இந்தியாவுக்கு எதிரான டெஸ்ட் தொடர்.. காயத்தால் விலகினார் நியூசிலாந்தின் டிம் சவுத்தி

மும்பை: இந்தியாவுக்கு எதிரான டெஸ்ட் தொடரிலிருந்து, நியூசிலாந்தின் முன்னணி வேகப்பந்து வீச்சாளர் டிம் சவுத்தி, காயம் காரணமாக விலகியுள்ளார்.

3 டெஸ்ட் மற்றும் 5 ஒரு நாள் போட்டிகளில் பங்கேற்பதற்காக கனே வில்லியம்சன் தலைமையிலான நியூசிலாந்து கிரிக்கெட் அணி இந்தியாவில் சுற்றுப்பயணம் மேற்கொண்டுள்ளது. இந்தியா-நியூசிலாந்து இடையிலான முதலாவது டெஸ்ட் வருகிற 22ம் தேதி கான்பூரில் தொடங்குகிறது.

இந்நிலையில் பயிற்சியின்போது காயமடைந்தததால், டிம் சவுத்தி இத்தொடரில் இருந்து விலகுவதாக அறிவிக்கப்பட்டுள்ளது. மொத்தம், 52 டெஸ்ட் போட்டிகளில் ஆடி 177 விக்கெட்டுகளை வீழ்த்திய அனுபவம் கொண்ட சவுத்திக்கு பதிலாக, 4 டெஸ்ட்டுகளில் ஆடியுள்ள மேட் ஹென்ட்ரி களமிறக்கப்பட உள்ளார்.

தற்போது நியூசிலாந்து அணி, பயிற்சி ஆட்டங்களில் பங்கேற்றுள்ளது. விராட் கோஹ்லி தலைமையிலான இந்திய அணி, நியூசிலாந்தை சந்திக்க தயாராகி வருகிறது.