"ஒட்டுமொத்த பழியையும் குல்தீப் யாதவ் மீது போடுவதா?".. பயிற்சியாளர் கம்பீரை விளாசிய அஸ்வின்

மும்பை: இந்திய கிரிக்கெட் அணியின் அனுபவ சுழற்பந்து வீச்சாளரான குல்தீப் யாதவ், ஒரே ஒரு போட்டியில் அதிக ரன்களை வாரி வழங்கியதற்காக அடுத்தடுத்து 3 போட்டிகளில் தொடர்ந்து பெஞ்சில் உட்கார வைக்கப்பட்டது பெரும் கொந்தளிப்பை ஏற்படுத்தியுள்ளது. வெஸ்ட் இண்டீஸ் அணிக்கு எதிரான டி20 தொடரில் குல்தீப் திட்டமிட்டு ஓரங்கட்டப்பட்ட விவகாரத்தில், தலைமைப் பயிற்சியாளர் கௌதம் கம்பீர் தலைமையிலான தற்போதைய அணி நிர்வாகத்தை இந்திய முன்னாள் நட்சத்திர சுழற்பந்து வீச்சாளர் ரவிச்சந்திரன் அஸ்வின் மிகக் காட்டமாக விளாசியுள்ளார்.

ராஞ்சியில் நடைபெற்ற 2-வது டி20 போட்டியில் பேட்டிங்குக்கு மட்டுமே சாதகமான தட்டையான ஆடுகளத்தில் வீசிய 31 வயதான குல்தீப் யாதவ், 1 விக்கெட் மட்டுமே எடுத்து 53 ரன்களைக் கொடுத்தார். அந்தப் போட்டியில் இந்திய அணி குவித்த 249 ரன்களை ஷாய் ஹோப்பின் அதிரடி சதத்தால் வெஸ்ட் இண்டீஸ் 18.3 ஓவர்களிலேயே விரட்டிப் பிடித்தது.

இதுபற்றி தனது யூடியூப் பக்கத்தில் பேசிய அஸ்வின், "ஆடுகளத்தின் சூழல் பந்துவீச்சாளர்களுக்கு எதிராக இருக்கும்போது, ஒட்டுமொத்தப் பழியையும் ஒரே ஒரு பவுலர் மீது சுமத்தி அவரை அணியிலிருந்து நீக்குவது அப்பட்டமான அநீதியாகும். பல ஆண்டுகளாக இந்திய அணிக்கு மேட்ச் வின்னராகத் திகழ்ந்த குல்தீப்பை, தற்போதைய நிர்வாகம் தங்களது முதன்மைத் தேர்வாக கூட மதிக்காதது மிகுந்த வேதனையளிக்கிறது" என்று ஆவேசப்பட்டார்.

அடுத்ததாக நியூசிலாந்தில் நடைபெறவுள்ள 5 போட்டிகள் கொண்ட டி20 தொடரிலும் குல்தீப் யாதவுக்கு வாய்ப்பு கிடைப்பது சந்தேகமே என அஸ்வின் எச்சரித்துள்ளார். "ஹர்திக் பாண்டியா இன்னும் முழு உடற்தகுதியுடன் அணிக்குத் திரும்பாததால், நியூசிலாந்து ஆடுகளங்களில் குல்தீப்பிற்குப் பதிலாக வருண் சக்கரவர்த்திக்கே வாய்ப்பளிக்க நிர்வாகம் விரும்பும். எனினும் காயத்தில் இருந்து மீண்டு வரும் வருணின் உடற்தகுதியும் கேள்விக்குறியாகவே உள்ளது" என்றார்.

“ஸ்மித், வார்னருக்கு கொடுத்த தண்டனையால் உலகம் முழுவதும் ரிவர்ஸ் ஸ்விங்..”.. ஜஸ்டின் லாங்கர் ஆதங்கம்

மேலும் ரவீந்திர ஜடேஜா மற்றும் வாஷிங்டன் சுந்தர் போன்ற ஆல்ரவுண்டர்களை ஆட வைக்க வேண்டும் என்பதற்காக, விக்கெட்டுகளை வீழ்த்தும் அட்டாக்கிங் சுழற்பந்து வீச்சாளர்களை இந்திய அணி நீக்கக்
கூடும் என்றும், அந்த தவறை அணி நிர்வாகம் செய்யக்கூடாது என்றும் அஸ்வின் எச்சரித்தார். 200 ரன்களுக்கு மேல் சாதாரணமாகக் குவியும் தற்கால டி20 கிரிக்கெட்டில், குல்தீப் போன்ற முதன்மை பவுலர்களைப் புறக்கணிப்பது அணிக்கு மிகப்பெரிய பின்னடைவையே தரும் என அஸ்வின் சுட்டிக் காட்டினார்.