ரவீந்திர ஜடேஜா மாபெரும் மைல்கல் சாதனை.. உலகிலேயே 3வது சிறந்த இடது கை பவுலர், ஆல்-ரவுண்டர்

காலே: இலங்கைக்கு எதிரான முதல் டெஸ்ட் போட்டியின் போது, இந்திய அணியின் நட்சத்திர ஆல்-ரவுண்டர் ரவீந்திர ஜடேஜா டெஸ்ட் கிரிக்கெட்டில் 350 விக்கெட்டுகளை வீழ்த்தி புதிய வரலாற்று சாதனை படைத்துள்ளார். காலே மைதானத்தில் நடைபெற்று வரும் இப்போட்டியின் முதல் இன்னிங்ஸில், இலங்கையின் தனஞ்செயா டி சில்வா மற்றும் கேஷரா நுவன்தா ஆகியோரின் விக்கெட்டுகளை வீழ்த்தியதன் மூலம் ஜடேஜா இந்த மைல்கல் சாதனையை எட்டினார்.

இதன் மூலம் டெஸ்ட் கிரிக்கெட் வரலாற்றில் 350 விக்கெட்டுகளை வீழ்த்திய 5-வது இந்திய பந்துவீச்சாளர் என்ற பெருமையை ஜடேஜா பெற்றுள்ளார். இதற்கு முன்பு அனில் கும்ப்ளே (619), ரவிச்சந்திரன் அஸ்வின் (537), கபில் தேவ் (434) மற்றும் ஹர்பஜன் சிங் (417) ஆகியோர் மட்டுமே இந்த மைல்கல்லை எட்டியுள்ளனர்.

ஏற்கனவே டெஸ்ட் கிரிக்கெட்டில் 4,000 ரன்களுக்கு மேல் (4,095 ரன்கள்) குவித்து அசத்தியுள்ள ஜடேஜா, தற்போது 350 விக்கெட்டுகளையும் கடந்துள்ளார். இதன் மூலம் டெஸ்ட் வரலாற்றில் 4,000 ரன்கள் மற்றும் 350 விக்கெட்டுகள் என்ற இரட்டை சாதனையைப் படைத்த 4-வது சர்வதேச கிரிக்கெட் வீரர் என்ற அரிய சாதனையை அவர் நிகழ்த்தியுள்ளார். இதற்கு முன்பு கபில் தேவ், இயன் போத்தம் (இங்கிலாந்து) மற்றும் டேனியல் வெட்டோரி (நியூசிலாந்து) ஆகியோர் மட்டுமே இத்தகைய சாதனையைப் புரிந்துள்ளனர்.

இடதுகை சுழற்பந்து வீச்சாளர்கள் பட்டியல்

டெஸ்ட் கிரிக்கெட்டில் அதிக விக்கெட்டுகளை வீழ்த்திய இடதுகை சுழற்பந்து வீச்சாளர்களின் வரிசையில் ஜடேஜா தற்போது 3-வது இடத்திற்கு முன்னேறியுள்ளார்.

• ரங்கனா ஹெராத் (இலங்கை) - 433 விக்கெட்டுகள்
• டேனியல் வெட்டோரி (நியூசிலாந்து) - 362 விக்கெட்டுகள்
• ரவீந்திர ஜடேஜா (இந்தியா) - 350 விக்கெட்டுகள்
• டெரெக் அண்டர்வுட் (இங்கிலாந்து) - 297 விக்கெட்டுகள்
• தைஜுல் இஸ்லாம் (வங்கதேசம்) - 271 விக்கெட்டுகள்

ரிஷப் பண்ட் பேச்சை கேட்டு சுப்மன் கில் செய்த செயல்.. வீணாய்ப்போன டிஆர்எஸ் ரிவ்யூ.. என்ன நடந்தது?

மேலும், டெஸ்ட் போட்டிகளில் குறைந்தபட்சம் 125 விக்கெட்டுகளை வீழ்த்திய இடதுகை சுழற்பந்து வீச்சாளர்களில், தென்னாப்பிரிக்காவின் கேசவ் மகாராஜுக்கு (56.4) அடுத்தபடியாக ஜடேஜா மிகச் சிறந்த ஸ்டிரைக்-ரேட்டை (58.1) வைத்துள்ளார் என்பது குறிப்பிடத்தக்கது. ஜடேஜாவின் இந்த அபாரமான பந்துவீச்சு இந்திய அணிக்கு மேலும் வலு சேர்த்துள்ளது.