"நீங்க என்ன பயன்படுத்துறீங்க?".. சச்சினை மட்டம் தட்டிய டிவில்லியர்ஸை கலாய்த்த தோடா கணேஷ்

மும்பை: இந்திய கிரிக்கெட் வரலாற்றில் சச்சின் டெண்டுல்கர் மற்றும் விராட் கோலி ஆகிய இருவரில் யார் சிறந்தவர் என்ற விவாதம் நீண்ட காலமாக நடந்து வருகிறது. இந்த நிலையில், வெளிநாட்டு மண்ணில் சச்சினை விட விராட் கோலி தான் சிறந்த டெஸ்ட் பேட்ஸ்மேன் என்று தென்னாப்பிரிக்க அணியின் முன்னாள் வீரர் ஏபி டிவில்லியர்ஸ் கூறிய கருத்து பெரும் விவாதத்தை ஏற்படுத்தியுள்ளது. இதற்கு இந்திய முன்னாள் வேகப்பந்து வீச்சாளர் தோடா கணேஷ் நக்கலாக பதிலடி கொடுத்துள்ளார்.

தனது யூடியூப் பக்கத்தில் பேசிய டிவில்லியர்ஸ், "இந்திய பேட்ஸ்மேன்கள் வெளிநாட்டு மண்ணில் சிறப்பாக விளையாட முடியும் என்பதை முதலில் காட்டியவர் சச்சின் டெண்டுல்கர் தான். ஆனால், அவரை விட விராட் கோலி இன்னும் வலுவான ஆட்டத்தை வெளிப்படுத்தியுள்ளார். சச்சின் ஏற்படுத்திய அந்த வழியை கோலி அடுத்த கட்டத்திற்கு கொண்டு சென்றுள்ளார்" என்று தெரிவித்தார். மேலும் கே.எல்.ராகுல், தேவ்தத் படிக்கல் போன்ற இளம் வீரர்கள் இவர்களைப் பின்பற்றி வெளிநாடுகளில் சிறப்பாக விளையாடுவதாகவும் அவர் கூறினார்.

டிவில்லியர்ஸின் இந்த கருத்தைக் கேட்டு அதிர்ச்சியடைந்த இந்திய முன்னாள் வீரர் தோடா கணேஷ், தனது எக்ஸ் பக்கத்தில் அவரை கடுமையாகக் கலாய்த்துள்ளார். "சகோதரரே, நீங்கள் பயன்படுத்தும் போதைப்பொருளை எனக்கும் கொஞ்சம் கொடுங்கள்" என்று மிகவும் நக்கலான முறையில் அவர் பதிவிட்டுள்ளார். ராயல் சேலஞ்சர்ஸ் பெங்களூரு அணியில் கோலியுடன் நெருங்கிய நண்பராக இருந்ததால் தான் டிவில்லியர்ஸ் இவ்வாறு பேசியுள்ளார் என்று ரசிகர்கள் பலரும் சமூக வலைதளங்களில் விமர்சித்து வருகின்றனர்.

புள்ளிவிவரங்களின்படி சச்சின் டெண்டுல்கர் வெளிநாட்டு மண்ணில் அபாரமான சாதனையைப் படைத்துள்ளார். சச்சின் வெளிநாடுகளில் விளையாடிய 106 டெஸ்ட் போட்டிகளில் 29 சதங்களுடன் 54.74 சராசரியுடன் 8,705 ரன்கள் குவித்துள்ளார். அவர் ஆஸ்திரேலியா, இங்கிலாந்து, தென்னாப்பிரிக்கா, நியூசிலாந்து போன்ற பல நாடுகளில் சதமடித்து 20 ஆண்டுகளுக்கும் மேலாக ஆதிக்கம் செலுத்தினார்.

பாகிஸ்தான் அணிக்கு மரண அடி.. 200 ரன் கூட தாண்டலை.. இங்கிலாந்து மாபெரும் இன்னிங்ஸ் வெற்றி

ஆனால் விராட் கோலி வெளிநாடுகளில் விளையாடிய 68 டெஸ்ட் போட்டிகளில் 41.47 சராசரியுடன் 4,894 ரன்கள் மட்டுமே எடுத்துள்ளார். விராட் கோலி கடந்த 2018 ஆம் ஆண்டு இங்கிலாந்து சுற்றுப்பயணத்தில் 5 போட்டிகளில் 593 ரன்களும், 2014-15 ஆஸ்திரேலிய தொடரில் 4 சதங்களும் அடித்து அசத்தியுள்ளார். அவரது தலைமையில் இந்திய அணி ஆஸ்திரேலிய மண்ணில் முதல்முறையாக டெஸ்ட் தொடரை வென்று சாதனை படைத்தது குறிப்பிடத்தக்கது. இதனால் சச்சின், கோலி இருவரில் யார் சிறந்தவர் என்ற விவாதம் மீண்டும் சூடுபிடித்துள்ளது.

Also Read

உலகிலேயே எந்த டீமும் இவ்ளோ மோசமாக ஆடியதில்லை.. பாகிஸ்தான் படுமோசமான சாதனை.. 2 இன்னிங்சிலும் டக்