'டி20 உலகக்கோப்பையில் இந்திய மகளிர் அணி ரொம்ப தூரம் போகாது ஏன்னா'.. அஸ்வின் சரமாரி விமர்சனம்

சென்னை: பாகிஸ்தானுக்கு எதிரான மகளிர் டி20 உலகக்கோப்பை ஆட்டத்தில் இந்திய அணி அபார வெற்றி பெற்ற போதிலும், இந்த உலகக் கோப்பை தொடரில் இந்தியா நீண்ட தூரம் செல்ல வாய்ப்பில்லை என்று முன்னாள் சுழற்பந்து வீச்சாளர் ரவிச்சந்திரன் அஸ்வின் கூறி இருக்கிறார். 2026 மகளிர் டி20 உலகக் கோப்பை தொடரின் தொடக்க ஆட்டத்தில் பாகிஸ்தானை 64 ரன்கள் வித்தியாசத்தில் வீழ்த்தி இந்தியா அபார வெற்றி பெற்றது.

இந்த நிலையில், தனது யூடியூப் சேனலில் இந்த போட்டி குறித்துப் பேசிய அஸ்வின், இந்திய அணியில் அதிரடி ஆட்டக்காரர்கள் குறைவாக இருப்பதாகக் கவலை தெரிவித்துள்ளார். அவர் கூறுகையில், "இந்த உலகக் கோப்பையில் இந்திய அணி மிக நீண்ட தூரம் செல்லும் என்று எனக்குத் தோன்றவில்லை. ஏனெனில், இந்திய பேட்டிங் வரிசையில் அதிரடியாக விளையாடும் வீரர்கள் பற்றாக்குறை உள்ளது."

"பாகிஸ்தானுக்கு எதிராக நமது சுழற்பந்து வீச்சு சிறப்பாகக் கைகொடுத்தது உண்மைதான். ஆனால், இங்கிலாந்து மற்றும் ஆஸ்திரேலியா போன்ற பலம் வாய்ந்த அணிகளுடன் ஒப்பிடும் போது இந்திய அணியின் பேட்டிங் ஆழம் மற்றும் அதிரடி ஆட்டம் மிகவும் குறைவாகவே உள்ளது. கடினமான போட்டிகளில் இது அணிக்கு பெரும் பின்னடைவை ஏற்படுத்தலாம்" என்றார்.

அதே நேரத்தில், இந்திய அணியின் நட்சத்திர பேட்ஸ்மேன் ஜெமிமா ரோட்ரிக்ஸ் அணியின் கூட்டு முயற்சியைப் பாராட்டியுள்ளார். போட்டிக்குப் பிறகு பிசிசிஐ பகிர்ந்த வீடியோவில், அணியின் ஒவ்வொரு வீரரின் பங்களிப்பையும் அவர் பாராட்டிப் பேசினார்.

போட்டியின் முதலாவது பந்திலேயே சிக்சர் அடித்த இளம் தொடக்க வீராங்கனை ஷஃபாலி வர்மாவை அவர் பாராட்டினார். மேலும், இக்கட்டான சூழ்நிலையைச் சமாளித்து விளையாடிய மூத்த வீராங்கனைகளான ஸ்மிருதி மந்தனா மற்றும் கேப்டன் ஹர்மன்பிரீத் கவுர் ஆகியோருக்கும், ஆட்டத்தை மிகச் சிறப்பாக முடித்துக் கொடுத்த ரிச்சா கோஷ் மற்றும் 5 விக்கெட்டுகளை வீழ்த்திய தீப்தி சர்மா ஆகியோருக்கும் ஜெமிமா தனது பாராட்டுக்களைத் தெரிவித்தார்.

இந்திய கிரிக்கெட்டின் தலையெழுத்தை மாற்றிய ஜூன் 25.. லார்ட்ஸ் மைதானத்தில் மாற்றி எழுதப்பட்ட வரலாறு

அஸ்வினின் விமர்சனம் ஒருபுறம் இருந்தாலும், இந்திய மகளிர் அணி தங்களது அடுத்தடுத்த ஆட்டங்களில் தங்களது திறமையை நிரூபித்து அஸ்வினின் கருத்தைத் தவறாக்குவார்கள் என்ற நம்பிக்கையில் ரசிகர்கள் உள்ளனர்.