சுப்மன் கில் இல்லை.. ஆஸ்திரேலிய தொடரில் இந்த இந்திய வீரர்தான் அதிக ரன் குவிப்பார்.. கிளார்க் கணிப்பு

சிட்னி: இந்தியா - ஆஸ்திரேலியா ஒருநாள் தொடர் தொடங்க இன்னும் சில நாட்களே உள்ள நிலையில், கிரிக்கெட் உலகின் ஒட்டுமொத்த கவனமும், ஏழு மாதங்களுக்குப் பிறகு இந்திய ஒருநாள் அணிக்கு திரும்பும் இருபெரும் ஜாம்பவான்களான விராட் கோலி மற்றும் ரோஹித் சர்மா மீதுதான் உள்ளது. அவர்களது எதிர்காலம் பெரும் விவாதப் பொருளாகியுள்ள நிலையில், ஆஸ்திரேலிய அணியின் முன்னாள் கேப்டன் மைக்கேல் கிளார்க், இந்தத் தொடரில் அதிக ரன்கள் குவிக்கப் போகும் வீரர் யார் என்பது குறித்து ஒரு சுவாரஸ்யமான கணிப்பை வெளியிட்டுள்ளார்.

'பியாண்ட்23 கிரிக்கெட் பாட்காஸ்ட்'-ல் பேசிய மைக்கேல் கிளார்க், இந்தத் தொடரின் டாப் ஸ்கோரராக விராட் கோலிதான் இருப்பார் என்று ஆணித்தரமாகக் கூறியுள்ளார். "இந்தத் தொடரில் அதிக ரன்கள் குவிப்பவர், ரோஹித் சர்மா அல்லது விராட் கோலியில் ஒருவராகத்தான் இருக்க முடியும். எனக்குள் ஒரு எண்ணம் ஓடுகிறது - இதுவே அவர்களின் கடைசி ஆஸ்திரேலிய பயணமாக இருந்தால், அவர்கள் ஒரு சிறப்பான முத்திரையைப் பதிக்க விரும்புவார்கள்" என்று கிளார்க் தனது கணிப்பிற்கான காரணத்தை விளக்கினார்.

மேலும் அவர், "ஆஸ்திரேலியாவில், தொடக்க வீரராகக் களமிறங்குவதை விட, 3-வது அல்லது 4-வது வீரராகக் களமிறங்குவது சற்று எளிதானது. ரோஹித் தொடக்க வீரராகக் களமிறங்குவார், அதனால் நான் விராட் கோலியைத் தேர்ந்தெடுக்கிறேன்" என்று தனது பார்வையையும் முன்வைத்தார்.

ஏன் இந்தக் கணிப்பு?

கிளார்க்கின் இந்தக் கணிப்பு, வெறும் வார்த்தைகளாகப் பார்க்கப்படவில்லை. அதற்குப் பின்னால், இந்திய கிரிக்கெட்டின் தற்போதைய சூழல் உள்ளது. டெஸ்ட் மற்றும் டி20-யிலிருந்து ஓய்வு பெற்று, ஒருநாள் கேப்டன் பதவியும் பறிக்கப்பட்ட நிலையில், புதிய கேப்டன் சுப்மன் கில்லின் தலைமையில் கோலியும், ரோஹித்தும் விளையாடுகின்றனர்.

திலக் வர்மா, யஷஸ்வி ஜெய்ஸ்வால் போன்ற இளம் வீரர்களின் எழுச்சி, இந்த ஜாம்பவான்களுக்கு ஒருவித அழுத்தத்தை ஏற்படுத்தியுள்ளது. 2027 உலகக் கோப்பையின்போது கோலிக்கு 39 வயதும், ரோஹித்துக்கு 40 வயதும் ஆகியிருக்கும். எனவே, அவர்களது எதிர்காலம் குறித்த ஊகங்கள் தீவிரமடைந்துள்ளன.

ஓய்வு வதந்திகளுக்கு முற்றுப்புள்ளி வைத்த பிசிசிஐ

இந்த ஆஸ்திரேலியத் தொடரே கோலி மற்றும் ரோஹித்தின் கடைசித் தொடராக இருக்கலாம் என்று செய்திகள் பரவிய நிலையில், பிசிசிஐ துணைத் தலைவர் ராஜீவ் சுக்லா இந்த வதந்திகளுக்கு முற்றுப்புள்ளி வைத்துள்ளார். "இது அவர்களின் கடைசித் தொடர் என்பதெல்லாம் ஒன்றும் இல்லை. ஓய்வு பெறுவது குறித்து வீரர்களே முடிவு செய்வார்கள். அப்படிச் சொல்வது முற்றிலும் தவறு" என்று சுக்லா திட்டவட்டமாகத் தெரிவித்துள்ளார்.

ஒருபுறம் ஓய்வு குறித்த ஊகங்கள், மறுபுறம் இளம் வீரர்களின் அழுத்தம் எனப் பல சவால்களுக்கு மத்தியில், கோலியும், ரோஹித்தும் ஆஸ்திரேலிய மண்ணில் களமிறங்குகின்றனர். இந்தச் சூழலில், எதிரணியின் முன்னாள் கேப்டனே, விராட் கோலி மீது நம்பிக்கை வைத்து, அவர் ரன் மழை பொழிவார் என்று கணித்திருப்பது, இந்தத் தொடரின் மீதான எதிர்பார்ப்பை மேலும் அதிகரித்துள்ளது.