"5 நாள் ஆச்சு ஏதாச்சும் சொல்லுங்க..".. இந்தியாவை விட்டு நாட்டுக்கு போக முடியாமல் கதறிய WI கோச்

கொல்கத்தா: 2026 டி20 உலகக் கோப்பை கிரிக்கெட் தொடரிலிருந்து நாக் அவுட் சுற்றுடன் வெளியேறிய வெஸ்ட் இண்டீஸ் அணி, இன்னும் சொந்த நாடு திரும்ப முடியாமல் இந்தியாவில் சிக்கித் தவித்து வருகிறது. இந்நிலையில், அந்த அணியின் தலைமைப் பயிற்சியாளர் டேரன் சமி தனது சமூக வலைத்தளப் பக்கத்தில் வெளியிட்டுள்ள ஒரு சிறிய பதிவு கிரிக்கெட் ரசிகர்களிடையே பெரும் கவனத்தைப் பெற்றுள்ளது.

டேரன் சமியின் பதிவு

2026 டி20 உலகக் கோப்பை தொடருக்காக இந்தியா வந்திருந்த வெஸ்ட் இண்டீஸ் அணி, சிறப்பான ஆட்டத்தை வெளிப்படுத்தி சூப்பர் 8 சுற்று வரை முன்னேறியது. ஆனால், கொல்கத்தா ஈடன் கார்டன்ஸ் மைதானத்தில் நடந்த போட்டியில் இந்திய அணியிடம் தோல்வியைத் தழுவி உலகக் கோப்பை தொடரிலிருந்து வெளியேறியது. டி20 உலகக்கோப்பை தொடர் முடிந்து சொந்த நாடு திரும்பத் திட்டமிட்டிருந்த நிலையில், அமெரிக்கா - ஈரான் போர் காரணமாக விமான போக்குவரத்தில் ஏற்பட்ட தடங்கல்களால் கடந்த நான்கு நாட்களாக கொல்கத்தாவிலேயே அந்த அணி தங்கியுள்ளது.

ஒரு நீண்ட கிரிக்கெட் தொடரை முடித்துவிட்டு வீடு திரும்ப முடியாத ஏமாற்றத்தில் உள்ள அணியின் தலைமைப் பயிற்சியாளர் டேரன் சமி, "நான் வீட்டுக்கு போகணும்" என மிகவும் சுருக்கமான ஒரு பதிவை வெளியிட்டுள்ளார். எப்போதும் மிகவும் கம்பீரமாகவும், வீரர்களை உற்சாகப்படுத்துபவராகவும் அறியப்படும் டேரன் சமியின் இந்த எளிய பதிவு, தொடரிலிருந்து வெளியேறிய விரக்தியையும், வீடு திரும்ப முடியாத வீரர்களின் மனநிலையையும் அச்சு அசலாகப் பிரதிபலிப்பதாக அமைந்துள்ளது.

அடுத்து மற்றொரு பதிவையும் வெளியிட்டு இருக்கிறார். அதில், "எப்போது செல்வோம் என்ற தகவலையாவது சொல்லுங்கள். இன்று, நாளை, அடுத்த வாரம்.. என ஏதாவது ஒரு தகவலை கூறுங்கள். இத்துடன் 5 நாட்கள் ஆகி விட்டது" எனக் கூறி இருக்கிறார்.

விமானப் போக்குவரத்து பாதிப்பு ஏன்?

வெஸ்ட் இண்டீஸ் அணி இந்தியாவில் சிக்கிக் கொண்டதற்கு அமெரிக்கா - ஈரான் இடையிலான போர் காரணமாக அமைந்துள்ளது. வளைகுடா மற்றும் மேற்கு ஆசியப் பகுதிகளில் நிலவி வரும் போர் பதற்றம் மற்றும் பாதுகாப்பு அச்சுறுத்தல்கள் காரணமாக, அந்த வழியாகச் செல்லும் சர்வதேச விமானப் போக்குவரத்துகள் கடுமையாகப் பாதிக்கப்பட்டுள்ளன.

பல நாடுகள் தங்களது வான்வெளியை மூடியுள்ளதால், வழக்கமாகப் பயன்படுத்தப்படும் விமான வழித்தடங்கள் மாற்றப்பட்டுள்ளன. மேலும் பல விமானங்கள் ரத்து செய்யப்பட்டும், தாமதப்படுத்தப்பட்டும் வருகின்றன. இந்த சர்வதேச விமானப் போக்குவரத்து கட்டுப்பாடுகள் காரணமாகவே வெஸ்ட் இண்டீஸ் அணியால் திட்டமிட்டபடி கொல்கத்தாவிலிருந்து புறப்பட முடியவில்லை. வெஸ்ட் இண்டீஸ் அணியைப் போலவே ஜிம்பாப்வே அணியும் இதே போக்குவரத்துப் பாதிப்பால் சிக்கியுள்ளதாகத் தகவல்கள் தெரிவிக்கின்றன. இது ஒரு குறிப்பிட்ட அணிக்கு ஏற்பட்ட சிக்கல் அல்ல, மாறாக உலகளாவிய விமானப் போக்குவரத்து தடையால் ஏற்பட்ட விளைவாகும்.

வெஸ்ட் இண்டீஸ் வாரியம் விளக்கம்

விமானப் போக்குவரத்து ரத்தானதால் கொல்கத்தாவில் தங்கியுள்ள வெஸ்ட் இண்டீஸ் வீரர்கள் மற்றும் பயிற்சி ஊழியர்கள் அனைவரும் பாதுகாப்பாக இருப்பதாகவும், அவர்களுக்குத் தேவையான தங்கும் வசதிகள் செய்து கொடுக்கப்பட்டுள்ளதாகவும் வெஸ்ட் இண்டீஸ் கிரிக்கெட் வாரியம் அதிகாரப்பூர்வமாக அறிவித்துள்ளது.

சர்வதேச கிரிக்கெட் கவுன்சில் மற்றும் சம்பந்தப்பட்ட துறை அதிகாரிகளுடன் இணைந்து மாற்றுப் பயண ஏற்பாடுகளைச் செய்வதற்கான தீவிர முயற்சிகள் நடைபெற்று வருவதாகவும் வாரியம் விளக்கம் அளித்துள்ளது. உலகக் கோப்பையை வெல்லும் என்ற பெரும் எதிர்பார்ப்புடன் களமிறங்கி, தொடரிலிருந்து வெளியேறிய ஏமாற்றத்தில் உள்ள வெஸ்ட் இண்டீஸ் வீரர்களுக்கு, இந்தத் தாமதம் மேலும் சோர்வை ஏற்படுத்தியுள்ளது. மாற்று விமான ஏற்பாடுகள் செய்யப்பட்டு வீரர்கள் விரைவில் பாதுகாப்பாகத் தங்களது சொந்த நாட்டிற்குத் திரும்புவார்கள் என எதிர்பார்க்கப்படுகிறது.