டி20 உலககோப்பை 2026: சிறந்த பிளேயிங் XI.. எந்த இந்திய வீரர்களுக்கு இடம்.. வாஹன், ரஹானே அறிவிப்பு

அகமதாபாத்: 2026 டி20 உலககோப்பை இறுதிப் போட்டியில், இந்திய அணி நியூசிலாந்தை வீழ்த்தி சாம்பியன் பட்டத்தை கைப்பற்றியது. இங்கிலாந்து முன்னாள் கேப்டன் மைக்கேல் வாகன், இந்தத் தொடரில் சிறப்பாகச் செயல்பட்ட வீரர்களைக் கொண்டு தனது சிறந்த பிளேயிங் லெவன் அணியை அறிவித்துள்ளார். அதில் இந்திய அணியில் இருந்து சஞ்சு சாம்சன் உட்பட 3 வீரர்கள் இடம்பெற்றுள்ளனர்.

தொடர் நாயகனாக தேர்வு செய்யப்பட்ட சஞ்சு சாம்சன், மூன்று அடுத்தடுத்த அரை சதங்களுடன் ஜொலித்தார். அரையிறுதி மற்றும் இறுதிப் போட்டிகளில் தலா 89 ரன்கள் எடுத்தது அசத்தினார். வாகனின் மற்றொரு தொடக்க வீரர், நியூசிலாந்தின் ஃபின் ஆலன். இவர் தென்னாப்பிரிக்காவுக்கு எதிரான அரையிறுதியில் 33 பந்துகளில் 100 ரன்கள் விளாசி சாதனை படைத்தார்.

இந்தத் தொடக்க வீரர்களைத் தொடர்ந்து, இடது கை பேட்ஸ்மேன்களான ஷிம்ரோன் ஹெட்மேயரும், ஜேக்கப் பெத்தேலும் முறையே 3 மற்றும் 4 ஆம் இடங்களில் இடம்பிடித்தனர். தென் ஆப்பிரிக்காவின் அதிரடி வீரர் டீவால்ட் பிரெவிஸ், 5 ஆம் வரிசை வீரராக வாகனின் அணியில் சேர்க்கப்பட்டார்.

இந்திய ஆல்-ரவுண்டர் ஹர்திக் பாண்டியாவுக்கு 6 ஆம் இடத்தையும், இங்கிலாந்தின் வில் ஜாக்ஸுக்கு 7 ஆம் இடத்தையும் வாகன் ஒதுக்கினார். மேற்கிந்தியத் தீவுகளின் ரோமாரியோ ஷெப்பர்ட் மற்றும் நியூசிலாந்தின் மிட்செல் சான்ட்னர் முறையே 8 மற்றும் 9 ஆம் இடங்களில் சேர்க்கப்பட்டனர். இறுதிப் போட்டியின் நாயகன் ஜஸ்பிரித் பும்ரா, நியூசிலாந்து வேகப்பந்து வீச்சாளர் மாட் ஹென்றி ஆகியோருடன் வாகன் தனது 11 பேர் கொண்ட அணியை நிறைவு செய்தார்.

மைக்கேல் வாகனின் 2026 டி20 உலகக் கோப்பைக்கான சிறந்த 11 பேர் அணி: சஞ்சு சாம்சன், ஃபின் ஆலன், ஷிம்ரோன் ஹெட்மேயர், ஜேக்கப் பெத்தேல், டீவால்ட் பிரெவிஸ், ஹர்திக் பாண்டியா, வில் ஜாக்ஸ், ரோமாரியோ ஷெப்பர்ட், மிட்செல் சான்ட்னர், ஜஸ்பிரித் பும்ரா, மாட் ஹென்றி

இதற்கிடையே, இந்திய அணியின் முன்னாள் கேப்டன் அஜிங்க்யா ரஹானேவும் தனது 2026 டி20 உலகக் கோப்பை தொடரின் சிறந்த அணியை அறிவித்தார். இவரது அணியில் ஆறு இந்திய வீரர்கள் இடம்பிடித்துள்ளனர். வாகன் தேர்வு செய்த சாம்சன், ஹர்திக் மற்றும் பும்ரா ஆகியோர் ரஹானேவின் அணியிலும் இடம்பெற்றுள்ளனர்.

வாகனின் அணியில் இடம்பெற்றிருந்த பெத்தேல், ஹெட்மேயர், ஷெப்பர்ட் ஆகியோரை நீக்கி, இஷான் கிஷன், சூர்யகுமார் யாதவ் மற்றும் அக்சர் படேல் ஆகியோரை ரஹானே தனது அணிக்குத் தேர்ந்தெடுத்தார். மேலும், சான்ட்னருக்குப் பதிலாக அடில் ரஷித்தை தனது முக்கிய சுழற்பந்து வீச்சாளராக ரஹானே தேர்வு செய்தது, வாகனின் அணியில் இருந்து செய்யப்பட்ட நான்காவது மாற்றமாகும்.

இந்தத் தொடரில் அதிக ரன்கள் குவித்த பாகிஸ்தானின் சாஹிப்சாதா ஃபர்ஹான் மற்றும் நியூசிலாந்தின் டிம் சைஃபர்ட் ஆகியோர் மைக்கேல் வாகன் மற்றும் அஜிங்க்யா ரஹானே ஆகிய இருவரின் சிறந்த 11 பேர் கொண்ட அணிகளிலும் இடம்பெறவில்லை. மேலும், அதிக விக்கெட்டுகளை வீழ்த்தியவர்களில் ஒருவரான வருண் சக்கரவர்த்தியும் இரு அணிகளிலும் இடம்பிடிக்கவில்லை.

அஜிங்க்யா ரஹானேவின் 2026 டி20 உலகக் கோப்பைக்கான சிறந்த 11 பேர் அணி: சஞ்சு சாம்சன், ஃபின் ஆலன், இஷான் கிஷன், சூர்யகுமார் யாதவ் (கேப்டன்), டீவால்ட் பிரெவிஸ், ஹர்திக் பாண்டியா, வில் ஜாக்ஸ், அக்சர் படேல், அடில் ரஷித், ஜஸ்பிரித் பும்ரா, மாட் ஹென்றி