ஈஸியாக ஜெயிக்கலாம் என கனவு கண்ட ஆஸ்திரேலியாவை கதறவிட்ட முல்டர், ரிக்கல்டன்.. தென்னாப்பிரிக்கா சவால்

கேப்டவுன்: ஆஸ்திரேலியாவுக்கு எதிரான 3-வது டெஸ்ட் போட்டியில், தென்னாப்பிரிக்க வீரர்கள் ரியான் ரிக்கல்டன் மற்றும் வியான் முல்டர் ஆகியோர் அபார சதம் விளாசி அணியை சரிவிலிருந்து மீட்டனர். இதனால் கடைசி நாளான இன்று (அக்டோபர் 31) ஆஸ்திரேலிய அணியின் வெற்றிக்கு 288 ரன்கள் இலக்காக நிர்ணயிக்கப்பட்டுள்ளது.

முதல் இன்னிங்ஸில் ஆஸ்திரேலியா 429 ரன்களும், தென்னாப்பிரிக்கா 329 ரன்களும் குவித்து இருந்தன. ஆஸ்திரேலியா 100 ரன்கள் முன்னிலை பெற்றிருந்தது. 2-வது இன்னிங்ஸைத் தொடர்ந்த தென்னாப்பிரிக்க அணி 4-ம் நாள் ஆட்டத்தில் 181 ரன்களுக்கு 5 விக்கெட்டுகளை இழந்து தோல்வியின் விளிம்பில் தத்தளித்தது. தென்னாப்பிரிக்காவை 250 ரன்களுக்குள் சுருட்டி விட்டால் ஆஸ்திரேலியா எளிதாக வென்று விடும் என்ற நிலை இருந்தது.

ஆனால் 6-வது விக்கெட்டுக்கு ஜோடி சேர்ந்த ரிக்கல்டன் மற்றும் முல்டர் இணை ஆஸ்திரேலிய பந்துவீச்சை துணிச்சலுடன் எதிர்கொண்டது. இருவரும் பொறுப்புடன் விளையாடி கூட்டணியாக 154 ரன்கள் சேர்த்து போட்டியை மாற்றினர்.

தொடக்க ஆட்டக்காரர் ரிக்கல்டன் 219 பந்துகளில் 101 ரன்கள் குவித்து ஆட்டமிழந்தார். மறுமுனையில் நங்கூரமாக நின்ற ஆல்ரவுண்டர் வியான் முல்டர் 221 பந்துகளில் 115 ரன்கள் விளாசி தனது 4-வது டெஸ்ட் சதத்தைப் பதிவு செய்தார். கடைசி விக்கெட்டுக்கு ரபாடாவுடன் இணைந்து முல்டர் சேர்த்த 36 ரன்கள் தென்னாப்பிரிக்காவுக்கு கூடுதல் பலம் சேர்த்தது. இறுதியில் தென்னாப்பிரிக்க அணி தனது 2-வது இன்னிங்ஸில் 387 ரன்களுக்கு ஆட்டமிழந்தது.

இதன் மூலம் ஆஸ்திரேலியாவுக்கு 288 ரன்கள் வெற்றி இலக்காக நிர்ணயிக்கப்பட்டது. ஆடுகளம் சுழற்பந்து வீச்சுக்கு சாதகமாகவும், பந்து கணிக்க முடியாத பவுன்ஸுடன் திரும்புவதாகவும் உள்ளதால் கடைசி இன்னிங்ஸில் பேட்டிங் செய்வது ஆஸ்திரேலியாவுக்கு பெரும் சவாலாக இருக்கும்.

IND vs NZ: இந்தியாவுக்கு எதிராக பெரிய வெற்றி.. மகிழ்ச்சியில் துள்ளிக்குதித்த NZ கேப்டன் சான்ட்னர்

தற்போது 3 போட்டிகள் கொண்ட டெஸ்ட் தொடர் 1-1 என்ற கணக்கில் சமநிலையில் உள்ளது. இந்தப் போட்டியில் வெற்றி பெறும் அணி டெஸ்ட் தொடரைக் கைப்பற்றுவதோடு, சர்வதேச டெஸ்ட் தரவரிசையில் நம்பர் 1 இடத்தையும் பிடிக்கும் என்பதால் கடைசி நாள் ஆட்டம் அனல் பறக்கும் என எதிர்பார்க்கப்படுகிறது.