரன் ரேட் உயரும். அதுமட்டுமின்றி, இனி மும்பை அணியின் பிளே ஆப் வாய்ப்பு அவர்கள் கையில் மட்டும் இல்லை. மற்ற அணிகளின் வெற்றி தோல்விகளை நம்பியே உள்ளது.

தற்போது புள்ளிப்பட்டியலில் பஞ்சாப் கிங்ஸ் அணி 8 போட்டிகளில் 13 புள்ளிகளுடன் முதலிடத்தில் உள்ளது. அவர்களுக்கு அடுத்தபடியாக ராயல் சேலஞ்சர்ஸ் பெங்களூரு, ராஜஸ்தான் ராயல்ஸ் மற்றும் சன்ரைசர்ஸ் ஹைதராபாத் ஆகிய 3 அணிகளும் தலா 12 புள்ளிகளுடன் அடுத்தடுத்த இடங்களில் உள்ளன. இந்த அணிகள் மற்ற அணிகளுக்கு எதிரான போட்டிகளில் மிகப்பெரிய வெற்றிகளைப் பெற்று ஆதிக்கம் செலுத்த வேண்டும். இதன் மூலம் மற்ற எந்த ஒரு அணியும் 14 புள்ளிகளைத் தாண்டாமல் இருப்பதை மும்பை இந்தியன்ஸ் அணி எதிர்பார்க்க வேண்டும்.

IPL 2026: சேப்பாக்கத்தில் மிரள வைத்த சிஎஸ்கே பவுலர்கள்.. சிஎஸ்கே சுழலில் சிக்கிய மும்பை இந்தியன்ஸ்!

மும்பை இந்தியன்ஸ் அணி தனது அடுத்தடுத்த போட்டிகளில் முறையே லக்னோ சூப்பர் ஜெயன்ட்ஸ் (மே 4), பெங்களூரு (மே 10), பஞ்சாப் (மே 14), கொல்கத்தா நைட் ரைடர்ஸ் (மே 20) மற்றும் ராஜஸ்தான் (மே 24) ஆகிய அணிகளை எதிர்கொள்ளவுள்ளது. இதில் நாளை நடைபெறும் லக்னோ அணிக்கு எதிரான போட்டியில் மும்பை அணி கட்டாயம் வெல்ல வேண்டும். ஒருவேளை இந்த போட்டியில் தோல்வியடைந்தால், 2026 ஐபிஎல் பிளே ஆப் ரேஸிலிருந்து அவர்கள் அதிகாரப்பூர்வமாக வெளியேறிவிடுவார்கள். எனவே, இனி வரும் ஒவ்வொரு போட்டியும் மும்பை இந்தியன்ஸ் அணிக்கு வாழ்வா சாவா போராட்டமாகும்.