5 சாதனைகளை தகர்த்து எறிந்த விராட் கோலி.. இங்கிலாந்து மண்ணில் மெகா சாதனைப் பட்டியல்

கார்டிஃப்: இங்கிலாந்துக்கு எதிரான 2வது ஒருநாள் கிரிக்கெட் போட்டியில் இந்திய அணியின் மூத்த வீரர் விராட் கோலி 65 ரன்கள் குவித்து பல்வேறு சாதனைகளை முறியடித்தார். இந்த ஆட்டத்தின் மூலம், ஒரே போட்டியில் ஐந்து முக்கியமான சாதனைகள் செய்து சர்வதேச கிரிக்கெட்டில் சரித்திரம் படைத்துள்ளார்.

இங்கிலாந்தில் அதிக சர்வதேச ரன்கள் குவித்த இந்தியர்

இங்கிலாந்து மண்ணில் அனைத்து வகையான சர்வதேச கிரிக்கெட் போட்டிகளையும் சேர்த்து அதிக ரன்கள் குவித்த இந்திய பேட்ஸ்மேன் என்ற ராகுல் டிராவிட்டின் சாதனையை கோலி முறியடித்துள்ளார். இந்தப் போட்டிக்கு முன்பாக டிராவிட்டின் சாதனையை முறியடிக்க அவருக்கு 4 ரன்கள் மட்டுமே தேவைப்பட்டது. ஆட்டத்தின் 9வது ஓவரின் 4வது பந்தில் ஜோப்ரா ஆர்ச்சர் பந்துவீச்சில் பவுண்டரி அடித்து கோலி இந்த மைல்கல்லை எட்டினார்.

2011 முதல் 2026 வரை இங்கிலாந்தில் 59 போட்டிகளில் விளையாடியுள்ள கோலி, 75 இன்னிங்ஸ்களில் 2646 ரன்களுடன் முதலிடத்தில் உள்ளார். ராகுல் டிராவிட் 1996 முதல் 2011 வரை இங்கிலாந்தில் 46 போட்டிகளில் விளையாடி 56 இன்னிங்ஸ்களில் 2645 ரன்கள் எடுத்து 2வது இடத்திற்கு சென்றுள்ளார். சச்சின் டெண்டுல்கர் 2626 ரன்களுடன் 3வது இடத்திலும், ரோஹித் சர்மா 2308 ரன்களுடன் 4வது இடத்திலும் உள்ளனர். இங்கிலாந்தில் அதிக சர்வதேச ரன்கள் குவித்த வெளிநாட்டு வீரர் என்ற சாதனையை வெஸ்ட் இண்டீஸின் விவியன் ரிச்சர்ட்ஸ் (3402 ரன்கள், 63 இன்னிங்ஸ், 55 போட்டிகள்) வைத்துள்ளார்.

எதிரணியின் மண்ணில் அதிக ஒருநாள் ரன்கள்

எதிரணியின் சொந்த மண்ணில் விளையாடப்பட்ட ஒருநாள் போட்டிகளில் அதிக ரன்கள் குவித்த வீரர் என்ற குமார் சங்ககாராவின் உலக சாதனையை விராட் கோலி முறியடித்துள்ளார். இந்த மைல்கல்லை எட்ட கோலிக்கு 46 ரன்கள் தேவைப்பட்ட நிலையில், ஆட்டத்தின் 24வது ஓவரின் 4வது பந்தில் 46வது ரன்னை எடுத்து சங்ககாராவின் 5518 ரன்கள் சாதனையை முறியடித்தார்.

சங்ககாரா 149 ஒருநாள் போட்டிகளில் 5518 ரன்கள் எடுத்திருந்தார். ஆனால் கோலி தனது 126வது போட்டியிலேயே 5519 ரன்களுடன் முதலிடத்தைப் பிடித்துள்ளார். இந்தப் பட்டியலில் ரிக்கி பாண்டிங் (5090), சச்சின் டெண்டுல்கர் (5065), எம்எஸ் தோனி (4520) ஆகியோர் அடுத்தடுத்த இடங்களில் உள்ளனர்.

ஒட்டுமொத்தமாக வெளிநாட்டு மண்ணில் (எதிரணி மைதானம் + நடுநிலை மைதானங்கள்) கோலி 183 ஒருநாள் போட்டிகளில் 7981 ரன்கள் எடுத்துள்ளார். 8000 ரன்களை எட்ட அவருக்கு இன்னும் 19 ரன்கள் மட்டுமே தேவை. இந்தியாவில் சச்சின் (11450 ரன்கள்) மற்றும் கங்குலி (8253 ரன்கள்) மட்டுமே இந்த 8000 ரன்கள் மைல்கல்லைக் கடந்துள்ளனர்.

இங்கிலாந்துக்கு எதிராக ஒருநாள் போட்டிகளில் அதிக 50+ ரன்கள்

இங்கிலாந்துக்கு எதிரான ஒருநாள் போட்டிகளில் அதிக முறை 50 ரன்களுக்கு மேல் குவித்த வெஸ்ட் இண்டீஸ் ஜாம்பவான் விவியன் ரிச்சர்ட்ஸின் சாதனையை கோலி சமன் செய்துள்ளார். இந்தப் போட்டியில் 27வது ஓவரின் முதல் பந்தில் சாம் கர்ரன் பந்துவீச்சில் பவுண்டரி அடித்து 50 பந்துகளில் கோலி தனது அரைசதத்தை எட்டினார்.

இங்கிலாந்துக்கு எதிராக விளையாடிய 40 ஒருநாள் போட்டிகளில் 3 சதங்கள் மற்றும் 11 அரைசதங்களுடன் 14 முறை 50 ரன்களுக்கு மேல் எடுத்து விவியன் ரிச்சர்ட்ஸின் (14 முறை) சாதனையை சமன் செய்தார். இந்தப் பட்டியலில் 15 முறை 50 ரன்களுக்கு மேல் குவித்த இலங்கை முன்னாள் கேப்டன் குமார் சங்ககாரா முதலிடத்தில் உள்ளார்.

இங்கிலாந்து மண்ணில் அதிக அரைசதங்கள் அடித்த வெளிநாட்டு வீரர்

இங்கிலாந்து மண்ணில் சர்வதேச கிரிக்கெட் போட்டிகளில் அதிக அரைசதங்கள் விளாசிய வெளிநாட்டு பேட்ஸ்மேன் என்ற உலக சாதனையை கோலி படைத்துள்ளார். இரண்டாவது ஒருநாள் போட்டியில் அவர் அடித்த சதம் இங்கிலாந்து மண்ணில் அவர் அடிக்கும் 19வது சர்வதேச அரைசதமாகும். இதன் மூலம், ஆஸ்திரேலியாவின் ஸ்டீவ் ஸ்மித்தின் (18 அரைசதங்கள்) சாதனையை கோலி முறியடித்து முதலிடத்தைப் பிடித்துள்ளார்.

"நாங்க நாலு பேரு".. இந்திய பேட்டிங்கை காலி செய்த 4 வீரர்கள்.. கோலி, ஸ்ரேயாஸ் உதவியால் டீசன்ட் ஸ்கோர்

ரோஹித் - கோலி ஜோடியின் பார்ட்னர்ஷிப் சாதனை

இந்தப் போட்டியில் ரோஹித் சர்மா மற்றும் விராட் கோலி ஜோடி 2வது விக்கெட்டுக்கு 60 ரன்கள் பார்ட்னர்ஷிப் அமைத்தது. இதன் மூலம், சர்வதேச கிரிக்கெட்டில் அனைத்து வடிவ போட்டிகளையும் சேர்த்து 8028 பார்ட்னர்ஷிப் ரன்களைக் கடந்து, சவுரவ் கங்குலி - ராகுல் டிராவிட் (7626 ரன்கள்) ஜோடியை முந்தி இந்தியாவின் 3வது மிகச்சிறந்த பார்ட்னர்ஷிப் ஜோடியாக உருவெடுத்துள்ளனர்.

இந்திய அளவில் அதிக பார்ட்னர்ஷிப் ரன்கள் குவித்த ஜோடிகள்:

சச்சின் டெண்டுல்கர் - சவுரவ் கங்குலி: 12400 ரன்கள்
சச்சின் டெண்டுல்கர் - ராகுல் டிராவிட்: 11037 ரன்கள்
ரோஹித் சர்மா - விராட் கோலி: 8028 ரன்கள்
சவுரவ் கங்குலி - ராகுல் டிராவிட்: 7626 ரன்கள்
வீரேந்தர் சேவாக் - கௌதம் கம்பீர்: 7199 ரன்கள்