U19 World Cup Final: இந்தியா - இங்கிலாந்து U19 உலகக்கோப்பை இறுதிப்போட்டி எப்போது? ஒளிபரப்பு விவரம்

ஹாராரே: 19 வயதுக்குட்பட்டோருக்கான உலகக்கோப்பை கிரிக்கெட் தொடரின் இறுதிப்போட்டி இன்று நடைபெறவுள்ளது. இதில் ஆயுஷ் மத்ரே தலைமையிலான இந்திய அணியும், தாமஸ் ரீவ் தலைமையிலான இங்கிலாந்து அணியும் கோப்பையைக் கைப்பற்றப் பலப்பரீட்சை நடத்துகின்றன.

ஜிம்பாப்வேயில் நடைபெற்று வரும் ஜூனியர் உலகக்கோப்பைத் தொடர் இறுதிக்கட்டத்தை எட்டியுள்ளது. ஹாராரே விளையாட்டு மைதானத்தில் இன்று (வெள்ளிக்கிழமை) நடைபெறும் மாபெரும் இறுதிப்போட்டியில் தோல்வியையே சந்திக்காத இந்தியா, இங்கிலாந்து அண்டர் 19 அணிகள் மோதுவதால் எதிர்பார்ப்பு எகிறியுள்ளது.

6வது கோப்பைக்கு குறி

ஜூனியர் உலகக்கோப்பை வரலாற்றில் மிகவும் வெற்றிகரமான அணியாகத் திகழும் இந்தியா, இதுவரை 5 முறை கோப்பையை வென்றுள்ளது. இன்று நடைபெறும் போட்டியில் வெற்றி பெற்றால், 6வது முறையாகச் சாம்பியன் பட்டத்தைக் கைப்பற்றிச் சாதனை படைக்கும். மறுபுறம், கடந்த 28 ஆண்டுகளாக உலகக்கோப்பையை வெல்ல முடியாமல் தவித்துவரும் இங்கிலாந்து அணி, அந்த ஏக்கத்தைத் தணிக்கக் காத்திருக்கிறது.

அரையிறுதியில் மிரட்டிய இந்தியா

ஆப்கானிஸ்தான் அணிக்கு எதிரான அரையிறுதிப் போட்டியில் இந்திய அணி அபாரமான ஆட்டத்தை வெளிப்படுத்தியது. 311 ரன்கள் என்ற இமாலய இலக்கை விரட்டிய இந்திய அணிக்கு, ஆரோன் ஜார்ஜ் சதம் (115) அடித்துத் தூணாக நின்றார். வைபவ் சூர்யவன்ஷி (68) மற்றும் கேப்டன் ஆயுஷ் மத்ரே (62) ஆகியோரும் அதிரடியாக ரன்களைக் குவித்தனர். பேட்டிங்கில் அசுர பலத்துடன் இருக்கும் இந்திய அணியைச் சமாளிப்பது இங்கிலாந்து பந்துவீச்சாளர்களுக்குச் சவாலாக இருக்கும்.

சளைக்காத இங்கிலாந்து

அதேவேளையில், இங்கிலாந்து அணியும் சாதாரணமான அணி அல்ல. அரையிறுதிப் போட்டியில் பலம் வாய்ந்த ஆஸ்திரேலிய அணியை 20 ரன்கள் வித்தியாசத்தில் வீழ்த்தி இறுதிப்போட்டிக்கு முன்னேறியுள்ளது. அந்த அணியின் கேப்டன் தாமஸ் ரீவ் 110 ரன்கள் குவித்து நல்ல ஃபார்மில் உள்ளார். பந்துவீச்சில் செபாஸ்டியன் மோர்கன் மற்றும் ஜேம்ஸ் மின்டோ ஆகியோர் எதிரணிக்கு நெருக்கடி கொடுத்து வருகின்றனர்.

இந்தியா - இங்கிலாந்து இறுதிப் போட்டி எப்போது?

இந்தியா மற்றும் இங்கிலாந்து அணிகள் மோதும் U19 உலகக்கோப்பை இறுதிப்போட்டி இன்று (பிப்ரவரி 6, வெள்ளிக்கிழமை) நடைபெறுகிறது.

நேரம் என்ன?

இந்திய நேரப்படி மதியம் 1:00 மணிக்குப் போட்டித் தொடங்கும். முன்னதாக 12:30 மணிக்கு டாஸ் போடப்படும்.

எந்தத் தொலைக்காட்சியில் பார்க்கலாம்?

இந்தப் போட்டியை இந்தியாவில் ஸ்டார் ஸ்போர்ட்ஸ் நெட்வொர்க் தொலைக்காட்சிகளில் நேரலையாகக் கண்டு களிக்கலாம்.

மொபைலில் பார்ப்பது எப்படி?

தொலைக்காட்சி வசதி இல்லாதவர்கள், ஜியோ ஹாட்ஸ்டார் (JioHotstar) செயலி மற்றும் இணையதளத்தின் மூலம் போட்டியை நேரலையில் பார்க்கலாம்.

அணிகள் விவரம்:

இந்தியா U19: ஆயுஷ் மத்ரே (கேப்டன்), ஆரோன் ஜார்ஜ், வைபவ் சூர்யவன்ஷி, வேதாந்த் திரிவேதி, விஹான் மல்ஹோத்ரா, அபிகியான் குண்டு (விக்கெட் கீப்பர்), ஆர்.எஸ். அம்ப்ரிஷ், கனிஷ்க் சௌஹான், கிலான் படேல், ஹெனீல் படேல், தீபேஷ் தேவேந்திரன், ஹர்வன்ஷ் பங்காலியா, முகமது எனான், உத்தவ் மோகன், கிஷன் குமார் சிங்.

இங்கிலாந்து U19: தாமஸ் ரீவ் (கேப்டன்), பென் டாக்கின்ஸ், ஜோசப் மூர்ஸ், பென் மேயஸ், காலேப் பால்கோனர், ரால்ஃபி ஆல்பர்ட், பர்ஹான் அகமது, செபாஸ்டியன் மோர்கன், ஜேம்ஸ் மின்டோ, மேன்னி லம்ஸ்டன், அலெக்ஸ் பிரெஞ்சு, அலெக்ஸ் கிரீன், ஐசக் முகமது, லூக் ஹேண்ட்ஸ், வில் பென்னிசன், அலி ஃபரூக்.