ஜடேஜா அடுத்த முறை என்னை பார்த்தால் முகத்திலே குத்துவார்.. முரளி கார்த்திக் ஓபன் டாக்

மும்பை: இந்திய அணியின் முன்னணி ஆல்-ரவுண்டர் ரவீந்திர ஜடேஜாவின் இடத்தை எதிர்காலத்தில் நிரப்புவதற்கான அனைத்து தகுதிகளும் இளம் இடதுகை சுழற்பந்து வீச்சாளர் மானவ் சுதாருக்கு இருப்பதாக முன்னாள் இந்திய கிரிக்கெட் வீரர் முரளி கார்த்திக் தெரிவித்துள்ளார்.

காலே சர்வதேச மைதானத்தில் தொடங்கவுள்ள இலங்கை அணிக்கு எதிரான இரண்டு போட்டிகள் கொண்ட டெஸ்ட் தொடருக்கான இந்திய அணியில் இவர்கள் இருவரும் இடம்பெற்றுள்ளனர். ரவிச்சந்திரன் அஸ்வின், அக்சர் படேல் போன்ற அனுபவ வீரர்களுக்கு அடுத்தபடியாக, இந்திய அணியின் சுழற்பந்து வீச்சுத் துறையில் ஏற்பட்டு வரும் மாற்றங்களுக்கு மத்தியில் மானவ் சுதார் முக்கிய வீரராக உருவெடுத்துள்ளார்.

ஆப்கானிஸ்தான் அணிக்கு எதிரான ஒரே ஒரு டெஸ்ட் போட்டியில் அறிமுகமான மானவ் சுதார், ஐந்து விக்கெட் சாதனையும் சேர்த்து மொத்தம் 7 விக்கெட்டுகளை வீழ்த்தி அசத்தினார். இந்த சிறப்பான ஆட்டத்தின் மூலம் இலங்கை சுற்றுப்பயணத்திற்கான இந்திய அணியிலும் அவர் தனது இடத்தை தக்க வைத்துக் கொண்டார். இந்த டெஸ்ட் தொடருக்கு முன்னதாக, கவுண்டி சாம்பியன்ஷிப்பில் வார்விக்ஷயர் அணிக்காக விளையாடிய அவர், கொழும்பில் இலங்கை கிரிக்கெட் லெவன் அணிக்கு எதிரான மூன்று நாள் பயிற்சிப் போட்டியிலும் பங்கேற்றார்.

IND vs SL: இந்த 28 வயது வீரர் தான் இலங்கைக்கு ஆபத்தாக விளங்குவார்- மஹாரூஃப் கருத்து

இது தொடர்பாக பேசிய கார்த்திக், "அவரை யாருடனும் ஒப்பிட வேண்டாம், அவர் ஒரு மிகச்சிறந்த பந்துவீச்சாளர். பாரம்பரிய பாணியில் பந்துவீசும் அவரிடம் பல சாதகமான விஷயங்கள் உள்ளன. ஆப்கானிஸ்தானுக்கு எதிரான போட்டியில் நான் வர்ணனை செய்தபோது, அவரது பந்துவீச்சை பார்த்து மகிழ்ச்சியடைந்தேன். மிக நீண்ட இடைவெளிக்குப் பிறகு, பந்தை சுழற்றி வீசும் விதம், துல்லியம் மற்றும் திறமையைக் கொண்ட ஒரு பந்துவீச்சாளரை நாம் பார்க்கிறோம். இந்திய அணிக்கு இது சரியான நேரத்தில் கிடைத்துள்ள வாய்ப்பு" என்று கூறினார்.

மேலும், ஜடேஜாவின் இடத்தை நிரப்புவது குறித்து நகைச்சுவையாகப் பேசிய கார்த்திக், "அடுத்த முறை என்னைச் சந்திக்கும்போது ரவீந்திர ஜடேஜா என்னை அடிக்கக்கூடும். ஆனால், அவர் தனது முப்பதுகளின் இறுதியில் இருக்கிறார். அவரது விளையாட்டு வாழ்க்கை இறுதிக்கட்டத்தை எட்டியுள்ளது. அவர் இன்னும் எவ்வளவு காலம் விளையாடுவார் என்று நமக்குத் தெரியாது. அந்த வகையில், அடுத்த தலைமுறைக்கு பொறுப்புகளை ஒப்படைப்பது குறித்து நாம் எப்போதும் சிந்திக்க வேண்டியுள்ளது" என்று தெரிவித்தார்.

வெள்ளை பந்து கிரிக்கெட்டில் ரவீந்திர ஜடேஜாவின் எதிர்காலம் குறித்து தற்போது கேள்விகள் எழுந்துள்ளன. 2024 டி20 உலகக் கோப்பைக்குப் பிறகு டி20 போட்டிகளில் இருந்து ஓய்வு பெற்ற அவர், 2025 சாம்பியன்ஸ் டிராபி தொடருக்குப் பிறகு விளையாடிய 6 ஒருநாள் போட்டிகளில் ஒரே ஒரு விக்கெட்டை மட்டுமே எடுத்துள்ளார்.

Also Read

IND vs SL: சுப்மன் கில் மாபெரும் 2 சாதனை படைக்க வாய்ப்பு.. கேப்டனாக சாதிப்பாரா?

இலங்கை நிலைமைகளில் கூக்கபுரா பந்துடன் பழகும் வகையில், கொழும்பில் நடந்த இலங்கை கிரிக்கெட் லெவன் அணிக்கு எதிரான பயிற்சிப் போட்டியில் மானவ் சுதார் முதல் இன்னிங்ஸில் 33 ரன்களுக்கு 2 விக்கெட்டுகளை வீழ்த்தியதோடு, பேட்டிங்கில் ஆட்டமிழக்காமல் 41 ரன்களும் எடுத்தார். இதன் மூலம் அவர் இந்திய அணியில் இடம்பெறுவதற்கான வாய்ப்புகள் அதிகரித்துள்ளன.