SA vs AUS: போலண்ட் அபார பந்துவீச்சு.. வந்த வேகத்தில் வெளியேறிய தென்னாப்பிரிக்க வீரர்கள்

கெபெஹா: தென் ஆப்பிரிக்காவுக்கு எதிரான இரண்டாவது டெஸ்ட் போட்டியின் இரண்டாம் நாளில், ஆஸ்திரேலிய வேகப்பந்து வீச்சாளர் ஸ்காட் போலண்ட் சிறப்பாக பந்துவீசி 4 விக்கெட்டுகளைக் கைப்பற்றினார். மழை குறுக்கிட்டதால், பெரும்பாலான ஆட்டம் இன்று நடைபெறவில்லை. இரண்டாம் நாள் ஆட்டநேர முடிவில் தென் ஆப்பிரிக்க அணி தனது முதல் இன்னிங்ஸில் 5 விக்கெட் இழப்பிற்கு 97 ரன்கள் எடுத்து நெருக்கடியில் உள்ளது.

கெபெஹாவில் உள்ள செயின்ட் ஜார்ஜ் பார்க் மைதானத்தில் நடைபெற்று வரும் இப்போட்டியில், இரவு முழுவதும் பெய்த பலத்த மழை காரணமாக ஆட்டம் சுமார் ஆறு மணி நேரம் தாமதமாகவே தொடங்கியது. டர்பனில் நடந்த முதல் டெஸ்ட் போட்டியில் 214 ரன்கள் வித்தியாசத்தில் தோல்வியடைந்த தென் ஆப்பிரிக்க அணி, இப்போட்டியிலும் ஆஸ்திரேலியாவின் பந்துவீச்சை எதிர்கொள்ள முடியாமல் திணறி வருகிறது.

இரண்டாம் நாளை 20/2 என்ற ஸ்கோருடன் தொடர்ந்த தென் ஆப்பிரிக்கா, மேலும் 5 ரன்கள் சேர்ப்பதற்குள் அறிமுக வீரர் மார்க்வெஸ் அக்கர்மேன் விக்கெட்டை இழந்தது. போலண்ட் வீசிய பந்தில் விக்கெட் கீப்பர் அலெக்ஸ் கேரியிடம் கேட்ச் கொடுத்து அக்கர்மேன் 6 ரன்களில் வெளியேறினார். அதைத் தொடர்ந்து களமிறங்கிய மேத்யூ பிரீட்ஸ்கே, மிட்செல் ஸ்டார்க் பந்துவீச்சில் 4 ரன்களுக்கு ஆட்டமிழந்தார்.

IND vs NZ: புவனேஸ்வர் குமாருக்கு வாய்ப்பு தந்தது மகிழ்ச்சி!முகமது ஷமிக்கு ஏன் தரவில்லை-ரவி சாஸ்திரி

இதன்பின் இணைந்த கேப்டன் டெம்பா பவுமா மற்றும் ரியான் ரிக்கல்டன் ஜோடி 5-வது விக்கெட்டுக்கு 52 ரன்கள் சேர்த்து அணியை மீட்கப் போராடியது. ரிக்கல்டன் 31 ரன்கள் எடுத்திருந்தபோது, போலண்ட் வீசிய பந்தில் ஃபர்ஸ்ட் ஸ்லிப்பில் நின்ற மேட் ரென்ஷா பிடித்த மிகச்சிறந்த ஒற்றைக் கை கேட்ச் மூலம் ஆட்டமிழந்தார்.

Also Read

IND vs NZ: பும்ராவுக்கு வாழ்நாளில் முக்கிய அறிவுரை வழங்கிய ரவி சாஸ்திரி

இரண்டாம் நாள் ஆட்டநேர முடிவில் கேப்டன் டெம்பா பவுமா 41 ரன்களுடன் ஆட்டமிழக்காமல் களத்தில் உள்ளார். ஆஸ்திரேலிய அணியின் வேகப்பந்து வீச்சாளர் ஜோஷ் ஹேசில்வுட் உடல்நலக்குறைவு காரணமாக இரண்டாம் நாள் ஆட்டத்தில் பங்கேற்கவில்லை. எனினும், அவர் மூன்றாம் நாள் ஆட்டத்தில் மீண்டும் களமிறங்குவார் என எதிர்பார்க்கப்படுகிறது.