விராட் கோலி மரண அடி.. அதிவேக செஞ்சுரி.. சச்சின் சாதனை சமன்.. ஒரே செஞ்சுரியால் ரெக்கார்டுகள் உடைப்பு

திருவனந்தபுரம்: வெஸ்ட் இண்டீஸ் அணிக்கு எதிரான முதல் ஒருநாள் போட்டியில் இந்திய அணியின் மூத்த வீரர் விராட் கோலி சதம் அடித்து பல்வேறு சாதனைகளை படைத்தார். வெஸ்ட் இண்டீஸ் அணியின் குடகேஷ் மோட்டி வீசிய பந்தை சிக்சருக்கு பறக்கவிட்டு தனது 55வது ஒருநாள் சதத்தை பூர்த்தி செய்த கோலி, சச்சின் டெண்டுல்கரின் மாபெரும் சாதனையை சமன் செய்தார்.

சச்சின் சாதனை சமன்

லிஸ்ட்-ஏ கிரிக்கெட் வரலாற்றில் அதிக சதங்கள் அடித்த வீரர் என்ற சச்சின் டெண்டுல்கரின் சாதனையை விராட் கோலி சமன் செய்துள்ளார். சச்சின் 538 இன்னிங்ஸ்களில் 60 சதங்கள் அடித்திருந்த நிலையில், கோலி வெறும் 338 இன்னிங்ஸ்களிலேயே தனது 60வது லிஸ்ட்-ஏ சதத்தை பதிவு செய்து புதிய மைல்கல்லை எட்டியுள்ளார். இந்தப் பட்டியலில் கிரகாம் கூச் 44 சதங்களுடனும், கிரீம் ஹிக் 40 சதங்களுடனும் அடுத்தடுத்த இடங்களில் உள்ளனர்.

வெஸ்ட் இண்டீஸுக்கு எதிராக 10வது சதம்

ஒரு குறிப்பிட்ட அணிக்கு எதிராக அதிக சதங்கள் விளாசிய வீரர்கள் பட்டியலிலும் கோலி ஆதிக்கம் செலுத்துகிறார். இலங்கை அணிக்கு எதிராக 10 சதங்கள் விளாசியுள்ள அவர், தற்போது வெஸ்ட் இண்டீஸ் அணிக்கு எதிராகவும் 10வது சதத்தை அடித்துள்ளார். இலங்கை அணிக்கு எதிரான 10வது சதத்தை இதே திருவனந்தபுரம் மைதானத்தில் விளாசிய கோலி, தற்போது வெஸ்ட் இண்டீஸுக்கு எதிரான 10வது சதத்தையும் இதே மண்ணில் அடித்துள்ளது குறிப்பிடத்தக்கது.

கோலியின் 3வது அதிவேக சதம்

இந்த போட்டியில் தொடக்கம் முதலே அதிரடி காட்டிய கோலி 74 பந்துகளில் சதத்தை எட்டினார். இது ஒருநாள் கிரிக்கெட்டில் விராட் கோலியின் 3வது அதிவேக சதமாகும். இதற்கு முன் ஆஸ்திரேலியாவுக்கு எதிராக 52 மற்றும் 61 பந்துகளில் சதம் அடித்ததே அவரின் அதிவேக சதங்களாக உள்ளன.

கிரிக்கெட் வரலாற்றில் புதிய உலக சாதனை

சர்வதேச கிரிக்கெட் வரலாற்றில் ஒரே நாளில் 6 ஒருநாள் சதங்கள் அடிக்கப்பட்டு புதிய உலக சாதனை படைக்கப்பட்டுள்ளது. இந்தப் போட்டி நடைபெற்ற இதே செப்டம்பர் 27 அன்று உலகம் முழுவதும் நடைபெற்ற 3 வெவ்வேறு ஒருநாள் போட்டிகளில் டெம்பா பவுமா, டேவிட் மில்லர், பேண்டன், ஜஸ்டின் க்ரீவ்ஸ், சுப்மன் கில் மற்றும் விராட் கோலி என 6 பேட்டர்கள் சதம் அடித்து முந்தைய சாதனையை தகர்த்துள்ளனர்.

அசாருதீனின் 28 ஆண்டு கால சாதனை காலி.. முதல் போட்டியிலேயே புதிய வரலாறு படைத்த விராட் கோலி

இந்தியா வெற்றி

இந்தப் போட்டியில் டாஸ் வென்று முதலில் பேட்டிங் செய்த வெஸ்ட் இண்டீஸ் அணி 50 ஓவர்களில் 7 விக்கெட் இழப்பிற்கு 295 ரன்கள் எடுத்தது. ஜஸ்டின் க்ரீவ்ஸ் 101 ரன்களும், ஜான் கேம்ப்பெல் 62 ரன்களும், அமீர் ஜாங்கூ ஆட்டமிழக்காமல் 58 ரன்களும் குவித்தனர். இந்திய அணி தரப்பில் குல்தீப் யாதவ் அபாரமாக பந்துவீசி 10 ஓவர்களில் 40 ரன்கள் மட்டுமே கொடுத்து 4 விக்கெட்டுகளை சாய்த்தார். பிரசித் கிருஷ்ணா 2 விக்கெட்டுகளை வீழ்த்தினார்.

296 ரன்கள் எடுத்தால் வெற்றி என்ற இலக்குடன் களமிறங்கிய இந்திய அணிக்கு ரோஹித் சர்மா 32 ரன்களில் ஆட்டமிழந்தார். பின்னர் ஜோடி சேர்ந்த சுப்மன் கில் மற்றும் விராட் கோலி வெஸ்ட் இண்டீஸ் பந்துவீச்சை நாலாபுறமும் சிதறடித்தனர்.

கேப்டன் இன்னிங்ஸ் ஆடிய கில் 108 பந்துகளில் 13 பவுண்டரிகள், 1 சிக்சருடன் 110 ரன்கள் குவித்து ஆட்டமிழந்தார். மறுமுனையில் அதிரடியாக ஆடிய கோலி 88 பந்துகளில் 10 பவுண்டரிகள், 9 சிக்சர்களுடன் 139 ரன்கள் எடுத்து இந்திய அணியை வெற்றி பெறச் செய்தார். 41.4 ஓவர்கள் முடிவில் இந்திய அணி 2 விக்கெட் இழப்பிற்கு 300 ரன்கள் எடுத்து வெற்றி இலக்கை எட்டியது.