ரஞ்சி கோப்பை: கர்நாடக அணியில் ராகுலுக்கு இடம்.. டிராவிட் மகனுக்கு மற்றொரு அணியில் வாய்ப்பு

பெங்களூரு: நியூசிலாந்துக்கு எதிரான டெஸ்ட் தொடருக்கு முன்னதாக, ரஞ்சி கோப்பை தொடக்க ஆட்டத்தில் கர்நாடக அணிக்காக கேஎல் ராகுல் விளையாடவுள்ளார். அக்டோபர் 11 ஆம் தேதி விஜயவாடாவில் ஆந்திரப் பிரதேசத்திற்கு எதிராக நடைபெறவுள்ள இந்த ஆட்டத்தில் வேகப்பந்து வீச்சாளர் பிரசித் கிருஷ்ணாவும் கர்நாடக அணியில் சேர்க்கப்பட்டுள்ளார்.

நியூசிலாந்துக்கு எதிரான வரவிருக்கும் டெஸ்ட் தொடரை மனதில் கொண்டு ராகுல் இந்த போட்டியில் விளையாடுவது கிட்டத்தட்ட உறுதியாகியுள்ளது. இதேபோன்று நியூசிலாந்து பயணத்திற்கு முன்னதாக, வாஷிங்டன் சுந்தர் தமிழ்நாடு அணிக்காக சில ரஞ்சி கோப்பை போட்டிகளில் விளையாடும் வகையில், மேற்கிந்திய தீவுகளுக்கு எதிரான ஐந்து போட்டிகள் கொண்ட டி20 தொடருக்கான இந்திய அணியில் இருந்து பிசிசிஐ அவரை விடுவித்தது குறிப்பிடத்தக்கது.

இந்திய வேகப்பந்து வீச்சாளர் பிரசித் கிருஷ்ணாவும் கர்நாடக அணியில் இடம் பெற்றுள்ளார். இருப்பினும், மேற்கிந்திய தீவுகளுக்கு எதிரான ஒருநாள் தொடரின் போது அவருக்கு ஏற்பட்ட தொடை தசைப்பிடிப்பு காயம் காரணமாக, அவர் இப்போட்டியில் விளையாடுவது இன்னும் உறுதியாகவில்லை.

கடந்த சீசனில் ரன்னர்-அப் ஆக வந்த கர்நாடக அணி, முன்னாள் வேகப்பந்து வீச்சாளர் ஆர். வினய் குமார் தலைமையிலான புதிய பயிற்சியாளர் குழுவுடன் களம் இறங்குகிறது. தேவ்தத் படிக்கலுக்குப் பதிலாக, இளம் பேட்டர் ரவிச்சந்திரன் ஸ்மரன் 15 பேர் கொண்ட இந்த அணிக்கு தலைமை தாங்குவார். காயம் காரணமாக அவதிப்பட்டு வரும் வைசாக் விஜய்குமார் மற்றும் வித்வத் காவேரப்பா ஆகியோர் இல்லாத நிலையில், அனுபவமில்லாத பந்துவீச்சு கூட்டணியை வழிநடத்துவது ஸ்மரனுக்கு சவாலாக இருக்கும்.

இதற்கிடையில், புகழ்பெற்ற கிரிக்கெட் வீரர் ராகுல் டிராவிட்டின் மகன் சமித் டிராவிட், ஆலூர் மைதானத்தில் விதர்பா அணிக்கு எதிராக நடைபெறவுள்ள சி.கே. நாயுடு கோப்பை போட்டிக்கான மாநில அணியில் சேர்க்கப்பட்டுள்ளார்.

ஐசிசி உலககோப்பை 2027: இந்தியா, பாகிஸ்தான் மோதும் ஆட்டம் எப்போது? அட்டவணை விவரம்

ரஞ்சி கோப்பை தொடருக்கான கர்நாடக அணிக்கு ஆர். ஸ்மரன் தலைமை தாங்குகிறார். அணியில் பேட்டர்களாக கே.எல். ராகுல், மயங்க் அகர்வால், கருண் நாயர், ஏ. கௌதம் மற்றும் கே.வி. அனீஷ் ஆகியோர் இடம்பிடித்துள்ளனர். ஆல்-ரவுண்டராக ஸ்ரேயாஸ் கோபாலும், விக்கெட் கீப்பர்களாக கிருத்திக் கிருஷ்ணா மற்றும் கே.எல். ஸ்ரீஜித் ஆகியோரும் சேர்க்கப்பட்டுள்ளனர். பந்துவீச்சு துறையில் அனுபவமிக்க பிரசித் கிருஷ்ணாவுடன் இணைந்து ஷிகர் ஷெட்டி, அபிலாஷ் ஷெட்டி, மன்வந்த் குமார், எல்.ஆர். குமார் மற்றும் ரித்தேஷ் பட்கல் ஆகியோர் இடம் பெற்றுள்ளனர்.