என்ன ஷிம்ரன் இதுல்லாம்? கிறிஸ் கெயில் 15 ஆண்டு சாதனையை முறியடித்த வெஸ்ட் இண்டீஸ் வீரர் ஷிம்ரன் ஹெட்மயர்

கொல்கத்தா: டி20 உலகக் கோப்பையில் அதிவேக அரை சதம் அடித்து மேற்கிந்தியத் தீவுகள் அணியின் ஷிம்ரோன் ஹெட்மையர், புதிய சாதனை படைத்தார். அவர் வெறும் 22 பந்துகளில் அரை சதத்தை எட்டி, "யூனிவர்ஸ் பாஸ்" கிறிஸ் கெய்லின் சாதனையை முறியடித்தார். இந்த மைல்கல்லை ஹெட்மையர் ஸ்காட்லாந்து அணிக்கு எதிராக அவர் எட்டினார்.

கொல்கத்தாவில் நடைபெற்ற இந்தப் போட்டியில், முதலில் பேட்டிங் செய்ய களமிறங்கிய மேற்கிந்தியத் தீவுகள் அணிக்கு, பிராண்டன் கிங் மற்றும் கேப்டன் ஷாய் ஹோப் ஆகியோர் 54 ரன்கள் சேர்த்து தொடக்கத்தை வலுப்படுத்தினர். 10 ஓவர்களில் 58/2 என தடுமாறிய நிலையில், ஹெட்மையர் மற்றும் ரோவ்மன் பவல் மூன்றாவது விக்கெட்டுக்கு 81 ரன்கள் குவித்து நிலையை சீர்செய்தனர்.

களமிறங்கிய இரண்டாவது பந்திலேயே ஆலிவர் டேவிட்சனின் பந்தில் லாங்-ஆஃப் திசையில் சிக்ஸர் விளாசி தனது அதிரடியைத் தொடங்கினார் ஹெட்மையர். அடுத்த சில ஓவர்களிலும் தாக்குதலைத் தொடர்ந்த அவர், 22 பந்துகளில் தனது அரை சதத்தை அதே டேவிட்சனின் பந்திலேயே நிறைவு செய்தார்.

முன்னதாக, கிறிஸ் கெய்ல் 2009-ல் ஓவல் மைதானத்தில் ஆஸ்திரேலியாவுக்கு எதிராக 23 பந்துகளில் அரை சதம் அடித்து சாதனை புரிந்திருந்தார். 170 ரன்கள் இலக்கை துரத்திய அந்தப் போட்டியில், கெய்ல் மற்றும் ஆண்ட்ரே பிளெட்சர், தொடக்க விக்கெட்டுக்கு 133 ரன்கள் சேர்த்தனர்.

கெய்ல், பிரட் லீ வீசிய முதல் ஓவரிலேயே இரண்டு பவுண்டரிகளை அடித்தார். ஏழாவது ஓவரில் ஜேம்ஸ் ஹோப்ஸின் பந்தில் ஒற்றை ரன் அடித்து அரை சதத்தை எட்டினார். அந்தப் போட்டியில் கெய்ல் 50 பந்துகளில் 88 ரன்கள் குவித்து, மேற்கிந்தியத் தீவுகள் அணி ஏழு விக்கெட் வித்தியாசத்தில் வெற்றி பெற்றது.

தற்போது, ஹெட்மையர் அடித்த 64 ரன்கள், மேற்கிந்தியத் தீவுகள் அணி 20 ஓவர்களில் 182/5 என்ற வலுவான ஸ்கோரை எட்ட உதவியது. பவல் ஆட்டமிழந்த பிறகு, ஹெட்மையர் ஷெர்ஃபேன் ரூதர்போர்ட்டுடன் நான்காவது விக்கெட்டுக்கு 36 ரன்கள் சேர்த்தார். இறுதியில், பிராண்டன் மெக்முல்லனின் சிறப்பான கேட்ச்சால் சஃபியான் ஷெரிஃபிடம் தனது விக்கெட்டை இழந்தார் ஹெட்மையர்.

இது தொடர்பாக பேசிய ஹெட்மையர்,"வெப்பம் அதிகமாக இருந்தது நல்லதும் கெட்டதும் தான். வேறு யாரை பற்றியும் எனக்குத் தெரியவில்லை, ஆனால் நான் நடுவரிடம் கேட்டபோது, அவருக்கு அவ்வளவாக வெயில் தெரியவில்லை என்றார். பகல்-இரவு போட்டிகளை மீண்டும் விளையாட வேண்டும் என்று நினைக்கிறேன்." என்றார்.