IND vs AFG: கேப்டனாக தடுமாறும் சுப்மன் கில்.. ஒருநாள் கிரிக்கெட்டில் சாதிப்பாரா? ரோகித்துடன் கூட்டணி

இந்திய ஒருநாள் கிரிக்கெட் அணியின் கேப்டனாக சுப்மன் கில் இன்னும் முழுமை அடையவில்லை என்று முன்னாள் இந்திய வீரர் ஆகாஷ் சோப்ரா கருத்து தெரிவித்துள்ளார். குஜராத் டைட்டன்ஸ் அணியின் கேப்டனான கில் தலைமையிலான இந்திய அணி இதுவரை எந்த ஒருநாள் தொடரையும் வெல்லவில்லை என்பதை அவர் சுட்டிக்காட்டினார்.

இந்தியா மற்றும் ஆப்கானிஸ்தான் அணிகளுக்கு இடையிலான ஒருநாள் தொடர் தர்மசாலாவில் ஜூன் 13-ம் தேதி தொடங்குகிறது. 2023 உலகக்கோப்பைக்கு பிறகு நடைபெற்ற ஆறு ஒருநாள் போட்டிகளில் கில் தலைமையிலான இந்திய அணி இரண்டில் மட்டுமே வெற்றி பெற்றுள்ளது. தனது யூடியூப் சேனலில் இது குறித்துப் பேசிய ஆகாஷ் சோப்ரா, கேப்டனாக கில்லின் செயல்பாடுகள் குறித்து அதிருப்தி தெரிவித்துள்ளார்.

"சுப்மன் கில் ஆறு போட்டிகளில் கேப்டனாக இருந்துள்ளார், அதில் நாம் இரண்டு தொடர்களிலும் தோல்வியடைந்துள்ளோம். ஆஸ்திரேலியா மற்றும் நியூசிலாந்துக்கு எதிராக தலா ஒரு போட்டியில் மட்டுமே வெற்றி பெற்றுள்ளோம். எனவே, ஒருநாள் போட்டிகளில் கேப்டனாக அவர் இன்னும் நிலைபெறவில்லை," என்று அவர் கூறினார்.

கேப்டனாக முத்திரை பதிக்க விரும்பும் கில்

ஆப்கானிஸ்தானுக்கு எதிரான மூன்று போட்டிகள் கொண்ட தொடரில் கில் தனது இந்த சாதனையை மேம்படுத்த விரும்புவார் என்று குறிப்பிட்டார். "அவர் கேப்டனாக தனது முத்திரையைப் பதிக்க வேண்டும். பேட்டிங்கில் அவர் தொடர்ந்து சிறப்பாகச் செயல்பட்டு வருகிறார், அந்த பார்மை தொடர வேண்டும்," என்று அவர் தெரிவித்தார்.

சுப்மன் கில் இதுவரை 61 ஒருநாள் போட்டிகளில் 51.71 சராசரியுடன் 2,953 ரன்களைக் குவித்துள்ளார். இருப்பினும், கேப்டனாக அவர் ஆடிய ஆறு போட்டிகளில் 29.67 சராசரியுடன் 178 ரன்கள் மட்டுமே எடுத்துள்ளார். இதே வீடியோவில், 2,000 ரன்களுக்கு மேல் எடுத்துள்ள தொடக்க ஜோடிகளில் சுப்மன் கில் மற்றும் ரோஹித் சர்மா இணை அதிக சராசரியைக் கொண்டுள்ளது என்பதை ஆகாஷ் சோப்ரா பாராட்டினார்.

"சுப்மன் கில் மற்றும் ரோஹித் சர்மா ஜோடி, தற்போது ஒருநாள் கிரிக்கெட்டில் சிறந்த தொடக்க ஜோடியாகும். இவர்களின் சராசரி 63.8 ஆகும். ஜானி பேர்ஸ்டோ மற்றும் ஜேசன் ராய் (58.4), கார்டன் கிரீனிட்ஜ் மற்றும் டெஸ்மண்ட் ஹெய்ன்ஸ் (52.6), சௌரவ் கங்குலி மற்றும் சச்சின் டெண்டுல்கர் (49.3) ஆகியோரின் சராசரியை விட இது மிகுதியானது," என்று அவர் தெரிவித்தார்.

வரலாற்று மைல்கற்களை நெருங்கும் ரோஹித்

"அவர்கள் 2,360 ரன்களை எடுத்துள்ளனர், 14 முறை 50 ரன்களுக்கு மேலான பார்ட்னர்ஷிப் மற்றும் 7 முறை சதம் கடந்த பார்ட்னர்ஷிப் அமைத்துள்ளனர். இது நவீன கிரிக்கெட்டின் சிறந்த தொடக்கக் கூட்டணியாகும்," என்றும் அவர் கூறினார்.ஆப்கானிஸ்தானுக்கு எதிரான ஒருநாள் தொடரில் ரோஹித் சர்மா பல வரலாற்றுச் சாதனைகளை நெருங்கியுள்ளதை சோப்ரா சுட்டிக்காட்டினார்.

"இந்திய தொடக்க வரிசை வீரராக 16,000 சர்வதேச ரன்களைக் கடந்த முதல் வீரராக மாற ரோஹித் சர்மாவுக்கு இன்னும் ஆறு ரன்கள் மட்டுமே தேவை. சர்வதேச அரங்கில் தொடக்க வீரராக அதிக சதம் அடித்தவர்களின் பட்டியலில் சச்சின் டெண்டுல்கரை முந்தி இரண்டாவது இடத்தைப் பிடிக்க அவருக்கு இன்னும் ஒரு சதம் தேவை. ரோஹித் சர்மா தனது கிரிக்கெட் வாழ்க்கையின் முக்கியமான கட்டத்தில் உள்ளார்," என்று அவர் குறிப்பிட்டார்.

விளையாடுவதே பெரும் சவாலாக இருந்தது... ரகசியத்தை உடைத்த ரியான் பராக்! கேப்டனுக்கு என்னாச்சு?

இருப்பினும், இந்த ஆண்டு ஜனவரி மாதத்திற்குப் பிறகு ரோஹித் ஒரு சர்வதேச போட்டியிலும் விளையாடவில்லை என்பதையும், ஐபிஎல் 2026-ன் போது ஹாம்ஸ்ட்ரிங் காயத்தால் பாதிக்கப்பட்டிருந்ததையும் சோப்ரா நினைவுபடுத்தினார். 2027 உலகக்கோப்பை ஒருநாள் தொடருக்கான அணியில் தனது இடத்தை உறுதிப்படுத்த, ரோஹித் சர்மா ரன்களைக் குவிக்க வேண்டிய கட்டாயத்தில் உள்ளார் என்றும் அவர் தெரிவித்தார்.